Tâm ăp năm rlău aơ, trong ntĭt leo ƀư thư viện ntrơn hăn “Ánh sáng tri thức” dơi an ƀư ta âk n'gor tâm lam dak. Ta  nkual Tây Nguyên, trong ntĭt leo dja hŏ dơi ƀư ta nkual jru ngai bah n'gor, rdâk nău nđơr rŏ siƀŭt đah kon se ăp rnoi nuĭh.

          Ôi n'gul khay pe Tây Nguyên, ta nâm mbor si, jâng gung nhih nti THCS Ngô Mây ta xã Ea M’roh, nkuâl Cư M’gar, n'gor Dak Lak, khuh n'gôr rnôk ndeh thư viện hăn tât đah ăp kon se nti. Ta aơ, ndrel đah nău rŏ siƀŭt, joi gĭt nău lư ta internet, ăp kon se hôm râng âk nău kan pâl rlưn đŏng…Ŭch rŏng mỹ thuật, oh Triệu Yến Nhi, rnoi Dao, kon se nti jrô 6A, ngăch joi an he ăp ndrôm siƀŭt mpeh hội họa n'hanh joi gĭt ăp rup ntoh lư lam ntŭr neh:

     "Gâp saơ siƀŭt dŭt uĕh n'hanh ŭch rŏng, mpeh nghệ thuật, họa sĩ n'hanh âk ntil nău êng ƀa ƀă đŏng. Gâp ŭch rŏng lah jêh aơ tay jêng du nghệ sĩ gĭt blău kơt lah Van Goh. Lôch rlong saơ ăp nău kan, gâp saơ dŭt rhơn, păng nsĭt tay nău mĭn blău ƀư mhe dŭt âk".

        Hôm ta nhih nti THCS Lê Hồng Phong, ta xã Ea Nam, nkuâl Ea H’leo, aơ lah tâl bar ndeh thư viện hăn nsĭt tât nău rhơn nđơr đah ăp kon se nti. Oh Nguyễn Thảo My, kon se nti jrô 9A4, nđơr:

       "Gâp geh râng nău pâl rlưn tă bah ăp yuh nô ƀư n'hanh râng ƀư ndơ njêng tay đah ăp kon se khối 6, khối 7 n'hanh ndrel rŏ siƀŭt đah ăp băl. Nău gâp ŭch rŏng lah jêh aơ tay ƀư jêng biên tập viên. Nău rŏ siƀŭt mbra kơt nti âk tơm nău an he dŭt âk, lơn lah rnôk nchih văn ri gâp mbra dŏng ăp nău văn tâm nê."

        Dơi gĭt ndeh thư viện lưu động “Ánh sáng tri thức” tă bah Vụ Thư viện (Bộ Văn hóa, Thể thao n'hanh Pâl nđaih) kan nsum đah prăk nkrem Thiện Tâm (Tập đoàn Vingroup) pă an ăp thư viện tâm lam dak. Ta Dak Lak, ndeh geh rlău 2.000 bôk ndrôm siƀŭt đah âk ntil kơt văn học, thiếu nhi, lịch sử, siƀŭt tham khảo… Bah meng nê, ndeh hôm dơi ntrŭp ti vi, máy tính me, 6 máy tính cheng ti, máy chiếu, phần mềm mât thư viện, phần mềm rŏ siƀŭt an nuĭh tĭk tôr đŏng…

An ƀư ntơm bah kêng dŭt năm 2019 tât aƀaơ, Thư viện n'gor Dak Lak hŏ ƀư bôk ndeh thư viện hăn rhŏ dŏng ta ăp ntŭk nhih nti ta nkual jru, nkual ngai. Wa Trần Thị Thu Hà, Groi Giám đốc Thư viện n'gor Dak Lak, an gĭt, ndrel đah ăp nău kan rŏ siƀŭt, nkoch n'hơ siƀŭt mhe, mpeh thư viện hôm ƀư âk nău kan pâl rlưn, geh nkhôm nklâm ndơ jê̆ gay an kon se nti geh nuih n'hâm rhơn nđơr. Tĭng trong nchrăp năm 2023, ndeh Thư viện “Ánh sáng tri thức” mbra ƀư tay 96 bôk ndeh hăn, gay rêng lam văn hóa rŏ tât lĕ rngôch ăp nuĭh, lơn lah đah ăp kon se nti.

          "Uănh tĭng nuĭh rhŏ dŏng n'hanh nău geh na nê̆, thư viện n'gor mbra rgâl mhe ăp nău pâl rlưn, ăp nău kan rhơn ndrel siƀŭt, mô lah ƀư ăp rơh tâm rlong nkre đah siƀŭt, kơl ăp kon se saơ rŏ siƀŭt lah du nău kan bah dĭl gŭ, mô geh nchâp đă ma njêng suan ntrôl nău ŭch rŏng pơk uănh siƀŭt".

Ndrel đah Dak Lak, ndeh Thư viện “Ánh sáng tri thức” hŏ dơi hăn tât ăp n'gor êng êng tâm nkual Tây Nguyên. Ta Gia Lai, ndeh thư viện âk ndơ dŏng hăn geh lĕ rngôch rnoh khlay prăk ƀư 1 rmen prăk. Ta trôm ndeh dơi năp rlău 5.000 bôk ndrôm siƀŭt ăp ntil, 10 máy tính buăt nthoi mạng, ti vi; rlău ma nê, hôm geh siƀŭt ngơi, n'hanh ăp ndơ ntrŭp điện tử dŏng pơk an nuĭh cheh măt đŏng. Tĭng uănh năl bah kruanh Thư viện n'gor Gia Lai: aơ lah du bôk nău kan geh nkô̆ khlay ngăn ngăn, kơl ăp thư viện lor nchrăp ƀư ăp nău kan nkoch trêng nău lư tât dăch đah nuĭh ƀon lan, rgop "jut bah ach nău lư, jut bah mô gĭt công nghệ", pơk hvi trong leo rŏ siƀŭt báo.

          Hôm ta Lâm Đồng, Thư viện hŏ kan nsum ƀư ăp bôk ndeh thư viện “Ánh sáng tri thức” hăn rhŏ dŏng tât ta 21 ntŭk nhih nti ta ăp gưl nti: Tiểu học, THCS, THPT mpeh nkuâl Đức Trọng, Lâm Hà n'hanh nkual ƀon têh Bảo Lộc. Đah bơi 3.000 bôk ndrôm siƀŭt hăn rhŏ an âk ntil kơt: Giáo dục nhân cách; Rèn luyện kỹ năng sống; Giáo dục giới tính, siƀŭt văn học, truyện tranh thiếu nhi…hŏ wăch rgum hang rbăn tơ̆ kon se nti tât râng.

Bôk ndeh geh moh "ánh sáng tri thức" hŏ njêng luh du rlong sial mhe, rgop ƀư jêng ngăn ngăn Đề án Hun hao văn hóa rŏ tâm nsum mpôl. Đề án Ntrôl dăng ăp nău kan kơt nti tât dŭt nău rêh tâm thư viện, bảo tàng, jay văn hóa, câu lạc bộ hŏ dơi Thủ tướng Chính phủ uănh an dŏng. Ndeh ôtô thư viện hăn rgop ƀư geh nău  tam tâm nău n'hao âk văn hóa rŏ an  ăp kon se nti.