VOV4.M’nông- “Ăp n’gâng kan, ăp ntŭk kan Trung ương an geh trong kan răng dăng gay ma ntrôl pă prăk ntuh kơl nsum, răng dăng gay ma ndâk nsơm nău du đê̆ nău nchrăp kan ê hŏ geh nchrăp na nê̆ sƀ rhŏ rnôk ndơ̆ nău nchrăp ntuh kơl nsum”. Aơ lah nău đă bâh groi Thủ tướng Vũ Đức Đam, kruanh rmôt kan mbrô 3 ta rơh rƀŭn nchră mpeh uănh nđôi, ntrŭt đă, doh rklaih ăp nău jêr, ntrôl dăng pă prăk ntuh kơl nsum năm 2022 rnôk pah kan đah ăp n’gâng kan, ntŭk kan Trung ương geh ƀư ta nar 17/5 ta Hà Nội. Tĭng nău mbơh tơih bâh n’gâng kan kế hoạch đầu tư, lĕ rnoh nchrăp prăk ntuh kơl tơm prăk ngih dak năm 2022 geh pă an ăp n’gâng kan, ntŭk kan Trung ương ta rmôt pah kan mbrô 3 lah 12.019 rmen prăk. Kơp tât lĕ khay 5, ăp n’gâng kan, ntŭk kan trung ương nchroh mbra pă prăk klâp ma 464 rmen prăk, geh 3,86% nău nchrăp ta năm 2022, đê̆ lơn rnoh geh nsum bâh lam dak lah 20,27%, tâm nĕ geh 13 ntŭk kan nchrăp pă an tơm prăk dŭt đê̆ ba dâng 10%. Nuĭh leo kan ăp n’gâng kan, ntŭk kan trung ương an lah, gay ma ntrôl pă prăk ntuh kơl nsum, an geh uănh nđôi, ƀư lôch ăp trong kan, nău kơl pháp luật mpeh ntuh kơl nsum, neh ntu, rdâk njêng n’hanh pháp luật geh tât tĭng di nău pă an, ƀư dơh ueh nău way ntuh kơl, pă prăk gay ma ngăch doh rklaih jêr jŏt, kŏ văk, ntrôl pă prăk ntuh kơl nsum.

Nuĭh rblang: Thị Đoắt