VOV4.Mnông- Ntoh ngơi ta rơh tâm mbơh pă jao nău kan njrăng rdâng nuh srê Covid-19 ta ntŭk ta kêng măng nar 17/2, wa Chử Xuân Dũng, groi kruanh UBND nkuăl ƀon têh Hà Nội an gĭt, rnâng kan nkuăl ƀon têh lĕ dơn ngoăy trong kan an oh kon se mầm non plơ̆ tay ngih nti bâh nar 1/3; ntŭk kan ntĭm n’hanh nti mĭn uănh, rdâk njêng trong kan, dăn đă, mbơh tơih mpeh nkô̆ nău aơ, tâm nĕ, nkah uănh tât ăp ntrong kan leo ƀư mât đăp mpăn, tâm di, săk rnglăy yơn lah mô jêr, mô geh nchâp đă nău ŭch nău rŏng bâh ƀon lan. Wa Chử Xuân Dũng đă ăp gâl kan, n’gâng kan, ăp ntŭk lăp pah kan nsrôih, uănh aơ lah nău kan dŭt khlăy, leo kan tâm rgop đah ngih nti mbơh tơih răng dăng tâm nău kan njrăng rdâng nuh srê, mât đăp mpăn leo nti đăp mpăn, mbơh tơih tâm ban nău kan ndơ̆ kon hoc plơ̆ tay ngih nti, geh nuĭh ƀon lan, ngih nti, kon hoc vơt dơn đah nău nsrôih rhơn.

Nuĭh rblang: Thị Đoắt