VOV4.M'nông: Nar 11/3, ta Hà Nội, Bộ Công an ƀư nkah ndray 25 năm Nar way ơm mpôl Cảnh sát ôp uănh nuĭh tih mpeh ma túy (12/3/2022) n'hanh wơt dơn Huân chương Chiến công hạng Nhất. Rlău 2 rach năm, lam rêng kan bah mpôl Cảnh sát ôp uănh nuĭh tih mpeh ma túy nar lơn ma têh dăng n'hanh hao jêng ta ăp ntil nău kan. Kơp ntơm bah năm 1997 tât aƀaơ, mpôl Cảnh sát ôp uănh nuĭh tih mpeh ma túy lam dak hŏ ban saơ, nhŭp kân rlău 290 rbăn tơ̆ nuĭh tih, rlău 460 rbăn nuĭh, nhŭp kân rlău 5 tấn thuốc phiện, bơi 82 tấn heroin, bơi 22 tấn ma túy tâm rlŭ, âk drăp ndơ geh rnoh khlay hang rbăn rmen prăk nôp ngân sách Ngih dak...Lah ta rơh lễ, Groi Thủ tướng Vũ Đức Đam lah kloh, pah kan njrăng, n'gang ma túy mô dơn lah nău kan êng bah mpôl Cảnh sát ôp uănh nuĭh tih mpeh ma túy, ma ân geh nău tât râng bah lam mpôl way kan, n'gâng kan geh tât, lĕ ma lam trong kan chính trị. Groi Thủ tướng dăn đă, tâm let năp tay, mpôl Cảnh sát ôp uănh nuĭh tih mpeh ma túy lam dak ân rgum ƀư jăp pah kan nsŏng kơl đah gưl ủy, n'gâng kan ăp gưl n'hao dăng pah kan rđău đă, gay rgum suan dăng bah lam trong kan chính trị n'hanh lam ƀon lan râng pah kan njrăng, n'gang ma túy./.

Nuĭh rblang: Điểu Thân