Ôi 4/9, ta nkuăl ƀon têh Pleiku, N’gâng kan tăch rgâl điện tử ndrel văng sa mrô, Bộ Công thương tâm rgop nsum ma Sở Công thương n’gor Gia Lai ƀư “rƀŭn nchră ntrŭt dăng nau tâm rgop bah nkuăl tâm nau hun hao nau kan tăch rgâl điện tử ăp n’gor bah nkuăl Tây Nguyên. Rơh tâm nchră gay kơl an ăp n’gor Tây Nguyên n’hao nau dăng ntrŭnh ƀư Bôk nau kan Hun hao nau tăch rgâl điện tử neh dak lvang năm 2021-2025, rƀŏng tât hun hao nau kan tăch rgâl điện tư nâp nâl. Rnôk aơ, n’gor Gia Lai geh 224 ntil ndơ OCOP geh leo tăch trong điện tử. Ăp ntil ndơ aơ geh tăch hŏ kơl an ntŭk kan hun hao geh tay 20% rđil bah năp nê.

Ta rơh rƀŭn, ăp ntoh măt hŏ mbơh nau kol, nau ê dơi mpeh ntŭk ntu, trong kan Logistics, nŭih pah kan blau ndrel nau mơng dŏng bah ƀon lan hŏ ƀư trong kan tăch rgâl điện tử ta Gia Lai lah êng ndrel ăp n’gor bah Tây Nguyên ê hun hao tâm ban ma nau reh dơi. Bol ma âk nau kol ndrel nau ê dơi, yơn Gia Lai lah êng, Tây Nguyên lah nsum hôm geh nau dơi gay ntrŭt dăng nau kan tăch rgâl điện tử hun hao ngăch tâm rơh tât./.