Nơm geh nău kan nsum lhăt đah ăp nhih pah kan, nsum mpôl n’hanh nău dâk kan êng bah nuĭh ƀon lan, nô nău tât rmanh ta kon se ta nkuâl Di Linh, n’gor Lâm Đồng hŏ geh ăp nău rgâl uĕh tâm năm 2024. Ăp trong njrăng n’gang dơi an ƀư ăp kôp, rgop âk tâm nău  mât njrăng n’hâm suan n’hanh đăp mpăn an kon se.

Tâm 6 khay bôk năm aơ, Trung tâm y tế nkuâl Di Linh, n’gor Lâm Đồng hŏ wơt rlău 250 kon se rmanh, tâm nê rlău du n’gul lah rmanh tâm tom ndeh. Bác sĩ Lê Công Tuấn, Groi Giám đốc Trung tâm an gĭt, nơm geh nău kan nsum bah âk đơn vị, nô nău tât rmanh kon se, lơn lah rmok dak hŏ hŭch âk .

“Tâm năm 2024 dja nô nău tât rmanh kon se ta nkuâl Di Linh hŭch rđĭl đah ăp năm bah năp nơh, tâm tom ndeh âk rlău 50%. Nơm geh kan nsum uĕh đah nhih nti, nkoch trêng kon se lơn ir hăn ncho ndeh, nuĭh ƀon lan geh ndơ uănh khlay tât oh kon lơn jêng ăp nău tât rmanh gŭ rêh n’hanh nău tât rmok dak hŭch âk lơn đah ăp năm bah năp nơh.”

Đah nău mha êng âk dak me, dak diăng, dak n’glău n’hanh dak bât, gay njrăng n’gang bah rmok dak, ăp đơn vị, mpôl kan ta nkuâl Di Linh hŏ nchih mpăng âk ta ăp dak bât, dak n’glău; ao đông, tơm si, rse, kât ƀư mpun…ta ăp n’glău dak bât. Nkoch trêng rgŏ jă nuĭh ƀon lan lor nchrăp ƀư mpêr n’gar n’glău dak bât jê̆ bah rnăk wâl. Tĭng wa Ninh Thị Một, Kruanh rmôt Tổ dân phố 17, Thị trấn Di Linh, nkuâl Di Linh, lôch rnôk nkoch trêng rgŏ jă ri nuĭh ƀon lan tĭng ƀư jăp êng, tĭng ƀư trong njrăng n’gang rmok êng ta jay.

“Lôch rnôk nkoch trêng ri kônh wa hŏ sŏk êng prăk gay rvăt ndơ sĭt ƀư rse ao đông tâm n’glău, gay geh ăp trong njrăng n’gang, rdâng lơh rmok dak tĭng trong ntĭm nti bah Ban rđău đă njrăng, n’gang rmok dak thị trấn”.

Yuh Lưu Thị Thủy Chung, ta tổ dân phố 17, Thị trấn Di Linh, nkuâl Di Linh, n’gor Lâm Đồng an gĭt, rnăk yuh geh kuĭh du n’glău dak jru 10 mét tâm mir gay dŏng tŏ djrah. Gay đăp mpăn, yuh hŏ n’gar wăr kiău ma, ƀư mpông ntĭl gay bah ir geh nuĭh luh lăp, der bah geh nău tât geh rngot klâng.

“N’glău dja gâp ƀư gay dŏng tŏ djrah, jêng ăp yơ̆ mpeh bu ur tât ntĭm nti kât an đông n’hanh kât jâng ndeh sat gay nkhêp geh nuĭh tŭp ri puăl tâm rse nê an tât geh nuĭh hăn kơl. Hôm wăr n’glău dak ri geh n’gar wăr n’hanh ƀư mpông gay bah ir geh nuĭh luh lăp klach rvê. Rnôk geh nău ŭch dŏng ri mơ pơk mpông lăp”.

Nău nti re n’hanh ntĭm nău blău rêh tâm dak an kon se dơi nkuâl Di Linh uănh khlay an ƀư đŏng. Tâm khay rlu nti mhe  aơ, hŏ geh bar pe jât jrô nti re an ăp kon se ta ăp xã, thị trấn. Tĭng wa Hà Thị Thùy Linh, Kruanh Hội Liên hiệp bu ur nkuâl Di Linh, n’gor Lâm Đồng, lah nuĭh kan tâm mpôl rđău đă, hội bu ur ăp gưl lah mpôl kan n’gâng tơm râng nkoch trêng n’hao nău gĭt njrăng n’gang tât rmanh, rmok dak ta kon se.

“Kan nsum đah ăp n’gâng kan, nsum mpôl ta ntŭk râng ăp nău kan nkoch trêng tâm dâng, gay pơk ăp jrô kơi năp nti re an kon se hội viên bu ur tâm lam nkuâl. Bah nê gay n’hao nău gĭt blău an bu ur n’hanh kon se, rgop đăp mpăn nău rêh uĕh lăng, kloh rsang. Nta trong dơh an kon se geh ntŭk gŭ rêh đăp mpăn lan lĕ rngôch lơn”.

Ăp jrô nti re dơi pơk hŏ kơl kon se năp tay nău blău đăp mpăn gŭ rêh tâm dak tâm ban kơt tiăr nti n’hâm suan n’hanh geh ăp nău kan rhơn mƀak, uĕh blău tâm khay rlu nti. Oh Nguyễn Thiên Di, 13 năm deh ta xã Liên Đầm, nkuâl Di Linh, n’gor Lâm Đồng, lah:

“Gâp nti re hŏ 2 pơh hôm, dơi ăp nai ntĭm nti re. Tâm khay rlu nti gâp hăn nti re gay njrăng bah rmok dak n’hanh n’hao dăng n’hâm suan an săk nơm”.

Oh Trịnh Ngọc Bảo Châu, 12 năm deh, ndrel gŭ ta xã Liên Đầm an gĭt:

“He nti ăp nău blău re nê gay nkhêp geh prah tâm tâm n’glău, dak me, dak diăng mô lah ăp ntŭk n’glău re jru he njơl jâng mô tât ri he mbra dŏng nău blău nti nê gay re hao kơh”.

Đah nău lăp kan bah n’gâng kan ta ntŭk n’hanh ăp mpôl kan nsum mpôl, nô nău tât rmanh ta kon se ta nkuâl Di Linh hŏ geh ăp nău rgâl uĕh, nta trong dơh an ăp kon se dơi pâl rlưn, hun hao ngăch dăng n’hâm suan.