VOV4.M'nông: Khay druh ndăm 2022 geh bôk moh “Druh ndăm blău mĭn mhe". Ndrel đah lam dak, druh ndăm ăp n'gor ta nkual Tây Nguyên dôl geh âk nău kan ngăn ngăn, rƀŏng sĭt mpeh tâm dâng.

 “Khay druh ndăm" năm aơ dơi Tỉnh Đoàn Dak Lak ƀư luh kan ta xã Drai Bhăng, nkuâl Cư Kuin. Ta rơh rgŏ jă. Tỉnh Đoàn Dak Lak hŏ kơl an ƀư n'gâng ŭnh mpoh ang trong ƀon ta xã Ea Tiêu n'hanh ndơ ƀư "Bil sol 3 uĕh" ta Nhih nti THPT Y Jut. N'gluh tơm prăk 150 rkeh prăk gay nta joi nău kan an druh ndăm nkuâl Cư Kuin. Pă an 1 mblâm jay tâm rŏng n'hanh pă an 40 nklâm ndơ (ăp nklâm ndơ 300 rbăn prăk), 20 bôk ndeh wah jâng an ăp rnăk jêr jŏt n'hanh kon se nti rlău jêr jŏt nti blău. Nkuâl Đoàn Cư Kuin pă an 1 mblâm jay tâm rŏng an rnăk ach o, 1 jâng  gung pâl an kon se jê̆ n'hanh ntơm ƀư 1 tach pah play.

        Yuh H Giang Niê, Bí thư Tỉnh Đoàn Dak Lak an gĭt, đah nău ŭch ƀư an nuih n'hâm nđơr tâm rlong khuh n'gôr, mbah rhơn ăp nar kan chính trị têh tâm năm, tâm rnôk geh nău tât khuch bah nuh srê, druh ndăm Dak Lak hŏ ndơ̆ luh ăp rnoh tât kan na nê̆ nkre đah nău ŭch geh ngăn ta ntŭk, an ƀư ngăch ngăr ăp nău kan gay ƀư lôch jêh rnoh tât kan ndơ̆ luh n'hanh đăp mpăn njrăng n'gang nuh srê.

      “Nkô̆ bah khay druh ndăm năm aơ lah "druh ndăm blău mĭn mhe", nkual ƀon têh blău ƀư mhe lĕ ma âk ntil ndơ, tâm nê geh nău blău ƀư mhe tâm leo ƀư ăp nău kan, lơn lah nău blău ƀư mhe tâm nău bên di ngăch đah nuh srê n'hanh ƀư geh nău dơi đại hội đoàn năm kan 2022- 2027. Đah ăp gưl đoàn ân tâm rnglăp, du nuih n'hâm  rgum ăp tơm ndơ gay ntop kơl mpôl kan đoàn tâm ban kơt đoàn viên druh ndăm lam n'gor n'hanh nsrôih âk lơn đŏng tâm nău tĭng ƀư geh nău dơi 11 rnoh tât kan bah khay druh ndăm n'hanh ăp rnoh tât kan bah năm 2022".

Tâm "Khay druh ndăm", mom ndăm n'gor Dak Lak nsrôih ƀư lôch jêh 5km n'gâng ŭnh mpoh ang ƀon tơm; but săm ji, phăt dơm dak si an 2.000 tơ̆ nuĭh ƀon lan; an ƀư dŭt đêt 10 ntŭk sinh hoạt, ntŭk pâl rlưn an kon se ta xã jêr jŏt; rdâk njêng 5 mblâm jay tâm rŏng, jay tâm kơl, jay khăn quàng đỏ. Ndrel hăn tay đah druh ndăm ntơm njêng nău kan, rgŏ jă njêng ntơm bah 1-2 hợp tác xã, rmôt tâm boh druh ndăm; ntop kơl ăp trong nchrăp kan ntơm njêng nău kan bah druh ndăm tâm n'gor.

          Ta thị trấn Plây Kần, nkuâl n'har bri Ngọc Hồi, Tỉnh đoàn Kon Tum hŏ ntơm ƀư Khay druh ndăm n'hanh Bôk nău kan "Khay 3 n'har bri- mpêr n'gar neh dak gâp". Ta rơh ntơm pơk, Tỉnh đoàn Kon Tum hŏ pă an 20 nklâm ndơ đăp mpăn nău rêh an rnăk wâl cán bộ, tahen dôl pah kan ta ntŭk n'har bri n'hanh druh ndăm geh nău rêh jêr jŏt; ndơ̆ an thẻ Đoàn viên n'hanh Huy hiệu Đoàn an 50 đoàn viên mhe; nkoch mbơh 20 đoàn viên ntoh lư an gưl ủy đảng mĭn uănh kơi năp nti n'glăp đảng…

