Nar 19/5, Tổng Thư ký Quốc hội ƀư rơh hop báo mpeh nchrăp bôk nău kan rơh hop tâl 5, Quốc hội khoá XV. Rơh hop tâl 5, Quốc hội khóa XV mbra hop nchrăp lor n’hanh ntơm pơk rgum tâm nar 22/5, nchrăp n’glôch jêh tâm nar 23/6 tĭng trong ƀư hop rgum ta Jay Quốc hội.

Rơh hop tâl 5 dơi ƀư tĭng 2 rơh. Rơh bôk năp ntơm bah nar 22/5 tât nar 10/6. Rơh 2 ntơm bah nar 19 - 23/6 (jêng lah ntơm bah nar 11 -18/6, Quốc hội rlu gay ăp nhih pah kan bah Quốc hội, Chính phủ n’hanh ăp nhih pah kan geh nău dơi kan geh mông nar dăp rgum, rgâl di tay, lôch jêh trong nchrăp luật, trong nchrăp Nghị quyết). Nchrăp ƀư tâm nar pah kan bah Rơh hop lah 22 nar". Ta rơh hop dja, Quốc hội mĭn ŭanh, an dŏng 8 trong nchrăp Luật, 3 trong nchrăp Nghị quyết. Bah meng nê, Quốc hội mbra mĭn ŭanh, an nău rgop mpeh ăp siƀŭt mbơh mpeh kơi ntop ŭanh năl tay  jêh geh tĭng ƀư trong nchrăp hun hao wăng sa- rêh jêng kon nuĭh n’hanh ngân sách ngih dak năm 2022; nô nău tĭng ƀư hun hao wăng sa- rêh jêng kon nuĭh n’hanh ngân sách ngih dak ăp khay bôk năm 2023…