Mbah rhơn 79 năm Nar Quốc khánh (2/9), điện lực Dak Lak kan nsum đah n’gâng kan ta ntŭk ƀư kơl 3 mblâm jay tâm rŏng an ăp rnăk dơi kơl ta nkuâl Ea Súp. Pe rnăk dơi kơl prăk ƀư jay lah rnăk ăp tahen ơm rmanh Lê Văn Phục, ta thôn 12, xã Ia Rvê; Nguyễn Văn Minh, ta thôn 13, xã Ea Lê; n’hanh Y Blưng Hra, ta buôn A1, thị trấn Ea Súp. Lĕ rngôch prăk ntop kơl ăp rnăk lah 100 rkeh prăk.

Tâm nê, Tổng công ty điện lực miền Trung kơl 60 rkeh prăk, nkuâl Ea Súp ntop kơl 30 rkeh prăk bah tơm Prăk nkrem nkah gĭt n’hâm suan, n’gâng kan ăp xã ntop kơl 10 rkeh prăk. Bah meng nê, ăp rnăk hôm rgop tay prăk gay mon jay mhe têh hvi. Tâm nar jao jay, điện lực Dak Lak kơl ăp rnăk du nklâm ndơ rnoh khlay 5 rkeh prăk gay rvăt năp tay ăp ndơ dŏng rêh. Bah năp nê, bah tơm prăk kơl bah Tổng công ty điện lực miền Trung đŏng, điện lực Dak Lak hŏ mon 2 mblâm jay tâm rŏng kơl ăp rnăk dơi kơl ta nkuâl Buôn Đôn, n’gor Dak Lak.