VOV4.M'nông: Ta năp nô nău n'gơ neh, geh mbro ta nkuâl Kon Plông, n'gor Kon Tum, Groi Thủ tướng Lê Văn Thành hŏ jao an Bộ Khoa học n'hanh Công nghệ ƀư tơm hăn ôp  uănh nkô̆ nău, rnoh jru hô n'hanh geh ma nău tât khuch n'hanh mbơh gay n'gâng kan ƀon lan gĭt lor nchrăp rdâng lơh tâm di, der bah ƀư phit klach tâm ƀon lan. Tâm pơh, Ƀan rđău đă gưl neh dak mpeh njrăng, n'gang trôk nar lơh hŏ leo mpôl hăn pah kan tât Kon Tum gay uănh năl ngăn ngăn, nkre an ƀư pah kan nsum tâm trong rdâng lơh đah n'gơ neh.

Mpôl hăn pah kan bah Ƀan rđău đă gưl neh dak mpeh njrăng, n'gang trôk nar lơh hŏ tât joi gĭt nău ngăn geh ta Nhih máy n'hanh nkual n'glău dak bât thủy điện Thượng Kon Tum ta 2 xã Ngọc Tem n'hanh Đăk Tăng bah nkuâl Kon Plông. Đah rnoh dăng weh ƀư 220MW, rnoh âk n'glău n'gâr rlău 145 rkeh m3 dak, dak bât thủy điện Thượng Kon Tum dôl dơi uănh lah nkô̆ ƀư jêng tât ăp rơh n'gơ neh mhe aơ ta nkual dja.

Mbơh đah mpôl hăn pah kan , wa Trần Công Đàm, Giám đốc Công ty Thủy điện Thượng Kon Tum, mpeh Chi nhánh Công ty Cổ phần Thủy điện Vĩnh Sơn- Sông Hinh mbơh, thủy điện dơi weh ƀư rdâng dơi rơh n'gơ neh dăng gưl 7. Nar 26/2/2020 thủy điện ntơm ƀư nkrŭl dak. Tât nar 20/11 ndrel năm hŏ nkrŭl tŏng bêng dak.

        Lôch bơi 1 năm tât nar 8/2/2021 nhih máy ntơm năl geh n'gơ neh. Tâm nklăp ntơm bah khay 2 tât khay 5/2021 ntoh dŭt âk tơ̆ n'gơ neh lôch mbrơi srang tâm khay 6, mô hôm ntoh tâm khay 7, khay 8, tât n'gul khay 9/2021 ntoh n'gơ tay n'hanh đah rnoh srêt tâm khay 3 n'hanh khay 4 năm 2022.

        Êng nar 18/4 mhe aơ geh rơh n'gơ neh dŭt têh bah ntơm tât aƀaơ đah 4,5 độ richter. Ta rơh n'gơ neh n'glău n'gâr dôl nkrŭl geh 106 rkeh m3 dak, tơm n'gơ neh gŭ jru tâm xã Hiếu n'hanh Pờ Ê, nkuâl Kon Plông ngai đah nhih máy rlău 14km n'hanh ngai đah n'glău n'gâr 25km. wa Trần Công Đàm ndơ̆ luh nău lah:

       “Lôch rnôk hăn ôp uănh đah năl na nê̆ ri ăp rơh n'gơ neh dja mô nsing tâm rnoh âk nkrŭl dak. Công ty geh kan nsum đah Viện Vật lý địa cầu ntrŭp 3 trạm weh wăr dak bât thủy điện Thượng Kon Tum gay weh năl neh ntu. Lôch ăp tơ̆ geh n'gơ neh ri Công ty ƀư hăn uănh năl dak bât da dê, dak bât mô saơ geh ntil khuch”.

