Nar 17-5-1958 jay sàn Wa Hồ tâm nkual Nhih pah kan Kruanh dak, Hà Nội dơi ƀư lôch jêh tâm rnôk nkah ndray 68 năm Nar deh Kruanh Hồ Chí Minh (19-5-1958). Wa hŏ gŭ n’hanh pah kan ta aơ tâm 11 năm, ntơm bah 17-5-1958 tât 17-8-1969. Du bông 65 năm aơ, jay sàn ƀơch rgơm bah meng n’glău dak rsang, nklang mir tơm play n’hâm nđik hŏ jêng rup gui way bên, lah nău ntĭt an rnoh khlay nuih n’hâm uĕh lŏng, nău mĭn n’hanh trong gŭ rêh dŭt n’hâm kloh rsang bah Kruanh Hồ Chí Minh. 

        Jay sàn ƀơch rgơm nklang thủ đô Hà Nội lah ntŭk Wa Hồ gŭ rêh n’hanh pah kan dŭt jŏ tâm nău rêh nău kan cách mạng bah he. Ta aơ hŏ uănh saơ mô gĭt dah âk nar kan têh khlay kăl e, geh  nkô̆ hôr dŭt têh tâm ăp rnôk n’glĕ dŭt bah nău rêh cách mạng bah Wa. Ta jay sàn dja, tâm ăp năm Mỹ ntŭp lơh rgŭt n’gĭng miền Bắc, nar 17/7/1966, Wa Hồ hŏ nchih nău kuăl jă ƀon lan nsrôih rlăch ndăng Mỹ lăp tŭn jot. Ta aơ đŏng, ntơm bah năm 1965 tât năm 1969, Wa hŏ rong an mông nar nchih Di chúc lịch sử an tay rmưn rbăn nău rŏng an lam ƀon lan, lam Đảng, lam tahen, an ăp kon său n’hanh oh bê̆ kon se. N’hanh bah ntŭk dja đŏng. Wa hŏ roh hăn tĭng drô phan. Tă geh 4 năm dơn ƀư mât njrăng Wa n’hanh rlău 30 năm bah kơi nê nkre đah pah kan mât ndray, ntô̆ n’hao drăp ndơ ơm yău Hồ Chí Minh ntlơi an tay tâm Nkual nhih pah kan Kruanh dak, wa Trần Viết Hoàn, Giám đốc ơm Nkual têl ơm yău Kruanh Hồ Chí Minh ta Nhih pah kan kruanh dak lah rjăp:

“Jay sàn Wa gŭ pah kan 11 năm, aơ lah rơh n’glêh an săk rêh bah Đảng n’hanh neh dak. Wa đah nău ƀư lah Kruanh mbăk anh jâk nău dơn kan. Ta aơ mô geh hĭng ntơr prah maih mblar, yơn jay sàn bah Wa hŏ lăp tâm jêng nău nkoch. Jay sàn bah Wa dơn geh bar pe jrô bĭch dơm, ma tâm rnôk nuih n’hâm bah Wa rơh rơh mhe ri jay jê̆ nê lhêt lhơt sial n’hanh chrat ang ŭnh, n’hŭm ƀô bah ntil kao nuĭh. Ta trôm jay dja, Wa Hồ âk măng mô lhăk bĭch gay mĭn rvê mpeh cách mạng Miền Nam, mĭn mpeh cách mạng Miền Bắc n’hanh mĭn mpeh tâm rnglăp dak bah dih. Ăp năm gŭ ta aơ wa Hồ hŏ tor luh gung trong lơh, trong nchrăp weh ƀư lam lĕ rngôch geh nău dơi ngăn gay đăp mpăn ndơ̆ cách mạng Việt Nam hăn bah nău dơi dja tât nău dơi êng ƀa ƀă.

          Giáo sư Hoàng Chí Bảo ri an lah, jay sàn mpơl dŭt kloh trong gŭ rêh kloh rsang n’hanh mô nkơnh nău geh bah Wa:

          “Nău mô nkơnh geh ndơ lah nău ntĭt mha êng dŭt ntoh lư an trong gŭ rêh Hồ Chí Minh. Lĕ du bông nău rêh bah Wa rlău 60 năm ƀư cách mạng mô gĭt dah âk mbăk anh jâk ŏ r’ah kalơ mblik bah wa ma Wa mô nkơnh geh đêt du blah kho ao kaki hŏ blak nar sa, bah ntơm tât roh tĭng drô phan hôm nsoh du blah kho ao ka ki blak nar sa kơt nê đŏng, jep ntô cao su hŏ lăp jêng nău nkoch n’hanh lịch sử, ăp ndơ ndray huêng khlay bah lịch sử  păng mpơl săk trong gŭ rêh Kruanh Hồ Chí Minh- du kon nuĭh tâm ban kơt nuĭh ƀon lan ngăn dơm.

        Aƀaơ, jay sàn gŭ tâm trôm Nkual têl ơm yău Kruanh Hồ Chí Minh ta Nhih pah kan kruanh dak hŏ “jêng ntŭk tât khlay”, ntŭk rgum  nău tâm rŏng bah ƀon lan Việt Nam n’hanh ăp nuĭh ŭch rŏng đăp mpăn bah tâm lơh tâm su lam ntŭr neh. Tổng Bí thư Nguyễn Văn Linh tă lah: Wa hŏ lơp chrêk luh du suan ntrôl dŭt dăng n’hanh nău rêh đah trong rƀŏng geh ndrŏng mô geh nău hưp, ach o jêr jŏt mô  dơi rgoh n’gơ, nău kan têh kuâng mô dơi ƀư chuh chŭn đah nuih n’hâm jăp gơih, mpêt nkrem, nuih n’hâm kloh srang, mô rvan geh an êng nơm, yor an ma nău kan nsum. Wa rêh du nău rêh kloh rsang n’hanh mô nkơnh n’hơ. N’gâng kan, nău mĭn n’hanh nuih n’hâm uĕh lŏng chrat ang bah Wa rêh mbro tâm nuih dêh rŏng dŭt n’hâm bah ƀon lan Việt Nam”. Rnôk Tổng thống Nga Pu-tin, kruanh mât bôk neh dak lor bôk năp bah rôk năm 21 tât khâl ntŭk gŭ bah Hồ Chí Minh hŏ nchih tay: “Gâp ŭch ngăn rnôk dơi ƀư bên đah nău rêh bah nai têh kuâng bah ƀon lan Việt Nam. Du hê nuĭh ma săk lư hŏ nkah an tay tâm lịch sử lam ntŭr neh”