VOV4.M’nông: Tâm ăp rmôt kan dăp rgum ân di ngih máy ân F0 gŭ, dŏng ngih văn hoá ƀon lan lah ntŭk rgum săm ji ân nŭih ntưp srê Covid-19, nê lah nau ma kônh wa rnoi mpôl đê̆ tâm nkuăl Cư Jút, n’gor Dak Nông rklaih nau jêr mpeh ndơ dŏng gay ma njrăng srê Covid-19 dôl ntưp ngăch. Ăp nau kan aơ dôl ma ƀư ueh nau săk tam bah nŭih săm ji ntưp srê Covid-19 tâm ƀon lan, n’huch nau jâk ân ntŭk kan dak si nkuăl Cư Jút, nkuăl n’har bri geh tât 485 rnoh nŭih rnoi mpôl đê̆.

Ngih nâp nâl lah ntŭk 3 bơ̆ kon wa Y Thanh Bkrông, tâm ƀon Nui, xã Tâm Thắng, nkuăl Cư Jút, ƀư nau nkhah săm srê Covid-19. Wa mbơh, rnôk siăk, ji kop duh, păng hŏ tât ngih dak si xét nghiệm ngăch jêh ri saơ ntưp. Pơh hvi nau xét ngjiệm ân rnăk vâl, 3 nŭih ntưp ma srê Covid-19 geh cán bộ nai dak si ntĭm mbơh nkhah êng tâm ngih. Êng ur păng mô geh ntưp geh ngih tâm êp ma păng pă ân ntŭk gŭ. Jêh di pơh nkhah, săm ri kon păng hŏ geh bah, păng ndrel kon bu ur n’hâm soan rnôk aơ hŏ ueh oi. Wa Y Thanh mbơh:

‘Gâp lah F0. Bar hê bơ̆ kon hên tâm ngih. Hôm ur gâp tâm ngih. Bar hê bơ̆ kon gâp đăp mpăn mât n’hâm soan ndrel ƀư 5K. Đăp mpăn mpeh n’hâm soan tâm rnôk geh nkhah, mô geh nau ma rvê. Gâp ŭch oh nô lah nơm lăn geh ntưp srê Covid-19 nsôih ƀư 5K ân ueh, nkhĭt kman ndrel mô hăn tâm ƀon lan”.

Nai dak si Quản Xuân Huân, Ngih dak si xã Tâm Thắng, mbơh, ntơm dŭt e tât rnôk aơ, lam xã Tâm Thắng geh rlau 800 nŭih ntưp ma srê Covid-19. Rnôk aơ dĭng lĕ hŏ bah nau ji, knŭng hôm 233 nŭih săm êng tâm ngih. Tâm ăp thôn ƀon hôm dŏng mât rmôt kan kơl njrăng Covid-19 nsum, tâm rgop ngăn đah cán bộ nai dak si ƀư nau kan uănh n’ôi, ntĭm mbơh nau mât chăm ăp F0 mô geh nau mpơl saơ mô lah nau mpơl saơ tâm ntŭk gŭ:

‘Ăp thôn mra ndâk luh âk rmôt kan. Rnôk ma aơ du hê nŭih F0 ndrel săm tâm ngih, ngih dak si mra ntĭm nti nau mât chăm, njrăng, ngêt dak si mhâm ƀư ân rmôt Covid-19 nsum mpôl uănh ndrel ƀư nau pă dak si ân nŭih ji. Jêh nê geh du rmôt nŭih nai dak si ƀon lan, cán bộ thôn, ƀư nau nkhah rgum ăp rnăk vâl geh nŭih ji, der nau ntưp rêng luh bah dih”.

Tâm nkuăl tâm êp ma nkuăl ƀon têh Buôn Ma Thuột, nŭih ƀon lan rêh rgum njok trong Quốc lộ 14, lŏ geh du ntŭk kan nkuăl công nghiệp bah n’gor Dak Nông, xã Tâm Thắng geh rnoh nau kan tăch rgâl têh, lah nau dơi gay ma srê Covid-19 ntưp rêng ngăch. Wa Trần Thế Quang, Kruanh UBND xã Tâm Thắng, mbơh, xã geh rlau 15.300 nŭih, tâm nê nŭih rnoi mpôl đê̆ geh 30%. Nau rêh bah kônh wa hôm âk nau jêr nê lah ngoai tâm âk nau kol tâm nau kơl an njrăng rdâng srê Covid-19. Rnôk geh srê ntoh luh hô, geh nar du ƀon rnoi mpôl đê̆ saơ geh tât 60 nŭih ntưp mhe.

