Tây Nguyên geh rnoh neh bri hon êng rlău 54.000km2, geh 16,8% rnoh neh bri hon êng lam dak. Rnoh nuĭh ta aơ aƀaơ lah rlău 5,8 rkeh nuĭh, tâm nĕ geh bơi n’gul lah nuĭh rnoi mpôl đêt. Năm bah năp, Đảng n’hanh Ngih dak dŭt uănh tât, ntĭm rđău đah âk nghị quyết, bôk nău kan gay mkra nău ntop kơl jay gŭ, neh gŭ, neh tuch tăm, jao an mât bri tâm nkual rnoi mpôl đêt n’hanh ăp nău kơl êng an hun hao wăng sa-rêh jêng nkual Tây Nguyên.

Bôl ndrĭ, tât aƀaơ, ta Tây Nguyên hôm e ăp nău mpeh neh ntu mô hŏ dơi mkra rjăp, dơh ƀư geh nău tâm pit, phah bri ƀư mir, joi lŭ choih, si gle mô tâm di... Êng kơt nău mât uănh, dŏng neh geh tu tơm mir ba, lâm trường, ntoh ngơi ta rgum nchră, wa Lương Thanh Bình-Groi Giám đốc N’gâng kan Tài nguyên Môi trường n’gor Gia Lai an gĭt: geh nău tâm pit neh đah rnăk jao mât n’hanh ăp ntŭk kan jao neh; nău nchoeng n’gang neh tuch tăm, jay gŭ bah nuĭh ƀon lan lăp neh mir, lâm trường quốc doanh; neh bri n’hanh neh tuch tăm jŏ năm bah nuĭh ƀon lan geh tâm srah, tăch chrai; âk ntŭk dơi jao neh, yơn dŭt âk lah neh mô hŏ dơi uănh nđôi, veh na nê̆, jêng mô dơi geh trong jao neh, jao bri, jêng tât nău neh nchlơi dơm, bri geh muih phah, mô lah an ƀon lan rŭn in, tuch tăm...

Wa Bình an gĭt, nău aơ jêng tât nău ƀon lan, lâm trường dơi jao rnoh neh têh, mô geh trok prăk manh neh, lŏ mô geh prăk an ntuh kơl, n’hâm soan nkra njêng mô âk. Tâm rnôk, du đêt ntŭk kan ŭch hun hao ăp nău nchrăp ƀư hun hao wăng sa ta nâm bri ri kol luật mpeh tâm rlong khlay an manh bri hon êng. Wa Lương Thanh Bình dăn đă du đêt nkô̆ nău geh tât Dự thảo Luật neh ntu (nkra rgâl):

“Tĭng gâp, aƀaơ an geh nău ntrŭnh tâm rgop nău mât uănh, njrăng n’gang bri, lơn lah bri hon êng đah hun hao tơm dak si gay n’hao săk rnglăy dŏng neh n’hanh n’hao nău geh bah bri hon êng. Đah ƀon lan rnoi mpôl đêt, gâp saơ, an n’hao rnoh kơp dơn dŏng neh đah neh ăp năm an ăp rnăk rnoi mpôl đêt, yor neh tăm si ăp năm, âk rnoh neh blak sât, tăm mbo, tuh, mô khlay. Lah ntrŭnh an 2 ha, ta rnoh neh nĕ an manh ri ƀon lan mbra mô ŭch ƀư sam ƀŭt kơp dơn”.

Ndrel đah nău rgop bah n’gor Gia Lai, rgum nchră dơn geh 11 nău rgop êng bah ăp đại biểu bah n’gor Kon Tum, Dak Lak, Dak Nông, Lâm Đồng n’hanh du đêt nuĭh khoa học, đại biểu quốc hội,... mpeh âk nău hôm e geh tât nău kơl neh gŭ, neh tuch tăm, neh bri ƀon lan mât; nău dŏng neh 5% bah nsum mpôl ƀon lan; nta an nău nău rêh ta nâm bri,... an dơi uănh mĭn tay, nkra rgâl.

N’glôn jêh rƀŭn nchră, wa Quàng Văn Hương-groi Kruanh Hội đồng dân tộc bah Quốc hội-uănh lah prêh ăp nău rgop bah ăp đại biểu. Yor n’hêl na nê̆ jêr jŏt, wăk kol ma ăp ntŭk mâp an n’gluh âk nău an mkra mpeh nău kơl, gay dôh rklaih, ngăn lah ăp ntrŭnh ntop tay geh khuch tât têh tât rnoi mpôl đêt; kơt Điều 17 mpeh nău kan bah Ngih dak mpeh neh ntu đah ƀon lan rnoi mpôl đêt; du đêt nău bah ăp Điều 52, Điều 175, Điều 178, Điều 179, Điều 180. Wa Quàng Văn Hương an gĭt:

“Nău mbơh bah ăp nuĭh way kan, nuĭh mât uănh, n’hanh dŭt tâm pă bah Hội đồng Dân tộc gay dơi saơ ăp nău tâm di n’hanh mô hŏ tâm di, jêr jŏt đah neh gŭ n’hanh neh tuch tăm an ƀon lan. Nĕ lah ăp nău kơl rƀŏng tât rnôk nkra rgâl Luật neh ntu rơh aơ. Đah ăp nău đă kơt nĕ, mpôl hên djăt, lah uĕh 12 nău rgop râng bah đại biểu. Mpôl hên săch nkô̆ nău khlay geh tât ăp nău ntrŭnh bah Dự thảo Luật geh nău ntoh măt tĭng nkual gay mĭn njêng n’hanh dăn đă ăp nău kơl an nkual ƀon lan rnoi đêt; tal 2 lah njuăl tât mpôl nchih rgum, gay geh nău tâm ban ŭch”.