        Nău rgop bah nuĭh ntơh măt Bộ Công thương, Bộ Xây dựng, Tập đoàn Điện lực Việt Nam, Công ty Cổ phần Thủy điện Vĩnh Sơn- Sông Hinh n'hanh ăp nuĭh rnâng kan hăn ndrel Mpôl pah kan geh du nău mĭn nsum da dê, nê lah nău ntrŏng gĭt kloh nkô̆ ƀư jêng tât n'gơ neh, ân tĭng  ƀư ndăn ngăch dĭl, yơn ân njrăng na nê̆ nsing kalơ khoa học. Ta năp măt Công ty Thủy điện Thượng Kon Tum kan nsum đah Viện Vật lý địa cầu kơp nđăp, gŭ mĭn ntrŭp tay du đêt ndơ weh năl. Đah 3 ntŭk ntrŭp hŏ ƀư lôch jêh dĭl geh nău dơi nthoi ƀoh sŏng tât Viện gay mbơh gĭt nău lư năn ngăch, di ngăn ngăn. N'gâng kan nkuâl Kon Plông n'hanh n'gor Kon Tum ân geh trong rdâng lơh đah nău tât jăch ndăn. Nău nkrŭl dak bât thủy điện Thượng Kon Tum tâm let năp tay ân mĭn uănh di na nê̆...wa Nguyễn Đức Quang, Cục trưởng Cục rdâng lơh n'hanh nkra bah trôk nar lơh, Groi Chánh Văn phòng rnâng kan ƀan rđău đă gưl neh dak mpeh njrăng, n'gang trôk nar lơh, Kruanh mpôl hăn pah kan geh nău rgop:

        “Mô hŏ geh nuĭh dơi lah n'gơ neh ta aơ lah tă bah dak bât thủy điện mô lah n'hong dak bât yơn ma an saơ lah rlău ăp rnoh nchih rgum ri nău hao âk tơ̆ mbro n'hanh rnoh dăng n'gơ mhe aơ ri geh nău tâm trŭp đah mông nar nkrŭl dak bah n'glău dak bât thủy điện Kon Tum Thượng. Aơ lah du nkô̆ nău he ân mĭn uănh n'hanh ân gŭ mĭn. Tâm nê geh lĕ ma ăp trong nkra ta năp măt n'hanh lĕ ma ăp trong nkra jŏ jong. An saơ đŏng he hôm geh du trôm bŏng tâm trong nkra rdâng lơh nău tât trôk nar lơh, nău rdâng lơh bah he lah mpeh n'gơ neh. Bol ma tĭng quy định hŏ geh đŏng, ntĭm nti hŏ geh đŏng. Ntrŏng lah he ân lor nchrăp, mô uănh lhơ”.

        Tâm nar bôk năp pah kan ta nkual tơm n'gơ neh ta nkuâl Kon Plông, n'gor Kon Tum, Mpôl hăn pah kan bah Ƀan rđău đă gưl neh dak mpeh njrăng, n'gang trôk nar lơh hŏ hăn uănh năl, ôp uănh nău ngăn geh ta nkual n'glău dak bât thủy điện Thượng Kon Tum mpeh xã Đăk Tăng n'hanh ta xã Đăk Ring. Ôi tay 21/4, Mpôl hăn pah kan mbra geh rơh pah kan đah Ƀan rđău đă njrăng n'gang trôk nar lơh n'hanh kơl joi  nuĭh n'gor Kon Tum.

Tâm pơh dja đŏng, Văn phòng Chính phủ hŏ geh si ƀŭt nđơn nkoch tay nău rđău đă bah Groi Thủ tướng Lê Văn Thành mpeh nkra rơh n'gơ neh ta nkuâl Kon Plông, n'gor Kon Tum. Tĭng nê, Groi Thủ tướng Chính phủ Lê Văn Thành jao an Viện Hàn lâm Khoa học n'hanh Công nghệ Việt Nam rđău đă Viện Vật lý địa cầu weh ƀư tay, groi nđôi n'gơ neh ta nkual mhe nkoch bah lơ nê, mbơh ngăch an ăp nhih pah kan n'hanh ƀon lan gĭt gay lor nchrăp rdâng lơh tâm di.

 Ăp Bộ: Công Thương, Nông nghiệp n'hanh Phát triển nông thôn, Giao thông vận tải rđău đă tĭng groi nđôi, uănh năl, lor nchrăp an ƀư ăp trong nkra đăp mpăn nâp uĕh dak bât thủy điện, n'hong dak bât n'gâr dak n'hanh ntung trong hăn tâm nkual mbra geh tât khuch bah rơh n'gơ neh, mô an geh nău tât ndrât ndal, roh đăp mpăn./.  

Nuĭh rblang: Điểu Thân