VOV4.M'nông: Lôch ăp tơ̆ khay rlu nti gŭ ta jay gay njrăng n'gang nuh srê COVID-19, khay rlu nti năm aơ ăp kon se jê̆ ta n'gor Kon Tum hŏ râng ăp nău kan ma he ŭch rŏng. Rƀah gĭt nău  ŭch geh dja, ăp Trung tâm, Jay Văn hóa, ăp nuĭh ta n'gor Kon Tum hŏ nta âk ntŭk pâl an kon se geh tay trong sơch gay hun hao nău blău êng tâm săk nơm.

        Mô uănh tât trôk nar duh r'ôl khay rlu nti, rmôt nklăp 30 kon se nti ntơm bah jrô 6 tât jrô 8, nhih nti Trung học Cơ sở Nguyễn Sinh Sắc ta nkual ƀon têh Kon Tum gân djăng đah nău tiăr nti pah kan Đội. Oh Lã Đình Hòa An, kon se jrô 6Y, an gĭt, gâp saơ he geh nău blău êng tâm săk jêng đăng ký râng tiăr nti jrô pah kan Đội tă bah Trung tâm Văn hóa Thể thao Thanh thiếu nhi n'gor Kon Tum pơk tâm khay rlu nti. Đah Lã Đình Hòa An, khay rlu nti dja geh dŭt âk nău rhơn dŭt mha êng:

       “Khay rlu nti dja mpôl hên way wăch rgum nsum gay râng ăp nău kan uĕh blău ri mpôl hên saơ dŭt rhơn yor bar năm COVID ri mơ geh rnôk ndrel rgum nsum plơ̆ pâl rlưn tay. Dơi mâp tay dŭt âk băl, tâm ôp, tâm nđŭr n'hanh nkah tay ăp ntil he hŏ lăn rlău tâm ăp nar COVID. Nkhêp geh rnôk khay rlu nti dja ri gâp mbra râng du đêt nău nti đŏng kơt tập võ, nti re n'hanh tiăr nti nău blău vẽ”.

          Nuh srê COVID- 19 dơi mât kân bah, khay rlu nti dja ntơm plơ̆ tay nău kan ƀư âk ntŭk pâl rlưn an kon se n'hanh rgum dŭt âk ta nkual ƀon têh Kon Tum. Ndrel đah ăp jrô nti năng khiếu bah ăp Trung tâm, Jay Văn hóa, ăp me bơ̆ mbra sơch ăp jrô nti năng khiếu tă bah ăp mpôl, ăp nuĭh pơk gay kơl oh kon he gĭt blău năng khiếu đŏng. Yuh Đặng Linh Ngọc, me oh Nguyễn Đặng Gia Hân, 6 năm deh, jay gŭ ta Tổ 1, phường Duy Tân an kon râng nti jrô năng khiếu nhảy ta trong Hoàng Thị Loan, an gĭt:

       “Saơ oh gŭ ta jay geh năng khiếu mpeh ăp môn kơt njroh mprơ, ka dŏ n'hanh vẽ. Ăp mon hŏ lôch nti jêh ta nhih nti, rlău ma gŭ ta jay ri ŭch rŏng ăp oh mon hăn tât dơi ta trung tâm ma nkre lah jâng gŭ pâl. Tâl bar lah ăp mon mbra dơi tiăr nti n'hâm suan mbra uĕh dăng lơn lah an kon se gŭ dơm ta jay. Tăng ăp me bơ̆ êng ƀa ƀă nkoch mpeh trung tâm dja đŏng jêng ŭch an oh râng gay nti năng khiếu ntop nău gĭt blău an săk nơm".

         Nkhêp geh khay rlu nti năm aơ, ndrel đah ăp jrô nti năng khiếu, rơh nti nău gĭt blău rêh, trại hè hŏ way bên, kơt: vẽ, đàn Organ, võ thuật, học kỳ quân đội… ăp kon se jê̆ ta Kon Tum hôm geh ăp trong sơch dŭt mhe, kơt: Bôk nău kan rlong hăn uănh pâl bri dak; Jay rlưn kon se; Nhảy tik tok… N'hanh ta năp ăp nău ŭch geh tiăr nti, n'hao nău gĭt blău năng khiếu bah kon se, ta n'gor Kon Tum rlău ma ăp nău way đă tĭng văn hóa bah Ngih dak tâm rnôk khay rlu nti dja hôm năl geh nău tât râng bah âk mpôl, âk nuĭh tâm nău pơk leo ƀư ntŭk pâl rlưn an kon se jê̆ đŏng.

Tĭng wa Phạm Văn Thắm, Groi Giám đốc Trung tâm Văn hóa Thể thao Thanh thiếu nhi n'gor Kon Tum, aơ lah nău mpơl uĕh njêng nău âk ntil, tâm rlong kloh rvah n'hanh nuĭh geh dŏng lah ăp kon se jê̆:

       “Nê lah jêng lam nuĭh kan mpeh văn hóa. He mbra dơi lah ntŭk rhŏ dŏng văn hóa bu ƀư văn hóa dŭt âk. Jrô nti nkrêh đơn, jrô nti mpât mprơ, jrô nti ka dŏ. Bah dih ƀư dơm mô di lah đah aƀaơ 10 năm dơn geh Trung tâm dơm mô njêng geh trong tâm rlong. Ân ntuh kơl uĕh mpeh drăp ndơ dŏng, mpeh kon nuĭh ri mơ wăch rgum âk kon se tât râng. N'hanh nti năng khiếu lah ntŭk ŭch tât êng mô dơi nchâp đă ăp kon se”.

        Lôch ăp khay rlu nti lơn âk gŭ tâm jay gay njrăng n'gang COVID-19, khay rlu nti năm aơ ăp kon se ta n'gor Kon Tum hŏ dơi râng ăp nău kan rgum ma he ŭch rŏng. Ăp jrô nti năng khiếu, nău blău gŭ rêh, nău kan rlong gĭt aƀaơ dôl geh rnoh kon se râng dŭt âk. Ăp Trung tâm, Jay Văn hóa ndrel du đêt mpôl, ăp nuĭh ta Kon Tum dôl rƀŏng ăp nău kan mpeh ăp nkuâl nkual jru nkual ngai gay njêng luh ăp jâng gung pâl rlưn an ăp kon se tâm rnôk khay rlu nti dja./.

Nuĭh rblang: Điểu Thân