VOV4.M’nông: Khay bah năp, âk nuĭh druh ndăm ta n’gor Gia Lai lĕ geh nău tih công nghệ mhe tă bah mạng internet mplư rlăm, dŭ ndơm hăn Campuchia pah kan tâm trong rlăm, jêh nĕ đah mê̆ bơ̆ njuăl hang rhiăng rkeh prăk gay choai săk. Công an n’gor Gia Lai ntĭm lah nuĭh ƀon lan an njrăng đah ăp nău rlăm mhe bah mpôl dŭ ndơm.

Tâm jay sat ta tổ 4, nkuăl têh Kon Dơng, nkuăl Mang Yang, n’gor Gia Lai, yuh N.T.L luh hoch dak măt rnôk nkah tât kon bu klô Đ.V.T (15 năm deh) aƀaơ mô hŏ gĭt khĭt rêh m’hâm geh. Yơn ŭch joi prăk kơl me bơ̆, dŭt khay 3 năm aơ, tĭng nău mbơh tâm mạng xã hội, T. ncho ndeh hăn nkual ƀon têh HCM, jêh nĕ dơi 1 rmôt nuĭh ndơ̆ hăn Campuchia pah kan. Nklăp n’gul khay 4, T.kuăl điện njuăl nău tă bah Zalo nkoch, ăp nuĭh ta aơ nchâp T. tă bah mặng xã hội nsŭk nuĭh Việt hăn Campuchia pah kan. Lah jêh, đah ăp nuĭh, T. mbra dơi an prăk 30 rkeh.

Mê̆ bơ̆ T.klach rvê an nău đăp mpăn bah kon bu klô gŭ ta ntŭk bu

10 nar bah kơi, T. njuăl nău mbơh đă rnăk wâl kơl njuăl 150 rkeh prăk lăp tài khoản moh săk Quách Thanh Tùng gay oh dơi m’ơk sĭt. Dŭt ach o, tât aƀaơ, ur sai yuh L.mô hŏ dơi joi rnoh prăk gay choai kon:

“Rnăk wâl jêr jŏt, mô geh prăk an njuăl, kon gâp nchih tâm zalo lah đah ri lơh, mô an kon gâp sa 2 nar. Aƀaơ đă công an Việt Nam, Campuchia, lãnh sự quán kơl kon gâp sĭt Việt Nam đăp mpăn”.

 Trung tá Đinh Văn Sơn-Groi kruanh Jrô kan Rnă njrăng mạng n’hanh jrô kan rchăng n’gang nău tih dŏng công nghệ cao (Công an n’gor Gia Lai) an gĭt, mô tât 6 khay bôk năm 2022, ntŭk kan lĕ dơn 43 nău mbơh geh mplư rlăm tă bah mạng, đah dĭng lĕ rnoh prăk khuch tât rlău 26 rmen prăk. Rlău ma ăp trong dŭ ndơm bah năp đaơ kơt săch pah kan tăch ndơ, jă ntuh kơl prăk rlăm, rlăm cán bộ mbơh rmal dôih..., ri aƀaơ geh tay nău dŭ ndơm mhe lah rlăm pah kan ta Campuchia đah prăk khay ăp khay 800 tât 1000 đôlar.

Tĭng nău mbơh rblang bah du đêt nuĭh, rnôk hăn Campuchia, khân pơng dơi ndơ̆ rêh tâm ăp jay chung cư bah nuĭh Trung Quốc mât uănh. Nău kan ăp nar lah tă mạng xã hội kuăl điện sĭt Việt Nam rlăm nuĭh tâm dak đah ăp trong ƀư săch nuĭh pah kan tăch ndơ, kuăl jă ntuh kơl, nsŭk nsôr dŭ ndơm pah kan ta Campuchia... Lah mô geh rnoh đă, khân pơng mbra rmal đêt ngăn 1000 đôlar, geh lơh dông, mô an sa jêh nĕ đă kuăl điện thoại an me bơ̆ choai săk.

Nău rêh ach o jêr jŏt bah T.

Trung tá Đinh Văn Sơn đă nuĭh ƀon lan an rlăp njrăng bah năp ăp nău jă pah kan n’gơch prăk khay âk tâm internet, gay dêr ăp nău dŭ ndơm bah nuĭh tih dôih:

“Nuĭh ƀon lan geh nău ŭch joi kan, an joi na nê̆, ŭch joi nău kan ta dak bah dih ri tă bah ăp ngih pah kan N’gâng kan Lao động Thương binh n’hanh xã hội gay geh nău ntĭm, mbơh tơih na nê̆. Ăp rnăk geh oh kon dôl ta rnoh năm deh pah kan ri an geh nău nkoch, tâm rgop gay joi nău kan tâm di, dêr geh ăp nău dŭ ndơm, mplư rlăm”.

          Nuĭh rblang: Y Sưng Phê Ja