Kêng măng 11/7, ta Hà Nội, Groi Thủ tướng Chính phủ Trần Lưu Quang pah kan đah N’gâng kan Khoa học n’hanh Công nghệ. Mbơh ta nar pah kan, Groi Kruanh N’gâng kan Khoa học n’hanh Công nghệ Lê Xuân Định an gĭt, tât rnôk aơ, ntŭk ntô pháp lý mpeh Khoa học công nghệ n’hanh rgâl mhe lĕ ntơm jêh đah 8 luật chuyên ngành.

N’gâng kan lĕ ndâk njêng, mbơh an Thủ tướng Chính phủ an trong ƀư hun hao khoa học công nghệ n’hanh rgâl mhe tât năm 2030 đah nău rƀŏng ndơ̆ khoa học công nghệ n’hanh rgâl mhe ngăn ngên geh nuih n’hâm hao jêng. Ta nar pah kan, Groi Thủ tướng Trần Lưu Quang tâm ban ŭch an geh du trong ƀư êng an khoa học công nghệ n’hanh ăp nuĭh ƀư khoa học công nghệ, lah rjăp an ndâk njêng jêh trong pháp luật rhŏ an mât uănh ngih dak n’hanh hun hao khoa học công nghệ. Hun hao n’hanh kơt dŏng têh dăng Khoa học công nghệ n’hanh rgâl mhe mĭn ƀư mhe an n’hao dơi geh, uĕh săk rnglăy, soan tâm rlong bah jâng wăng sa.