Tâm ăp măng nar ngoai ndrel nar puăn ăp pơh, jrâu ntĭm nti play săm ƀŭt tâm ƀon Kret Krot, xã H’ra, nkuăl Mang Yang lŏ ang ŭnh, tăng bâr răk bah ăp nŭih. Jrâu nti aơ geh rlau 40 nŭih, ntơm bah mom tât ăp Bŏ, ăp Me lah rnoi Bahnar bah ƀon Kret Krot.

Jêh du nar hăn pah kan jâk rgănh, yuh Sen (45 năm) hŏ hăn nti tâm di mông gay ma nti nchih. Kơt âk yuh êng đŏng, yuh Sen gŭ sai bah ơm, rnăk jêr jŏt, mô dơi hăn nti. Rnôk aơ pơk jrâu ntĭm nti play săm ƀŭt, yuh nsôih hăn nti ndrel uănh aơ lah nau ueh ân săk nơm.

‘Gâp mô blau play săm ƀŭt, ŭch hăn nti gay ma blau nchih săk nơm, lah hăn ntŭk aơ ntŭk êng ri blau nchih moh săk nơm đŏng”.

Tâm kơt ma nê, yuh Mah (29 năm) nŭih ndrel ƀon kŏ hăn nti jêh lôch du nar hăn mir. Mpang ty yuh lĕ mơng ma kau chŭk, ma sah său, ma rnôk aơ ri lŏ nsôih tĭng nchih play săm ƀŭt, bol ma geh nau jêr, yuh Mah nsôih hăn nti yor rnơm lah, lah blau play săm ƀŭt ri mra kơl geh âk nau ueh ân săk nơm ndrel rnăk vâl đŏng:

“Gâp ŭch hăn nti gay blau nchih play săm ƀŭt gay ma jêh aơ hăn trong aơ trong êng, nơm blau play săm ƀŭt ri mra nơih lơn. Lah kơt rnôk aơ mô gĭt play săm ƀŭt ri hăn trong aơ trong êng bu kŏ lah, kơt mhe nơh hăn ngih dak si rnôk kon gâp geh nau ji, bu đă gâp nsih moh săk ma gâp mô blau chih ri ma nai dak ri lah, rnôk aơ gâp klach ngăn. Rnôk aơ gâp knŭng ŭch hăn nti gay ma blau play săm ƀŭt gay jêh aơ hăn trong aơ trong êng ueh lơn”.

Tâm mâp ma kônh wa tâm aơ, Trung uý Lê Tuấn Thành, Cán bộ Công an xã H’Ra, nkual Mang Yang, n’gor Gia Lai gĭt ngăn nau mô tŏng bah kônh wa. Mô gĭt play săm ƀŭt ri ma kônh wa mâp âk nau jêr rnôk ƀư ăp nau kan hành chính tâm xã. Ndri ma, dơi geh nau kơl an bah n’gâng kan ba lơ, n’gâng kan tâm nkual, Trung uý Thành lŏ hăn ntĭm nti play săm ƀŭt, jêng nai ntĭm ân ăp rnăk blau play săm ƀŭt, blau kơp, tă bah nê ăp nhoat rgâl nau mĭn, nau kan tâm hun hao văng sa:

‘Rnôk bôk năp ri hôm âk nau jêr nê lah yor kônh wa hôm prêng, klach nau hăn nti. Kônh wa lah rnoi Bahnar ri ma tâm nchră ngơi ma kônh wa hôm jêr đŏng yor mô tâm gĭt nau ngơi, hôm saơ geh nau tâm ƀah yor ê geh kơl an tât nau khlay. Gay mât jrâu ntĭm nti ân tât jŏ jong ri ân geh nau tâm rgop ma ntrong kan chính trị, ăp kruanh ƀon, công an viên, ndrel ma nau hăn nti ndrel geh nau dơi mra geh ăp nklâm ndơm nau nkhôm ân nŭih hăn nti”.

Xã H’Ra, nkuăl Mang Yang, n’gor Gia Lai geh 9 thôn, rnoh nŭih rnoi mpôl đê̆ geh tât 2/3, ngăn lah rnoi Bahnar. Wa Dung, Groi Kruanh UBND Xã H’Ra mbơh, nau kan nai Lê Tuấn Thành nti play săm ƀŭt nkre ma nau tâm rgop nau nkoch trêng, bonh đă ƀon lan, kơl an công an tâm dâng tâm dăch lơn đah ƀon lan, ƀư ueh nau kan bonh đă:

‘Play săm ƀŭt ƀư kônh wa gĭt rbăng lơn, rnôk nơm ƀư nau kan nkoch trêng ri kŏ mra geh nau nơih lơn, jêh aơ kônh wa lŏ geh dơi tâm nau pah kan jan sa, tuch tăm, rvăt phân poh, dak si gay ma kơl an nau kan tuch tăm, hun hao văng sa. N’gâng kan tâm nkuăl ƀư nau bonh đă ƀon lan kơt nkoch trêng mpeh nau mô ân tâm gŭ ur sao ơm, tâm gŭ êp dak mham ri kônh wa nơih gĭt lơ. Ŭch jrâu nti aơ geh pơk tâm ƀon Kret Krot ri jêh aơ mra pơk luh lơn tât ăp ƀon êng đŏng”./.