VOV4.M’nông:   Rnôk dăch aơ ta n’gor Kon Tum ntoh âk nău doanh nghiệp n’hanh rnăk tăch rgâl ntuh kơl Ntŭk nkă ký Điện tử gay rwăt ndơ lŏ mir. N’hêl na nê̆ an saơ bah meng nkô̆ kơl nuĭh ƀon lan, ngăn lah ta nkual jru ngai, nkual rnoi mpôl đêt tăch ndơ lŏ mir ri ăp Ntŭk nkă ký điện tử aơ dôl ntoh âk nău tih khuch tât nău ƀư tăch rgâl n’hanh ƀư ji nuih.

Tỉnh lộ 678 hăn rlău 4 xă: Đăk Tờ Kan, Đăk Rơ Ông, Đăk Sao n’hanh Đăk Na nkuăl Tu Mơ Rông, n’gor Kon Tum jong knŭng 27 km yơn aƀaơ geh tât 10 Ntŭk nkă ký Điện tử rwăt ndơ lŏ mir. Tâm nĕ, êng lvang ta xă Đăk Rơ Ông rgum âk ngăn đah 5 ntŭk nkă ký. Wa Ngụy Đình Phúc, Kruanh rmôt, Rmôt mât uănh ntŭk tăch mrô 2, Ntŭk mât uănh ntŭk tăch rgâl n’gor Kon Tum an gĭt, uănh nđôi ngăn an saơ ăp ntŭk nkă ký điện tử rwăt ndơ lŏ mir aơ geh tih da đê:

          “Bôk năp lah ăp ntŭk nkă ký Điện tử khân pơng dŏng ký mô geh tem lĭr ndoh ndơ n’hanh uănh năl tĭng nău ntrŭnh. Ta ăp ntŭk rwăt ndơ lŏ mir mô an ntrŭnh rnoh khlay tĭnh nău ntrŭnh jêng lah rnoh khlay bah ăp Ntŭk nkă ký geh nău tih yor rĭ jêng nuĭh ƀon lan mbra khuch rnôk tăch bum. Mpôl hên dŭt ntôn đah nău uĕh tŏng bah ký mô đăp mpăn”.

Uănh nđôi saơ lĕ rngôch ăp Ntŭk nkă ký Điện tử geh tih da dê.

          Ndrel đah ăp nău tih tâm nău kan tăch rgâl, kơt: mô geh sam ƀŭt an tăch rgâl; ký mô geh ntô lĭr ndoh ndơ; mô tŏng n’hanh mô geh sam ƀŭt rhăch nău ntŭk nkă ký, tăch rgâl mô di ntŭk, mô geh ntrŭnh rnoh khlay rwăt.... 10 Ntŭk nkă ký Điện tử rwăt ndơ lŏ mir ta trong tỉnh lộ 678 hăn rlău 4 xă bah nkuăl Tu Mơ Rông geh âk nău tih kơt: ƀư trong tâm nthoi mô di tâm trong me têh, kuih trong mô đăp mpăn trong hăn nglăp Ntŭk nkă ký Điện tử, ndâk ƀư jay gŭ mô tâm di neh an ƀư trong hăn. Wa Nguyễn Thái Hoàng Anh, chuyên viên Thanh tra, N’gâng kan ntung trong nchoăt rdêng n’gor Kon Tum, an gĭt:

“Nău bôk năp lah ƀư trong tâm nthoi mô di nău way lăp trong me têh ma mô dơi nău an bah ngih pah kan dơi kan. Nău aơ mbra ƀư ăp nău tâm rkeh ntung trong ta ntŭk ma Ntŭk nkă ký aơ ƀư trong tâm nthoi. Bah meng nău aơ an lah kloh tay du nău lah tâm nău pă an tăch rgâl mô geh nău tâm ban. Di lah lor rnôk geh sam ƀŭt dăn tăch rgâl ri an geh sam ƀŭt boăt nthoi ri aơ lah ƀư rlơ̆ jêng aƀaơ an geh ăp nu nău kơt nĕ”.

