Ăp nar dŭt khay 5, mpông dak lêng Hải đoàn 129 ta nkuăl ƀon têh Vũng Tàu ueh lơn rnôk cán bộ, tahen, nŭih kan nchrăp nau mât njrăng ntŭk kan, mât dak lêng, gôl dak. Ăp cán bộ tahen rơh 9X yơn geh nau kan chính trị nâp bah dak lêng. Jŏ nar tâm dak lêng, đah âk nau ntul rlong, jêr jŏt ndrel n’ăp ma măng nar mâp nau khuch, yơn nsôih đah nuih n’hâm prêh. Thượng uý Hoàng Xuân Thành Lập, rđau duk 732 mbơh:

‘Ƀư nau kan tơm tâm rnôk mih nar mô ueh, dak lêng n’găng yơn dĭng lĕ tahen tâm duk mro ndơn nau kan, năl kloh nau kan gay tă bah nê ƀư jêh nau kan geh jao”.

 Trung uý Vũ Văn Trường, Kruanh ntŭk kan Cơ điện duk 746, Hải đoàn 922, Hải đoàn 129 nkoch: Tât pah kan tâm dak lêng, brih mih, n’hach, sial tât ndal, geh rnôk hôm rdâng ma nau khuch, yơn rhơn ngăn nơm lah tahen dak lêng, ăp cán bộ, tahen mro tâm nau nsôih tâm lơh, ndơn nau roh hoach ân nau kan mât nah dak, gôl dak:

 ‘Duk hên âk năm mro nkre ƀư nau kan ƀư tơm tâm dak lêng mpeh ba dâng nkre râng nau kan ƀư nkra dak pring. Bol ma nau kan tâm dak lêng jong nar mro, yơn năl nau kan bah nơm ndrel ƀư ueh nau mĭn kan ri ma cán bộ, tahen ƀư nau kan tâm dak lêng mro đăp mpăn pah kan, tâm dăch ndrel ŭch ƀư jêh nau kan jŏ jong ân rmôt. Gâp rhơn ngăn ndrel saơ nơm geh nau lap ngăn rnôk geh rgop n’hâm ân nau kan ndâk njêng ndrel mât neh dak tâm ao ndrih bah tahen dak lêng”.

Lah rmôt kan ƀư nau kan bah neh dak, tâm rgop văng sa, tâm nê nau kan neh dak lah nau tơm lah mât ăp nkuăl dak lêng geh pă, Hải đoàn ƀư rjăp nau kan, rmôt kan, ndơ dŏng mra tâm lơh tâm ăp gưl, mô ân ndrat, ndal lah geh tât nau. Êp nê, nau kan văng sa kŏ geh Hải đoàn 129 ƀư geh săk tam kơt ƀư nau kan dak pring, rnglăp ŭnh nar kloh tâm ăp gôl dak, ndrơng dak, nkra duk ndrel ăp ntŭk tâm dak lêng. Ngăn lah tâm ăp năm ep aơ, cán bộ, tahen Hải đoàn hôm ƀư nau kan nkra, nâp ăp ntŭk nthông tâm ngih ndrơng DK1 tâm dak lêng. Aơ lah du nhoat rlet rlau ngăn tâm nau ƀư rjăp nau kan ndrel ƀư nau kan bah nơm. Thượng tá Bùi Quang Tú, Kruanh Hải đoàn 129 lah rjăp: Gay nau kan geh dơi nau kan văng sa geh nsum ma nau kan neh dak tâm rnôk mhe, tâm âk năm ma aơ, Hải đoàn mro ƀư ueh nau kan, ngăch, blau mhe geh săk tam âk:

 ‘Gay ƀư jêh nau kan neh dak, văng sa, Hải đoàn ƀư ueh nau kan ntĭm nti tahen, ntĭm nti chính trị, mât rjăp nau chiăr nti, ndâk nau dơi chính quy, đăp mpăn nâp. Nchrăp ăp năn, tŏng ăp nau ŭch, kỹ thuật, tơm prăk kơl ƀư nau kan chính trị ndrel nau rêh, nau rƀŭn ân cán bộ bah rmôt. Bonh đă cán bộ, nŭih kan ƀư ueh nau kan, rgâl nau kan gay ma n’hao lơn ân săk tam nau kan, nau ê nkra tăch rgâl’.

Rnôk aơ, nau tâm dak lêng geh âk nau tât, nau kan bah Hải đoàn 129 nar lơn ma jâk yor nau kan ndrel ntŭk gŭ kan ndrel nau ngai, jong hvi, vay tâm nkah, jong nar tâm dak lêng, ndơ nchrăp, ndơ dŏng, ntŭk ntu ƀư kan mô tâm ban...ndrel ma nau vay ơm 45 năm hun hao ndrel têh jêng, Hải đoàn 129 hŏ mrô rlu têh jêng ndrel nau kan hun hao bah neh dak. Cán bộ, tahen, nŭih pah kan bah Hải đoàn mro ƀư ueh nau kan geh jao, nchrăp rklaih nau jêr, nsôih ƀư nau mhe, mât nâp tâm dak lêng geh ƀư nau kan. Nau kan ê nkra, tăch rgâl mro geh dơi nkô̆ nau nchrăp luh. Nau geh jêng ndrel săk rnglay năm ba kơi âk lơn năm bah năp, nau rêh bah cán bộ, tahen, nŭih kan, nŭih gŭ kan tâm ntŭk mô rlu hao prêh.

Ăp nau tă geh ma Hải đoàn ƀư dơi tâm rlau 45 năm ndâk njêng ndel têh jêng hŏ rgop nau kan ƀư rjăp nau dơi bah ntŭk kan tăch rgâl bah tahen mro leo nsĭt nau săk geh tâm lĕ 2 nau kan neh dak ndrel văng sa, nkre ƀư ueh lơn tay nau vay ơm “Tâm rnglăp, rklaih nau jêr, ƀư nâp nau mât dak lêng, ƀư jêh nau kan neh dak tâm rgop ma văng sa”./.