Ôi 7/12, ta nkual ƀon têh Kon Tum, HĐND n'gor Kon Tum ntơm pơk rơh hop tâl 4, HĐND n'gor khóa XII, năm kan 2021- 2026. Uănh năl jêh geh tĭng ƀư nău kan năm 2022 an saơ, âk rnoh tât kan mô dơi tât trong nchrăp ndơ̆ luh.

   Năm 2022 rnoh ngăch hun hao ndơ geh ƀư bah n'gor Kon Tum geh 9,5% rđĭl đah năm 2021. Lĕ rngôch rnoh ndơ geh ƀư rĭng bôk nuĭh hao bah 47 rkeh prăk hao tât rlău 52 rkeh prăk. Sŏk geh ngân sách ngih dak nchroh 4.000 rmen prăk, tât 100% trong nchrăp sŏk dŏng jao. Tâm năm n'gor Kon Tum wăch 19 trong nchrăp ntuh kơl  đah lĕ rngôch tơm prăk dăn ntuh kơl 1.600 rmen prăk.

Bah meng nău dơi hŏ geh, geh 4 rnoh tât kan khlay n'gor Kon Tum mô dơi tât trong nchrăp ndơ luh, lah: Rnoh ngăch hun hao lĕ rngôch ndơ geh ƀư mô dơi tât rnoh Nghị quyết hao bah 10% let lơ; Dŏng prăk ngân sách n'gor; n'gluh tơm prăk ntuh kơl n'hanh rdâk njêng ƀon lan mhe mô dơi tât trong nchrăp ơm. Ndrel đah nê nău dơi rgâl dơh glêh siƀŭt mât kan, rgâl soih uĕh ntŭk ntuh kơl, n'hao nău dơi tâm rlong bah n'gor mô hŏ geh nău rgâl kloh; pah kan trok tâm, đă ntrơn du du đêt trong nchrăp kan khlay hôm mbrơi, wăch rgum ntuh kơl hôm đêt… Lah ta rnôk ntơm pơk rơh hop, wa Dương Văn Trang, Bí thư Tỉnh ủy, Kruanh HĐND n'gor Kon Tum dăn đă ăp đại biểu rgum ƀư kloh ăp nău nchiăng khan, mpăng đêt n'hanh ntrŏng năl dơi  trong nkra bah tâm năm 2023.

VOV Tây Nguyên/Nuĭh rblang: Điểu Thân