Kơp uănh bah ngih pah kan dơi kan nkuăl Tu Mơ Rông an saơ, ta nkuăl aƀaơ geh 15 Ntŭk nkă ký Điện tử rwăt ndơ lŏ mir n’hanh dŭt âk lah rwăt bum bah nuĭh ƀon lan. Bah meng nkô̆ nău uĕh lah kơl nuĭh ƀon lan, ngăn lah ta nkual jru ngai, nkual rnoi mpôl đêt tăch bum ri ăp ntŭk nkă aơ hôm e âk nău tih khuch tât nău ƀư tăch rgâl n’hanh ƀư ji nuih tâm Nuĭh ƀon lan. Na nê̆ kơt rlăm đah nău jâk; nkŭm gưl rhiăng mô uĕh âk ƀư khuch an nuĭh ƀon lan; ndra ƀư vĭ vĕ gay nsâm rwăt (tâm rnôk ngih măy rwăt bah 2.300 tât 2.400 prăk/kg bum rih ri ăp Ntŭk nkă ký aơ knŭng rwăt bah nuĭh ƀon lan bah 1.800 tât 2.000 prăk/kg n’hanh đê̆ đŏng geh âk nău tih, khuch tât nău ƀư tăch rgâl n’hanh rnă njrăng ƀon lan, wa Phạm Xuân Quang, Groi Kruanh UBND nkuăl Tu Mơ Rông an gĭt, n’gâng kan ƀon lan nkuăl lĕ geh ntĭm rđău mpeh nău aơ:

Ntŭk nkă ký Điện tử ta thôn Mô Bành, xă Đăk Rơ Ông nglăp tih tâm neh an trong hăn.

“Nkuăl lĕ n’hao ntĭm rđău an ăp xă mât uănh rjăp mô an ăp Ntŭk nkă ntoh luh tay. Đah ăp Ntŭk nkă nkuăl lĕ geh nău ntrŭnh ri đă ăp ntŭk nkă ơm jêh sam ƀŭt sam tra tĭng di nău ntrŭnh n’hanh tĭng ăp nău ntrŭnh bah pháp luật. Hôm đah Ntŭk nkă tih ri mpôl hên lĕ mâp đah Thanh tra ntung trong geh tât bôk boăt nthoi. Jêh nĕ uănh di đăp mpăn ký đah rnoh khlay mpôl hên lĕ pah kan đah mât uănh ntŭk tăch rwăt ndrel đah Chi cục đo lường chất lượng N’gâng kan Khoa học gay mât uănh, uănh nđôi”.

Tâm 10 nkuăl, nkaul ƀon têh bah n’gor Kon Tum, knŭng kơp ta 2 nkuăl Tu Mơ Rông n’hanh Đăk Tô aƀaơ lĕ geh 32 Ntŭk nkă Điện Tử rwăt ndơ lŏ mir. Jêh uănh nđôi bôk năp bah Rmôt mât uănh ntŭk tăch mrô 2, Ntŭk mât uănh ntŭk tăch rwăt n’gor Kon Tum, N’gâng kan Khoa học n’hanh Công nghệ ndrel nău kan dơi kan 2 nkuăl aơ an saơ, lĕ rngôch ăp Ntŭk nkă ký Điện tử doanh nghiệp n’hanh rnăk tăch rgâl nglăp mô đăp mpăn ăp ntrŭnh. n’hanh yor mô ƀư tĭng uĕh trong mât uănh bah bah bôk năp jêng tât nău ăp ntŭk nkă ký Điện tử rwăt ndơ lŏ mir lĕ ƀư âk nău tih tâm nău kan tăch rgâl n’hanh đăp mpăn rnă njrăng ƀon lan an dơi mkra rgâl dâl./.

                    Nuĭh rblang: Y Sưng Phê Ja