Kêng măng 29/5, ta Nhih pah kan Chính phủ, Groi Thủ tướng Trần Hồng Hà wơt Bộ trưởng Bộ Công nghệ n’hanh Truyền thông Lào Boviengkham Vongdara, ndrel mpôl pah kan dôl geh hăn khâl n’hanh pah kan ta Việt Nam. Ta rơh wơt, Groi Thủ tướng Trần Hồng Hà lah rjăp: Đah săk geh mpeh tơm ŭnh nar sĭt jêng tay (thuỷ điện, điện sial, điện măt nar), Lào mbra jêng du ntŭk rgum tơm ŭnh nar kloh uĕh, rgâl jêng nđĭr uĕh bah nkual n’hanh lam ntŭr neh.

Aơ lah ngoăy tâm ăp ndơ n’glêh an rnoh wăch rgum ăp nuĭh ntuh kơl let năp tay. Rhơn rnê ăp nău tâm ton dơi ký đah Viện Hàn lâm Khoa học n’hanh Công nghệ Việt Nam đah Bộ Công nghệ n’hanh Truyền thông Lào, Groi Thủ tướng Trần Hồng Hà ŭch rŏng bar ding nsrôih ntrŭt ntrôl tâm boh, ndơ̆ rgâl công nghệ gay bar dak ndrel tĭng ƀư rgâl mbrô, rgâl nđĭr uĕh an dŭt ơm. Tâm ntĭm nti, hun hao tơm nuĭh kan, Groi Thủ tướng dăn đă: Bộ Công nghệ n’hanh Truyền thông Lào ân năl gĭt nău ŭch dŏng na nê̆, kan nsum đah Viện Hàn lâm Khoa học n’hanh Công nghệ Việt Nam rdâk njêng đề án têh gưl Chính phủ, njêng jâng nsing nâp gay ndrel tâm boh, ndrel hăn đah Việt Nam kalơ trong hăn rgâl mhe./.