VOV4.M'nông: Ngai đah nklang n'gor Kon Tum rlău 100 km, Đăk Glei lah nkuâl n'har bri dŭt ach o n'gor, đah bơi 90% lah nuĭh rnoi mpôl đê̆, 11/12 xã, thị trấn mpeh săk dŭt jêr jŏt mha êng. Nơm geh tĭng ƀư jăp pah kan rdâk njêng đảng viên ta nkual rnoi mpôl đê̆, Đăk Glei hŏ mât uĕh nău way ơm cách mạng, rdâk njêng nkual n'har bri đăp mpăn rnă njrăng chính trị, đăp mpăn lam rêh jêng kon nuĭh. Ăp đảng viên way lah ăp găr ntil n'gâng tơm, leo lor bôk năp tâm ăp trong leo ƀư rŏng dak.

         Đah ƀon lan Đăk Ga, xã n'har bri Đăk Nhoong, nkuâl Đăk Glei, n'gor Kon Tum, rnôk ăp tơ̆ Chi bộ n'glăp đảng viên mhe lah nar khlay nsum bah lam ƀon. Aƀaơ, Chi bộ ƀon Đăk Ga geh 25 đảng viên n'hanh lĕ rngôch lah nuĭh Giẻ- Triêng. Nô A Cu, Chi ủy viên, kruanh thôn an gĭt:

      “Lăp Đảng dŭt rhơn n'hao êng săk. Rnôk lăp Đảng săk he nơm rgâl dŭt âk. He tât dơi đah âk ntil nău uĕh, nău blău, nău khlay ntơm bah nê he trêng nti tay an kônh wa tâm thôn. Đảng viên lah he leo lor trong kloh ang leo kônh wa hun hao wăng sa. Lơn lah aƀaơ rgâl nău mĭn, nău kan he ân mĭn luh trong kan mhe, nău uĕh blău. Nău way ơm rluk mâl mbrơi mbrơi jut jăng, nău way ơm uĕh lăng ri he mât tay. He lah du hê nuĭh kruanh thôn ri he rgŏ jă kônh wa ƀon lan hun hao wăng sa rdâk njêng rnăk wâl đăp mpăn rhơn răm".

        Xã n'har bri Đăk Nhoong dơi Huyện ủy Đăk Glei rnê lah ngoăy tâm ăp nkuâl ƀự jăp pah kan hun hao Đảng nkual rnoi mpôl đê̆. Aƀaơ Đảng bộ xã geh 184 đảng viên, tâm nê geh 156 đảng viên nuĭh rnoi mpôl đê̆. Prao khay bôk năm aơ, xã hŏ geh  tay 8 đảng viên mhe. Wa A Nang, Groi Bí thư Đảng uỷ xã Đăk Nhoong lah rjăp, tâm năm aơ nklăp Đảng bộ xã ƀư lôch jêh rnoh tât geh n'glăp 15 đảng viên mhe. Ngoăy tâm ăp nău tă ơm gĭt kan bah Đảng bộ lah rnôk uănh năl ƀư hồ sơ ân đăp mpăn ngăch n'hanh tâm di:

        “Rnôk Chi bộ uănh năl hao mbơh dăn bah lơ mpôl hên uănh lơn lơn ma ơm lơn ma uĕh. Mpôl hên hop Ban Chấp hành ăp khay du hê, bar hê nuĭh mpôl hên hao ndơ̆ gưl bah lơ. Ăp nuĭh bah kơi saơ ƀư ngăch, uănh năl di jêh aơ tay bu nsrôih lăp tâm Đảng âk lơn. Lah he an nkrâm jŏ hồ sơ ntŭk dja du pơh, bar pơh, ntŭk di du pơh, bar pơh, mbra roh lĕ ma năm mô hŏ dơi ƀư lôch jêh".

        Đăk Glei lah ngoăy tâm 3 nkuâl geh nău rêh wăng sa dŭt jêr jŏt bah n'gor Kon Tum, lam nkuâl geh bơi 90% lah nuĭh rnoi mpôl đê̆. Nơm geh tĭng ƀư jăp pah kan rdâk njêng đảng ta nkual rnoi mpôl đê̆, tât aƀaơ nkuâl geh rlău 2.700 đảng viên, tâm nê, rlău 1.800 đảng viên lah nuĭh rnoi mpôl đê̆, âk rlău 66%.

        Wa A Phương, Groi Bí thư Huyện uỷ Đăk Glei an gĭt, Huyện ủy êng uănh khlay mât chăm, dăp rgum mpôl kan Đảng tâm dâng n'hanh hun hao đảng viên ta ăp thôn ƀon. Ntơm bah ăp nău kan tâm dâng ngăch năl saơ, kơi năp nti nuĭh ntoh lư gay n'glăp tâm Đảng n'hanh ndrel đah nê lah mât nău nsing nơm, nău rŏng bah ƀon lan rnoi mpôl đê̆ đah Đảng:

        “Mpôl hên tâm pă ăp nuĭh lah Thường vụ Huyện ủy, lôch nê tât gưl ủy mât uănh ƀon lan jŭr tât ta nê gay rƀah gĭt nău lư ntĭm nti, tĭng groi nđôi ăp nuĭh rnoi mpôl đê̆ ntoh lư. Đảng viên lah ăp nuĭh dâk  lor bôk năp, lah ăp nuĭh ntĭt leo lor an nsum mpôl ƀon lan kơt tĭng. Nău nsrôih lăp tâm Đảng, lơn lah nkual căn cứ cách mạng khân păng ŭch lăp tâm Đảng gay rhŏ dŏng an ƀon lan, rhŏ dŏng an ƀon tơm neh dak, yor me bơ̆ khân păng kăl e nơh lah nuĭh tă râng cách mạng đŏng”.

        Đah âk trong ƀư, kơt năl saơ ăp nuĭh ntoh lư gay kơi năp nti, ƀư ngăch  hồ sơ nuĭh dăn lăp tâm Đảng; leo ƀư pơk jrô kơi năp nti nău gĭt blău êng mpeh Đảng tĭng rkŭm xã…, tâm năm kan 2015-2020, Đảng bộ nkuâl Đăk Glei n'glăp geh 700 đảng viên mhe, rlău 200 đảng viên rđĭl đah rnoh ŭch tât ndơ̆  luh. Năm kan 2020-2025, Đảng bộ nkuâl ndơ̆ luh rnoh ŭch geh n'glăp 600 đảng viên mhe. Tâm năm lor bôk năp tĭng ƀư Nghị quyết, Đăk Glei hŏ n'glăp geh 143 đảng viên mhe. Nsing nơm tâm năm kan dja, Đảng bộ nkuâl Đăk Glei mbra dơi tât n'hanh rlău rnoh ŭch geh n'glăp Đảng, tâm nê geh ŭch rnoh tât n'glăp đảng viên nuĭh rnoi mpôl đê̆. Ngăn an saơ ăp đảng viên nuĭh rnoi mpôl đê̆ ta nkuâl Đăk Glei, n'gor Kon Tum lah tơm bôk ntĭt leo tâm hun hao wăng sa rêh jêng kon nuĭh, rdâk njêng nkual n'har bri nar lơn ma hun hao đăp mpăn rhơn răm./.

Nuĭh rblang: Điểu Thân