Rklaih ăp nau jêr mpeh drăp ndơ, xã rgum lam lĕ nsum mppol đah nuih n’hâm đah ăp nau kan mât kơl an săm F0 mô lăng jâk mô lah mô geh nau mpơl saơ tâm ntŭk gŭ. Nê lah tĭng rkum rnăk vâl dăp rgum êng jêng du ngih ân gŭ nsum, mô lah F1 lăp gŭ tâm mir, ân nguh geh nau nơih gay F0 nkhah êng. Rnôk rnoh F0 âk ir, xã dŏng ngih rƀŭn rgum ƀư ntŭk rgum săm nŭih ji. Wa Trần Thế Quang mbơh, nau mât đăp mpăn ndơ sa ân nŭih ji đăp mpăn nau nkhah săm kŏ nsing tâm ƀon lan ndrel ăp nau kơl an êng:

‘Ăp ntŭk săm tâm ngih ƀon lan ri phung hên bonh đă ăp nau rgop kơl an phe ndrel ndơ sa ndrel a nau ntĭm nti ân F0 tâm nê hâm êng ndơ sa mât chăm êng. Đah ăp rkum rnăk vâl ri kŏ tă bah nê nkre lah nŭih kơl an bah rnăk vâl, nkre lah nau kơl an, ăp F1 mra njoăl ndơ sa, ndơ dŏng ân F0. Hôm lah âk nŭih F0 tâm du rnăk vâl ri mra ntĭm gay ma kơl an khân păng tâm mât chăm, nkuăl knŭng kơl an ăp ndơ êng khlay. Geh rnôk du ngih rgum rƀŭn phung hên ƀư nau săm ntơm 20- 25 nŭih, rkum rnăk vâl ri geh nau săm ân nklăp 6 nŭih, nê lah đah ăp ƀon nŭih rnoi mpôl đê̆ dơm, ma rnoi Yoăn ri mpeh ntŭk ntu gŭ ri ueh oi đŏng”.

Tâm ban ma nê tâm xã Tâm Thắng, nau kan săm ân nŭih ntưp ma srê Covid-19 tâm ăp ƀon lan rnoi mpôl đê̆ geh nau ƀư ueh nau săk tam tâm lam nkuăl Cư Jút, n’gor Dak Nông. Tĭng nai dak si Bùi Thị Minh Nghĩa, Giám đốc ngih dak si nkuăl Cư Jút, ăp nau kan aơ tâm di ma nau vay bah nŭih rnoi mpôl đê̆ kơt rklaih nau kan văng sa hôm jêr bah kônh wa. Nau kan săm nŭih ji ntưp ma Covid-19 tâm ƀon lan geh n’huch âk ân ntŭk kan dak si. Kơp tât nrôk aơ, lam nkuăl geh bơi tât 7000 nŭih ntưp ma srê Covid-19, tâm nê âk ngăn bah ji, rnôk aơ hôm bơi tât 100 nŭih săm êng tâm ngih dak si, rlau 2000 nŭih săm tâm ntŭk gŭ.

Rơh êp aơ, tâm du nar nkuăl Cư Jút saơ geh nklăp 200 nŭih ntưp mhe. Nau gay ma rhơn lah rnoh nŭih ji ân geh săm tâm ngih dak si mô âk. Nai dak si Bùi Thị Minh Nghĩa mbơh, nau kan njrăng rdâng srê geh ăp nau nơih ueh yor nkuăl hŏ geh chuh vắc xin nglai 3 ân nŭih rlau 18 năm, ndrel kônh wa geh nau blau nau kan njrăng rdâng srê Covid-19. Bol ma kơt nê nkuăl hŏ nchrăp ndơ dŏng gay ma geh rgum leo săm 300 nŭih tâm rnoh dơi ndrel rgum nŭih nai dak si tŏng nau ŭch săm rnoh nŭih ntưp hao âk:

“Nŭih kan tâm ngih dak si ri kŏ geh nŭih ntưp ji, rnoh nau kan ri âk tâm rnôk nŭih oah kan ri n’huch, ri ma hên ân geh vay ƀa ƀơ dăp rgum tay nŭih kan gay ma đăp mpăn nau kan njrăng rdâng srê. Rnôk aơ phung hên kŏ nchih rnoh moh săk ăp nŭih cán bộ nai dai ki sĭt rlu ranh, cán bộ nau dak si êng êng tâm nkuăl, gay ma rnôk ŭch ri jă khân păng nê gay ma n’hao kơl an”.

Đah nau nsum ty nsum n’hâm bah lam ƀon lan, n’gâng kan tâm nkuăl ndrel ntŭk kan ngih dak si, nkuăl Cư Jút, n’gor Dak Nông dôl nchrăp ƀư ăp nau kan ân geh đăp mpăn n’hâm soan ân ƀon lan bah năp srê Covid-19./.

 Nŭih rblang: H’Thi