Ta n’gor Kon Tum nau kan nchrăp ân rơh thi tốt nghiệp THPT năm 2023 dôl geh n’gâng kan ndrel ntŭk kan ntĭm nti tâm nkuăl ntrŭnh ƀư rjăp, ndal, ƀư jêh ăp ntrong, ăp nau kan gay mât đăp mpăn nau dơi thi ân geh đăp mpăn, rjăp, nâp. Gay rơh thi geh đăp mpăn, rjăp, geh nau dơi, tât rnôk aơ, Rnâng kan rđau ân rơh thi tốt nghiệp THPT n’gor Kon Tum năm 2023 geh ƀư ăp nau mêt uănh ân nau nchrăp kan tâm 12 ntŭk, nkuăl ƀư nau sao, in đề thi, ƀư nau ntĭm mbơh nau kan thanh tra thi tốt nghiệp THPT ân cán bộ, nau nti ƀư nau kan uănh thi, chấm thi.

Ndrel đah nê N’gâng kan ntĭm nti rđau ăp rmôt ngih săm ƀŭt lŏ ƀư ueh nau kan ôn tập, mbơh ntĭm ân kon se râng rơh thi, ngăn lah ăp ngih săm ƀŭt geh âk kon se rnoi mpôl đê̆. Rơh thi tốt nghiệp THPT năm aơ n’gor Kon Tum geh 5.024 kon se, hao 273 kon se rđil năm e. Tâm nê, rlau 4.800 kon se râng thi bôk nau kan ntĭm nti THPT ndrel rlau 160 kon se râng thi bôk nau kan ntĭm nti ƀa ƀơ. Rnoh kon se rnoi mpôl đê̆ râng thi geh 1.700 oh, kon se dah rŏng êng bơi tât 220 oh. N’gor Kon Tum hŏ ndâk 12 ntŭk thi, tâm nê geh 5 ntŭk ta nkuăl ƀon têh Kon Tum, 7 ntŭk tâm ăp nkuăl ndrel nŭih uănh thi lah rlau 900 nŭih./.