VOV4.M'nông: Jrô nti đêt kon se nti, âk nhih nti jê̆ ndrel hôm geh ta du ntŭk ƀon lan jê̆, nê lah ngoăy tâm ăp nkô̆ ƀư n'gor Gia Lai mô tŏng rlău 3.400 nai ntĭm bah năp năm nti mhe. Tâm rnôk nê, nău rgum du jrô nti, n'glăp nsum du nhih nti ta n'gor dja tâm bah ri aơ ƀư mbrơi, khuch tât rtŭt glêh nuĭh kan, n'hao săk blău ntĭm nti tâm ban kơt nkra bah nău mô tŏng nai ntĭm.

        Lah n'gor geh âk nhih nti jê̆, yơn rlău 4 năm tĭng ƀư trong nchrăp dăp rgum jrô nti,nhih nti, nkuâl Phú Thiện (Gia Lai) dơn hŭch 3 nhih nti dơm. Wa Nguyễn Thị Hoa- Kruanh jrô kan ntĭm nti nkuâl Phú Thiện an gĭt, geh âk nkô̆ ƀư n'gor mô hŏ rgum, n'glăp nsum du nhih nti jê̆ chrai:

      “Ngăn ma lah, tâm rnôk dja ri mbra dơi rgum n'glăp nsum bar pe ntŭk nhih nti đŏng. Rdâk njêng dơi ntŭk rgum tơm ri n'glăp sĭt nsum, nkra tât năm 2025 mơ dơi nkra. N'glăp nuĭh kan ri n'glăp dơi, yơn păng ngai ri saơ mât uănh nău kan mô tam uĕh. Hôm ăp nhih nti i dăch ri nklăp let năp tay n'glăp nsum tay du đêt nhih nti đŏng. Let năp tay, nklăp mbra n'glăp tâm rgop âk gưl".

        Tĭng ôp uănh ăp tŏng bah Sở Giáo dục n'hanh Đào tạo n'hanh Sở Nội vụ Gia Lai, aƀaơ ta ăp nkuâl Phú Thiện, An Khê, Đức Cơ hôm geh âk nhih nti tiểu học n'hanh THCS dŭt jê̆, mô hŏ tât 10 jrô nti/ nhih nti n'hanh ta nâm 20 kon se nti/ jrô nti. Ta ăp nkuâl Ia Pa, Kbang, Kông Chro, Kbang, Krông Pa, Chư Păh, Chư Pưh geh tât 21 nhih nti mầm non geh ta nâm 5 jrô nti. Ăp nhih nti dja ân n'glăp nsum yor mô tŏng âk mpeh rnoh jrô nti tĭng nău way an bah Bộ Giáo dục n'hanh Đào tạo.

        Mô dơn mô nsrôih uĕh tâm nău kan n'glăp nhih nti, jrô nti, n'gâng kan ăp nkuâl hôm mô geh tâm boh kan nsum đah n'gâng kan ntĭm nti gay n'glăp nsum nhih nti tâm rgop gưl. Wa Lê Duy Định- Giám đốc Giáo dục n'hanh Đào tạo Gia Lai an gĭt:

      “Mpôl hên dăn đă n'glăp nsum 6 nhih nti THPT geh rnoh âk ta nâm 15 jrô nti ta ăp nkuâl Kbang, Đức Cơ, Phú Thiện, Ia Pa, Krông Pa. Mpôl hên geh si ƀŭt dăn đă UBND ăp nkuâl dja nkoch mbơh ăp nhih nti THCS gay n'glăp nsum, yơn mô saơ ăp nkuâl ơh. Dăn đă gưl uỷ ăp nkuâl ân mât uănh khlay đŏng. Lah mô uănh khlay, mbra mô dơi nkra trong nchrăp kan dja.".

        Tĭng ƀư nău n'glăp nsum, dăp rgum tay ăp ntŭk kan ntĭm nti, ntơm bah năm 2018 tât aƀaơ, Gia Lai hŏ hŭch 4 trung tâm giáo dục thường xuyên n'hanh hŭch geh 83 nhih nti, 515 jrô nti, 406 ntŭk rgum nhih nti. Bah meng ăp nkuâl, thị xã tĭng ƀư jăp, ri hôm âk ntŭk geh nău dơi đêt đŏng kơt: Thị xã Ayun Pa, ăp nkuâl Phú Thiện, Mang Yang, Đức Cơ, Ia Grai, nkual ƀon têh Pleiku … rnoh âk nhih nti jê̆ chrai n'glăp nsum mô jêng kơp. Nău ngăn geh dja hăn rlơ̆ tay đah ăp nău nsrôih n'glăp nsum jrô nti, nhih nti ân nkra nău mô tŏng nai ntĭm, dăp rgum glêh tay nuĭh kan n'hanh n'hao săk blău ntĭm nti.

        An ƀư tay Nghị quyết 19/NQ-TƯ mpeh trong kan ntĭm nti, lvang năm 2022-2025, n'gor Gia Lai mbra koh n'hŭch tay 8 đơn vị sự nghiệp, 17 nhih nti, 97 ntŭk rgum nhih nti, ƀư dơi nău dja, n'gor mpêt nkrem dơi rlău 1700 biên chế nai ntĭm. Ndrel đah rnoh biên chế mhe dơi trung ương kơi ntop, Gia Lai mbra nkra dơi nău rvê mô tŏng nai ntĭm aƀaơ.

        Ta tâm nchră bah n'gâng kan ntĭm nti ƀư n'gul khay 8/2022, wa Nguyễn Thị Thanh Lịch- Groi kruanh UBND n'gor Gia Lai đă ăp nkuâl, thị xã, nkual ƀon têh ân tĭng ƀư jăp nău dăp rgum tay ăp ntŭk kan ntĭm nti gay nkra bah nău mô tŏng nai ntĭm, đăp mpăn nău dơi kơt nti bah kon se  nti.

      “Hŏ jao an Sở Giáo dục n'hanh Đào tạo n'hanh Sở Nội vụ ôp uănh nchŏng luh tĭng ntŭk, tĭng nkuâl. Đah n'gor, mô hôm geh du trong ƀư êng, ân tĭng ƀư dĭl gay đăp mpăn tŏng rnoh âk nai ntĭm. Gâp đă ăp nkuâl ân tĭng ƀư ndăn ngăch an ƀư dĭl. Mpôl hên mbra ôp uănh tay ăp tŏng lĕ rngôch tĭng ƀư nău kan dja, nkre đah nău dơn kan bah nuĭh mât bôk kan".

Nuĭh rblang: Điểu Thân