VOV4.M’nông: Rơh rlau aơ tâm nau kan mât neh ntu tâm n’gor Kon Tum hŏ ntoh âk nau mô nâp, mô lah rŏng ma ƀư mô ueh. Nau khuch jêh nê ndrel ma nau mpŭng neh ntu, drăp ndơ bah Ngih dak, ƀư ƀon lan mô hôm geh nau rnơm tâm ăp nŭih pah kan mêt neh ntu bah nkuăl.

            Bah rnôk aơ 4 khay, tâm rnôk ƀư săm ƀŭt kơp dơn dơi dŏng neh bah rnăk gôl gŭ, yuh Nguyễn Thị Thanh Thuý tâm xã Chư Hreng, nkual ƀon têh Kon Tum saơ neh ngih nơm geh n’gâng kan pă tâm kơt ma rnoh lô, rnoh neh bah bu êng:

            ‘Rnôk ma gâp saơ ri gâp kŏ ƀư săm ƀŭt njoăl ân UBND xã. UBND xã ơh nau lah mô geh nau dơi gay ma rklaih. Đă gâp ƀư săm ƀŭt mbơh tât UBND nkuăl ƀon têh. Du khay hôm ma ê saơ UBND nkuăl ƀon têh ơh nau. Mhe nơh mâp cử tri gâp kŏ geh nau đă kŏ geh nau ơh lah nau aơ mô geh lah du nau khlay. Djăt ma đă gưl kan ba lơ lah geh nau dơi rklaih mô geh nau jêr. Ƀư kơt nê jêr, gâp hôm pah kan rong kon đŏng”.

            Mhe aơ, ta rơh rƀŭn tal 3, HĐND n’gor Kon Tum gưl XII, Bí thư n’gor uỷ, Kruanh HĐND n’gor Kon Tum Dương Văn Trang ôp nau kan UBND nkuăl têh Đăk Hà, nkuăl Đăk Hà ân saơ, săk wa Đỗ Trọng Lâm, tâm trong Hùng Vương manh neh ntơm năm 2017. Rnôk aơ tâm neh aơ wa Lâm hŏ tŏ bê tông lĕ ntŭk dak jăng, ndâk mpir gay ma ƀư kan tăch ndơ. Wa Ka Ba Thàng, Bí thư nkuăl Đăk Hà lah: Nau ngăn hŏ khuch tât nau rnơm bah n’gâng kan bah nkuăl:

            ‘Nŭih ƀon lan ta aơ saơ nau nê kơt lah n’gâng kan tâm nkuăl ma mô ân ri mô hôm geh trong ma, săk êng nơm hŏ ndâk nkra nau aơ ôh. Ndrel jêh rnôk hăn uănh tay ri ngăn lah nkuăl têh hŏ ƀư nau kan mô nâp. Rnôk ma saơ nau kan aơ ri mô năn rklaih ma ân păng aơ ndâk nkra ƀư jêng lah ƀon lan ntôn lah n’gâng kan tâm nkual hŏ kơl, mpôn ƀư ân”.

            Geh tât nau kan mât neh ntu tâm n’gor Kon Tum, tâm nar jêh lôch uănh mrô 222 lơ 18/2/2022 bah Thanh tra Chính phủ mbơh kloh âk nau mô dơi, nau tih, kơt: Lvang năm 2016-2019 UBND n’gor Kon Tum ân ƀư nau nchrăp dŏng neh bah 10 nkuăl, nkuăl ƀon têh, 85 nŭih jao neh mô geh tă leo tăch tâm nkuăl Đăk Hà, bôk nau ƀư kan tăch rgâl, pâl n’aih ndrel ngih tâm nkuăl têh yor Công ty Cổ phần Tập đoàn FLC hŏ pă săm ƀŭt kơp dơn nau dŏng neh, n’gâng kan mât ngih gŭ, drăp ndơ geh nsum ma neh ndrel nkah êng neh rlau 17.600m2, nau kan jao neh ân 43 nŭih tâm Khu đô thị mpeh ba dâng ntung Đăk Bla, nkuăl ƀon têh Kon Tum mô geh tâm rnoh ân ntrơn gŭ...Ndrel ma nê lah nau mô nâp, nau tih tâm nau kan rgum, mât nau rgum, sŏk lơn neh kŏ kơt lah nau mbrơi nau rklaih, ƀư mô đê̆ ƀon lan mô hôm rnơm tâm nau rmôt ƀư kan tâm nau mât neh ntu bah nkuăl. Yuh Phạm Thị Vân Kiều, ngih tâm nkuăl ƀon têh Kon Tum geh nau kol, ntoh nau:

            ‘Ăp ntŭk kŏ ân nau rgum ƀư. Nŭih ƀon lan ŭch geh rêh tâm neh khân păng nơm yơn rnôk aơ ƀư nau rgum ri ma mô hôm dơi nau kan, ri mô gĭt mhâm geh nau tâm rnơm yor lah ăp ntŭk kŏ rgum, ăp ntŭk kŏ sŏk nsĭt”.

            Wa Phạm Văn Trúc, cán bộ rlu ranh, tâm ngih mrô 217 Hùng Vương, nkuăl têh Đăk Hà, nkuăl Đăk Hà mbơh nau:

            ‘Trung ương ri pah kan nsôih rjăp, ƀon lan phung hên rnơm ngăn. Yơn đah du đê̆ nŭih ƀon lan, đah du đê̆ nŭih đảng viên tâm n’gor Kon Tum ri gâp saơ lah nau kan aơ đah n’gor ê geh uănh rjăp ngăn ôh. Âk nau kan kan tât hŏ ntoh đŏng jêh rnôk geh nau mêt uănh, jêh rnôk mêt uănh kŏ geh yơn nau ƀư nau rgum lôch bah nau mêt uănh nê ri kŏ ê geh dơi ƀư. Geh ntŭk hôm geh njêng ntoch jong ăp nkô̆ nau hôm geh nau jêr, mra rklaih mbrơi. Ŭch lah nau kan aơ ân geh ƀư tât dŭt tât lôch”.

            Êp aơ, tâm ăp rơh rƀŭn, kơt: Rơh rƀŭn tal 3, HĐND n’gor Kon Tum gưl XII, rơh rƀŭn tâm nchră bah UBND n’gor Kon Tum đah rmôt kan; Rơh rƀŭn bah n’gor uỷ Kon Tum nchră tât nau kan rgâl mhe hành chính, rgâl mhe nau kan ntŭk ntu ntuh kơl...rđau kan n’gor uỷ, HĐND, UBND n’gor hŏ ntoh nau nsôih tâm nau rklaih nau tih, rklaih nau kol, rklaih rjăp ăp nau hôm ƀư mô tâm di, lơh jêng nau nkol, nau mô ueh tâm rnôk ma ƀon lan, ntŭk kan tăch rgâl hăn ƀư ăp ntil săm ƀŭt geh tât neh ntu. Yơn lah, gay sŏk nau rnơm bah ƀon lan tâm nau kan mât ăp nau nau geh neh ntu ri knŭng nsôih tâm nau ngơi ma ƀư ri mô hŏ tŏng, ăp n’gâng kan, ntŭk kan, ăp gưl kan bah n’gor Kon Tum ân geh mât đăp mpăn nau nsôih, rđau bah gưl ba lơ ân geh lăp tâm nau kan “ba lơ duh tâm dâng n’ik” mô lah “goh gâr ma nchlơi lơi mâng goh”./.

                        Nŭih rblang: H’Thi