VOV4.M’nông: Bơi tât 9000 bu ndăm tâm 5 n’gor bah nkuăl Tây Nguyên ntơm hăn tahen, ƀư nau kan mât neh dak. Bol ma geh ƀư tâm rnôk dôl ma geh srê Covid-19 hôm tât jêr ơm, yơn nau jao ndơn tahen năm aơ geh đăp mpăn, ueh, ngăn ngên lah nar ueh bah nar hăn tahen bah bu ndăm.

Tâm rơh jao ndơn tahen năm aơ, lam n’gor Dak Lak geh 2.500 bu ndăm hăn, 427 bu ndăm hăn công an. Ăp bu ndăm Dak Lak rơh hăn aơ kŏ tŏng ăp nau dơi mpeh chính trị, năm deh, n’hâm soan, nau nti. Ngăn lah, rlau 70 bu ndăm lôch nti Đại học-cao đẳng, 8 bu ndăm lah đảng viên, nŭih rnoi mpôl đê̆ geh rlau 50%. Tâm nar hăn, tahen Y săm Mlô, tâm Phường Ea Tam, nkuăl ƀon têh Buôn Ma Thuột, ngơi:

‘Hăn tahen lah nau kan ueh lăng ngăn bah bu ndăm, bu mom. Ndri ma gâp nchih săm ƀŭt gay ma ŭch hăn tahen. Gâp mra nsôih hăn ntĭm nti, chiăr săk, gay ƀư ân jêh nau kan geh jao”.

N’gor Lâm Đồng năm aơ geh 1.150 bu ndăm hăn tahen. Aơ lah ăp bu ndăm geh bu săch ntơm bah 12 nkuăl, nkuăl ƀon têh tâm n’gor. Nau jao ndơn tahen geh nau ƀư ueh bah ăp nkuăl, đăp mpăn ndrel geh nau khlay.

Năm aơ, n’gor Dak Nông geh rlau 1000 nŭih hăn tahen, tâm nê geh bơi tât 900 nŭih ƀư hăn tahen, rlau 100 nŭih bu ndăm hăn công an ƀon lan. Tâm rnoh bu ndăm bah n’gor hăn mât neh dak rơh aơ ăp nŭih lah đoàn viên, geh 11 nŭih lôch nti đại học, cao đẳng, ndrel geh rlau 50% druh ndăm lah nŭih rnoi mpôl đê̆.Geh 2.656 bu ndăm bah n’gor Gia Lai kŏ hăn tahen mât neh dak. Tâm rnoh ăp nŭih bu ndăm hăn tahen rơh aơ geh lôch nti cao đẳng, đại học rlau 1,4%, geh 22 nŭih lah đảng viên, ndrel rlau 60% lah nŭih rnoi mpôl đê̆. Nkoch nau bah năp mông hăn, tahen mhe Nguyễn Bá Kiên, Phường Thắng Lợi, nkuăl ƀon têh Pleiku, mbơh:

‘ Gâp rhơn ngăn, rhơn ndrel ma ntô̆ n’hao săk jăn rnôk gâp lah nŭih nthoi tay jâng mbơ̆, nô hăn mât neh dak. Gâp dŭt ntô̆ n’hao săk nơm rnôk geh dâk tâm rmôt tahen wa Hồ gay ma ƀư ueh nau vay ơm cách mạng bah rnăk vâl ndrel lam rnoi mpôl, mpoh ang ân gâp nau rnơm, nau ueh tâm săk nơm. Nkre lah kŏ dŭt ma rhơn, dŭt ma geh nau mhe mhan rnôk ma tât tâm du ntŭk gŭ ndrel đah nau rêh mhe, gâp mra nsôih chiăr nti ndrel ơm geh nau ŭch ueh đah ntŭk gŭ kan mhe gay mhâm ƀư tâm di đah nau ntĭm đă bah ăp rđau kan tâm nkuăl ƀon têh ndrel ăp nau ntĭm mbơh bah me mbơ̆ gâp”.

Tâm n’gor Kon Tum nau kan jao ndơn tahen kŏ geh ƀư ueh rjăp, ngăch tâm ôi lơ 16/2. Năm aơ n’gor geh 800 nŭih bu mom hăn tahen, tâm nê geh 8 nŭih lah công chức viên chức; du hê đảng viên. Tahen mhe Phạm Hoàng Quốc, tâm Phường Quyết Thắng, nkuăl ƀon têh Kon Tum, hŏ geh ur ndrel du hê kon jê̆, săk păng dôl pah kan ân Công ty Luật tâm nkuăl ƀon têh Hồ Chí Minh, hăn tahen tâm rơh aơ, nkoch:

‘Nar aơ tâm nar hăn tahen gâp dŭt rhơn ngăn ndrel kŏ kơt ma ăp nŭih êng êng đŏng, đah nau dơi lah du hê nŭih ƀon lan ri gâp dŭt ntô̆ n’hao mpeh nau nê. Rmôt kan ma gâp tât gay ma ƀư nau kan bah du hê nŭih bu ndăm lah Trung đoàn 990 ndrel nkô̆ nau bah gâp nê lah ƀư ân jêh nau kan geh jao. Bol ma moh nau jêr ri gâp kŏ nsôih ƀư lôch n’hâm nơm ân ma geh nau dơi”.

Ƀư ueh nau kan njrăng rdâng srê Covid-19, ăp nŭih hăn tahen bah 5 n’gor Tây Nguyên kŏ geh chuh tŏng vắc xin nglai tal 2 ndrel tal 3, bah năp nar hăn tahen geh xét nghiệm SARS-Cov2 ân đăp mpăn 100% lăp tahen ân đăp mpăn, mô geh ntưp ma srê Covid-19. Ăp nkuăl geh oh kon hăn tahen ƀư ueh nau kan bonh đă rgop nau gay ma nar ndơn jao tahen năm aơ jêng nar hăn rgum ueh, jêng nau khuh n’gôr, druh ndăm hăn trong mât neh dak./.

Nŭih rblang: H’Thi