Nău nchrăp kan ntuh kơl rdâk njêng trong hăn têh ngăch Tân Phú- Bảo Lộc geh nău jong klâp ma 66km, tâm nĕ 11km hăn let nkuăl Tân Phú, n’gor Đồng Nai n’hanh 55km ta n’gor Lâm Đồng. Nău  kan geh lĕ rnoh ntuh ƀư lvang bôk năp lah 17.200 rmen prăk, tâm nĕ tơm prăk ngih dak 6.500 rmen prăk (tơm prăk trung ương 2 rmen prăk, tơm prăk n’gor Lâm Đồng 4.500 rmen prăk), tơm prăk ntŭk ntuh kơl 1.605 rmen prăk, hôm e lah prăk tâm rgop bâh ăp ntŭk.

Aơ lah nău nchrăp kan ta rmôt A yor UBND n’gor Lâm Đồng ƀư ntŭk kan ngih dak geh nău mât uănh n’hanh ntŭk ntuh kơl dăn đă nchrăp kan lah rmôt kan yor Tập đoàn Đèo cả ƀư tơm. Lvang 1, trong hăn têh aơ geh nău hvi  măt trong 17m  đah 4 mbor trong ndeh hăn, pă dăp ăp ntŭk rlu ndeh ndal mô geh ƀa ƀơ, đah năm nchrăp ƀư lôch ta năm 2026. Lvang 2 mbra ntuh ƀư lôch trong hăn, măt hvi trong 22met, geh 4 mbor ndeh n’hanh 2 mbor rlu ndeh ndal mbro, nchrăp ƀư lôch năm 2035.

Wa Lê Quỳnh Mai, groi kruanh HĐQT Tập đoàn Đèo Cả an gĭt, UBND n’gor Lâm Đồng lĕ pă an ntŭk kan ƀư tĭng uănh nđôi mbơh tơih mĭn uănh nău dơi kan n’hanh nău kan aơ dôl ngăch ndăn ƀư lôch. Mpŏng trong hăn, ăp ntŭk tâm koh, ntŭk mbơh trong hăn, ntŭk trong trôm neh, trong ƀon lan gŭ rêh..ta trong hăn têh lĕ geh ƀư da dê. Wa Lê Quỳnh Mai ngơi.

Tâm klâp ma ta khay 7/2023 rĭ Tập đoàn Đèo Cả mbra ndơ̆ an UBND n’gor Lâm Đồng mbơh tơih mĭn uănh an ƀư lôch. Lôch nĕ UBND n’gor Lâm Đồng njoăl tât n’gâng kan mât uănh ntung trong n’hanh Hội đồng mât uănh năl rmôt kan 2 n’gâng kan gay ma ƀư tĭng nău ôp uănh nău nchrăp kan aơ. Geh mĭn ŭch tât khay 9/2023 mbra lôch nău uănh năl nĕ gay ma UBND n’gor Lâm Đồng an dŏng nău nchrăp kan n’hanh ƀư tĭng ntơm kan”.

Ndrel đah trong hăn têh ngăch Tân Phú- Bảo Lộc, UBND n’gor Lâm Đồng dôl geh ntrôl nău mbơh tơih rdâk njêng trong hăn mbluh tât lah Bảo Lộc- Liên Khương geh nău jong 74km, nău têh hăn 4 mbor ndeh, đah lĕ rnoh  ntuh kơl nchrăp lah 19,521 rmen prăk. Tâm nĕ, prăk ngih dak tâm rgop an rlău 7.760 rmen prăk, ăp ntŭk ntuh kơl an 11.760 rmen prăk, hôm e lah prăk tâm rgop êng. Wa Hoàng Việt Lâm, groi Giám đốc ntŭk kan KHĐT Lâm Đồng an gĭt, trong hăn têh aơ lĕ dôl geh ngăch ndăn ƀư ăp săm ƀŭt kan gay ma ơm mbơh ntuh kơl.

“Êng đah nău ƀư trong têh Tân Phú- Bảo Lộc, ƀư trong têh Bảo Lộc- Liên Khương lah nău nchrăp kan geh tâm lĕ rngôch n’gor Lâm Đồng n’hanh ntŭk kan an dŏng ntuh kơl lah HĐND n’gor Lâm Đồng. Aƀaơ nău kan dôl geh ta njoat mbơh tơih mĭn uănh an tâm di”.

 Ăp nău nchrăp ƀư trong têh Tân Phú- Bảo Lộc n’hanh Bảo Lộc -Liên Khương lah trong hăn tơm, hăn ndrel, tâm rgop tăch rgâl bâh Lâm Đồng đah nkuăl ƀon têh Hồ Chí Minh n’hanh ăp n’gor mpeh ba dâng. Rnôk ma ăp trong hăn têh ƀư lôch mbra geh ntrôl lơn nău wăng sa- rêh jêng bâh Lâm Đồng n’hanh ăp n’gor tâm ăp nkual hun hao.