VOV4.M’nông:   Nău ƀư ntop kơl ntĭm nti, hun hao nuĭh kan an dak băl Lào lĕ dăch dêh tay nău tâm rnglăp, hăn ndrel têh Việt Nam-Lào.Âk năm bah năp n’gor Kon Tum lah ntŭk tât bah âk sinh viên dak băl. Đah ăp sinh viên Lào, ăp nuĭh djôt nău nsrôih hăn Việt Nam nti, djăt nău gĭt blău gay plơ̆ sĭt rgop soan ndâk njêng, hun hao neh dak ri Kon Tum, nkual neh hôm e âk jêr jŏt ta nkual Tây Nguyên kơt jêng ƀon tơm tal 2 bah khân pơng.

Ăp năm dăch aơ, Phân hiệu Đại học Đà Nẵng ta Kon Tum lah nău săch bah âk sinh viên Lào. Aƀaơ hin, nău hăn bah 4 n’gor mpeh bah dâng bâh dak băl, geh Attapeu, Sekong, Champasak n’hanh Saravane tât n’gor Kon Tum dŭt dơh. Ndrel đah Phân hiệu Đà Nẵng ta Kon Tum dôl ntĭm nti âk nău kan, kơt: Luật, tài chính, quản trị kinh doanh, kế toán... tâm di nău ŭch hun hao nuĭh kan bah băl. Aƀaơ Phân hiệu dôl geh 160 sinh viên Lào tĭng nti, tâm nĕ sinh viên dơi geh kơl prăk hăn nti bah n’gor Kon Tum, Gia Lai đah rnoh ntop kơl bah 2 n’gor lah 100% n’hanh bah Phân hiệu lah 50% prăk hăn nti. Ăp oh mô geh prăk kơl hăn nti kơt nti êng. Nai Võ Thị Thanh Thảo, Kruanh jrô kan pah kan kon hok, sinh viên, Phân hiệu Đại học Đà Nẵng ta Kon Tum an gĭt, ngih sam ƀŭt an âk nău uănh tât, kơl an ăp sinh viên Lào ntơm bah nar bôk năp ăp oh tât jâng ta Kon Tum.

        “Gay kơl ăp băl geh ntŭk tâm nđŭt nti nsơm ri ngih sam ƀŭt pă an ăp băl ta ntŭk ký túc bah sinh viên Việt Nam nta an ăp băl geh du ntŭk gŭ uĕh ngăn. Rlău ma mông ta jrô nti ri ăp băl dơi râng ăp nău gŭ âm bah sinh viên Việt Nam n’hanh lĕ rngôch ăp jrô kan, nău kan dơi kơl an ăp băl uĕh ngăn”.

Nai ndrel ăp sinh viên Lào ƀư kăt rse brai ta ty Tết way ơm Bunpimay

Đah ăp sinh viên Lào dôl nti ta Phân hiệu Đại học Đà Nẵng ta Kon Tum, tâm rnôk rlău 2 năm srê Covid-19 ntoh âk lah nău nkah gĭt mô dơi chuêl đah ăp oh. Srê ƀư sinh viên Lào mô dơi sĭt khâl jay kơt đêt ăp nău ƀư gay đăp mpăn trong kan njrăng n’gang srê. Ăp nai, tâm lvang aơ lĕ jêng nuĭh bơ̆, nuĭh mê̆ nkre ntrŭt nsôr nuih n’hâm, nkre ntop kơl ăp oh nti nsơm.

Bu ur sinh viên Vongkhamlar Thipphada, jay ta n’gor Saravane dôl nti năm tal 4, nău kan Luật kinh tế nkah gĭt tay, oh dŭt ndrăt rnôk dơi wơt Tết way ơm Bunpimay, dơi râng wơt năm mhe, kăt rse brai n’hanh njroh lăm vông ta Việt Nam. Saơ ăp oh sinh việt Lào mô dơi sĭt dak wơt tết, ăp nai lĕ kơl ăp oh dơi rêh tâm mông nar rgum mât bah ƀon tơm gay n’hŭch oi nkah gĭt jay. Bu ur sinh viên Vongkhamlar Thipphada lah:

“Nai, ngih sam ƀŭt ƀư Tết Lào an mpôl oh ta Việt Nam dŭt uĕh n’hanh dăch dêh. Geh an ndơ an mpôl oh tay. Nkah gĭt jay yơn ma saơ nai đah aơ dơh lơn. Nai kơl mpôl oh dŭt âk. Mpôl oh jêr jŏt moh ndơ lah đah nai dơi nai kơl mpôl oh lĕ rngôch”.

Sinh viên Lào ƀư nklâm ƀănh chưng tâm rơh Tết way ơm Việt Nam.

Đah nău ntop kơl bah ăp nai Phân hiệu Đại học Đà Nẵng ta Kon Tum, lĕ rngôch ăp sinh viên Lào gơih nti n’hanh wât uĕh. Thongkhamsouk Koungthong, sinh viên năm tal 4, nău kan Công nghệ thông tin an gĭt, jay oh ta n’gor Champasack, Mê̆ bơ̆ ƀư lŏ mir jêng wăng sa rnăk wâl jêr jŏt. Bah nău nsrôih săk oh dơi hăn Việt Nam nti tĭng nău ŭch bah nơm. Dơi nti, rlău rlău nău ngăn tâm ntŭk ntô uĕh, geh âk nău rgum mât bah nai, băl mpôl Thongkhamssouk Koungthong nsrôih nti n’hanh saơ nsing nơm tâm săk nơm. Thongkhamssouk Koungthong nkoch nău mĭn n’hanh lĕ nău nchrăp tâm rgŏ năp bah nơm:

“Ăp băl Việt Nam đah mpôl oh ri uĕh ngăn moh ndơ geh kơl đah nău nti nsơm. Nău kan aơ oh saơ nkôp đah nău kan êng jêr yơn oh an nsrôih nti dơi. Đah oh lah nti ta Việt Nam uĕh lơn mpeh Lào hôm. Oh saơ công nghệ thông tin aƀaơ dôl hun hao n’hanh geh âk công ty dôl ŭch nuĭh nti nău kan công nghệ thông tin. Oh mĭn bah kơi aơ jêh nti oh mbra dăn kan ta Lào. Oh mbra nkoch ăp oh mhe tốt nghiệp ta Lào mbra nkoch nti ta Việt Nam uĕh lơn”.

Nai Phân hiệu Đại học Đà Nẵng ta Kon Tum ƀa ƀơ tâm rgâl nău nti đah sinh viên Lào.

N’hêl na nê̆ an saơ nău ntop kơl ntĭm nti, hun hao nuĭh kan an neh dak băl Lào du rup ndah uĕh bah nău tâm rnglăp, dăch dêh, du nuih n’hâm têh Việt Nam-Lào. Ăp ngih sam ƀŭt Cao đẳng, Trung cấp bah n’gor Kon Tum n’hanh aƀaơ geh tay Phân hiệu Đại học Đà Nẵng âk năm bah năp lah ntŭk tât bah âk sinh viên dak băl Lào. Đah âk nuĭh mom bah neh dak rkeh rveh hăn tât Việt Nam nti, wât âk nău gĭt gay plơ̆ sĭt rgop soan ndâk njêng, hun hao neh dak Lào ri Kon Tum, nkual neh hôm e âk jêr jŏt ta nkual Tây Nguyên kơt du nău ơm lĕ jêng ƀon tơm tal 2 bah khân pơng./.

                    Nuĭh rblang: Y Sưng Phê Ja