        Nkhêp geh rnôk dja Mpôl druh ndăm n'hanh Mpôl bu ur Bộ Công an pă an 10 nău kan ntĭt leo hun hao wăng sa lah 1.000 mblâm djăr ntil deh tăp an 10 rnăk dơi kơl, rnăk geh nău rêh jêr jŏt, kruanh chroh nkual rnoi mpôl đê̆, kon chroh. Pă an 3 máy vi tính, 200 nklâm ndơ (si ƀŭt nchih, mâng nchih) n'hanh ƀư trong dak "Kloh uĕh an kon se nti" ta nhih nti Tiểu học xã Pờ Y, nkuâl Ngọc Hồi, n'gor Kon Tum. Pă an 6 máy vi tính, 200 nklâm ndơ (si ƀŭt nchih, mâng nchih) an 2 ntŭk nhih nti ta bản Phu Cưa n'hanh pă an 16 máy tính an 8 nhih pah kan Công an ƀon mpeh n'gor Attapư, dak băl Lào.

Ta Gia Lai, “Khay druh ndăm" năm aơ dơi Tỉnh Đoàn Gia Lai ntơm ƀư ta xã Ia Trôk, nkuâl Ia Pa. Ta rơh ntơm pơk, Tỉnh Đoàn Gia Lai hŏ pă an 135 nklâm ndơ an ăp kon se nti; Pă an 1 ntŭk "Gŭ răk uănh si ƀŭt, tâm dâl n'hanh sinh hoạt Đội” rnoh khlay 50 rkeh prăk; pă an ndơ ntĭt 2 mblâm jay “Khăn quàng đỏ” an 2 kon se jê̆ geh nău rêh jêr jŏt. Rlău ma nê, đơn vị hŏ ƀư âk bôk nău kan an dŏng nsum lam ƀon lan đŏng kơt: Yur an rlău 400 đơn vị mham kơl nuĭh, ntop kơl nar luh kan, mpôih kuaih uĕh gung trong, mpông mpêr tâm ƀon ƀư pă an jay tâm rŏng. Nô Đỗ Duy Nam, Groi Bí thư Tỉnh đoàn Gia Lai an gĭt, ăp nău kan Khay druh ndăm năm 2022 dơi an ƀư jru hvi ntơm bah tâm dâng, mpơl nuih n'hâm nsrôih bah druh ndăm, đăp mpăn gâl kan geh nău dơi lôch jêh.

       “Ban thường vụ Tỉnh đoàn hŏ geh trong nchrăp ăp nău kan, ăp bôk nău kan, gâl kan ri hŏ rđău đă an ăp  nkuâl uănh tĭng nău kan, uănh tĭng gâl kan ma đăp mpăn mpeh rnoh âk kon nuĭh, lor nchrăp tâm nău đă cán bộ đoàn viên râng. Mhâm ƀư an ndơ ƀư nê nkre đăp mpăn rnoh ngăch n'hanh săk nâp uĕh, lơn lah ăp nău kan nkoch trêng mbah rhơn khay druh ndăm n'hanh lơn lah mbah rhơn Đại hội Đoàn ăp gưl”.

Đah nkô̆ “Druh ndăm blău mĭn mhe", “Khay druh ndăm" năm aơ hŏ dơi Trung ương Đoàn TNCS Hồ Chí Minh ƀư ntơm ta Thủ đô Hà Nội.Ta aơ dôl ƀư pla n'hơ nău blău njêng mhe “Nuĭh gĭt blău druh ndăm"; ntơm rdâk njêng du đêt ntŭk kan khlay, kơt Jay khăn quàng đỏ n'hanh pă nklâm ndơ an kon se nti geh nău rêh jêr jŏt; ntoh măt 16 Câu lạc bộ Rgâl mhe...Tâm khay druh ndăm năm aơ đŏng, Trung ương Đoàn TNCS Hồ Chí Minh mbra ƀư bôk nău kan Tâm nchră đah Bí thư bôk năp Trung ương Đoàn đah đoàn viên, druh ndăm; bôk nău kan "Khay pe n'har bri"; ndơ̆ an ndơ nkhôm rnê 10 druh ndăm ntoh lư Việt Nam năm 2021 n'hanh bôk nău kan Nkah ndray 91 năm Nar njêng Đoàn TNCS Hồ Chí Minh, pă an Ndơ nkhôm rnê Lý Tự Trọng năm 2022./.

Nuĭh rblang: Điểu Thân