Lơ 18/4, rơh rƀŭn tâm nchră hun hao ntĭm nti nkuăl Đông Nam Bộ tât năm 2030, rƀŏng tât năm 2045 ndrel ntrŭnh ƀư nau ntrŭnh mrô 24 bah N’gâng kan chính trị mpeh hun hao nkuăl Đông Nam Bộ geh ƀư ta Bình Dương, yor N’gâng kan ntĭm nti ƀư. Râng rơh rƀŭn geh Groi Thủ tướng Trần Hồng Hà ndrel rđau kan bah ăp n’gâng kan, ntŭk kan Trung ương. Ntoh nau tâm nar rđau rƀŭn, Groi Thủ tướng Chính phủ Trần Hồng Hà lah rjăp, Đông Nam Bộ lah ntŭk kan tơm hun hao, lah bôk trong leo lor têh mpeh ăp ding, nau tă geh aơ geh nau rgop têh ngăn bah ntrong kan ntĭm nti.

Groi Thủ tướng Chính phủ đă N’gâng kan ntĭm nti tâm rgop nsum đah ăp ntŭk kan, nkuăl ndrel mĭn mpeh nau hun hao ntĭm nti tĭng nuih n’hâm nau ntrŭnh mrô 24 bah N’gâng kan chính trị. Tă bah nê, rgum ân ngăn mpeh nau kan hun hao ntrong ntĭm nti, tâm di đah nau geh dơi bah ăp n’gor tâm nkuăl Đông Nam Bộ, ân geh ndâk njêng ta aơ du đê̆ ntŭk ntĭm nti, ba lơ đại học, ntuh kơl tâm ăp nau kan mhe, ndâk ăp ntŭk kan ƀư nau ntrơn rgâl nau blau ueh mhe./.