Kêng măng 1/8, ta ntŭk kan Chính phủ, Groi Thủ tướng Trần Lưu Quang hŏ vơt Groi Kruanh rđau kan gưl prêh ntŭk kan tâm boh lam ntur neh Nhật Bản (JICA) Yamada Junichi dôl khâl ndrel pah kan ta Việt Nam. Tâm nar vơt, bar ding tâm nchră tât ăp nau ntrŭnh ƀư nau kan du đê̆ nau kan ODA ta Việt Nam, Groi Thủ tướng Trần Lưu Quang lah rjăp, Chính phủ việt Nam dôl dŭt n’hâm nsôih doh rklaih nau jêr, nau nkol gay ntrŭt dăng nau ƀư kan aơ, đă mpeh Nhật Bản pă ODA ân du đê̆ nau nkra trong loih, ntrơn rgâl mrô, ntrơn rgâl ndrih ndrel rdâng đah nau rgâl mhe trôk nar ta Việt Nam.

Groi Kruanh JICA mbơh đah Groi Thủ tướng Trần Lưu Quang mpeh nau kơl an ODA tâm nau kan mhe ân Việt Nam tâm rơh tât, geh ăp rnoh prăk kơl an njrăng lor tâm nau geh nau khuch tât dak si nsum mpôl, nau khuch trôk nar lơh, kơl an ăp rnoh prăk manh bah nau tâm kơl tâm nklang ndrel kơl an prăk bah nŭih mât tơm gay nkuăl ƀư nau văng sa êng ƀư nau kan ngih vâl gung trong./.