Tâm nar duh hô bah khay 3 Tây Nguyên, nô A Ngực, Bí thư Chi bộ, kruanh thôn Đăk Rô Gia, xă Đăk Trăm, nkuăl Đăk Tô, n’gor Kon Tum hôm e hao yôk uănh nđôi trong kan kâp njrăng ŭnh sa bri. Nô A Ngực an gĭt, nsum mpôl thôn dơn mât njrăng bri 240 ha bri bah Công ty TNHH du ntŭk kan lâm nghiệp Đăk Tô. Jêh âk khay mô mih ntop đah trôk duh, knŭng geh du rneh hŭnh tŭp tâm bri jêng ŭnh ntŭi yor rĭ mô dơi thơ tha:

 “Chi bộ n’hanh nău kan dơi kan thôn tâm rgop đah lâm trường ăp nar geh pă kâp njrăng ŭnh sa 2 hê ta ntŭk. Hăn uănh nđôi bri lah 10 nuĭh, nău ŭch lah mô an ăp nuĭh hăn tâm bri joi sŭt mô lah hăn joi nkao phong lan thôn mô an da dê”.

Xă Đăk Trăm, nkuăl Đăk Tô, n’gor Kon Tum aƀaơ geh 2.000 ha bri hon êng n’hanh bri tăm bah 3 ntŭk tơm bri. Bah âk nar aơ lĕ rngôch rnoh enh bri aơ ta rnoh mbơh njrăng klach ŭnh sa gưl 5-gưl dŭt klach. Wa Trương Đình Tuệ, Kruanh UBND xă Đăk Trăm an gĭt, trong kan njrăng n’gang ŭnh sa bri dôl dơi n’gâng kan xă dŭt uănh tât:

“Tâm rnôk duh nar hô kơt aƀaơ, Rmôt kan ăp nău kan mât uănh njrăng bri ƀa ƀơ đă rmôt kâp njrăng ŭnh sa puh nset ŭnh. Tâm rgop đah ăp ntŭk kan tơm bri n’hanh mbơh ƀư nuĭh kiểm lâm ta ntŭk, công an, tahen xă uănh nđôi. Ntĭm nti ăp thôn, ăp rmôt, cán bộ công chức xă hăn uănh nđôi, ntrŭt đă ăp rnăk geh mir êp bri lor rnôk rwach su nja geh sam ƀŭt mbơh gay đă rmôt kan kâp mkra ngăch nu nău ntoh tâm rnôk su mir”.

          Ta Gia Lai, nuĭh ƀon lan, tơm bri, rmôt kan dơi kan dôl nsrôih njrăng n’gang bri tâm yan wai. Nsum mpôl thôn 1, xă Hà Tam, nkuăl Đăk Pơ dơn mât uănh, njrăng bri bơi 260 ha bri bah ban Mât uănh bri njrăng n’gang phŭt sial Bắc An Khê. Gay nchrăp njrăng n’gang, xă Hà Tam lĕ ndâk njêng ăp rmôt mât uănh, pă âk ntŭk kâp uănh nđôi njrăng n’gang bri. Lơn lah, ntŭk kan geh tât ƀư su lor geh uănh nđôi âk ha ta ăp nkual geh dơh ŭnh sa. Wa Phạm Đông Mạnh, thôn 1, xă Hà Tam, nkuăl Đăk Pơ, rnăk dơn jao mât njrăng bri an gĭt:

          “Ăp rmôt bah 2 tât 3 nuĭh hăn uănh nđôi 24/24, rnôk geh nău mpôl hê mbra mbơh tay an mpôl mât uănh bri Bắc An Khê gĭt n’hanh mpôl hên mbra rgŏ jă lĕ rngôch rnoh nuĭh mkra đah trong 4 ta ntŭk geh rmôt ta ntŭk, ntĭm rđău ta ntŭk, ndoh ndơ ta ntŭk, nuĭh ta ntŭk, mpôl hên ƀư rjăp, tâm rgop uĕh gay mkra ăp nău geh tât”.

Mpôl mât uănh bri njrăng n’gang phŭt sial Bắc An Khê (nkuăl Đăk Pơ, n’gor Gia Lai) aƀaơ dôl mât uănh rlău 10.000 ha bri, tâm nĕ rnoh neh bri hon êng geh 3.600 ha, bri tăm nklăp 1000 ha. Ntơm bah bôk năm, ntŭk kan nâp nâl tay mpôl ntĭm rđău njrăng n’gang ŭnh sa bri kơt nâp nâl tay 4 rmôt nsum mpôl nkre dơn mât, nkre rmôt njrăng n’gang ŭnh sa bri. Wa Lê Thái Hùng, Groi Kruanh Mpôl mât uănh bri njrăng n’gang phŭt sial Bắc An Khê, nkuăl Đăk Pơ n’gor Gia Lai an gĭt, ntŭk kan n’hao trong kan uănh nđôi, đă cán bộ kâp ndrel ăp rmôt dơn bri ƀa ƀơ kâp ta ăp ntŭk hô ŭnh sa gay saơ, mkra ngăch ăp ntŭk geh ŭnh sa. Nkre ndâk njêng ăp rmôt, rmôt njrăng n’gang ŭnh sa bri đah rmôt hao tât hang rhiăng nuĭh. Ntŭk kan mbơh ƀư ăp trong kỹ thuật kơt nja si, ƀư trong n’har n’gang ŭnh đah ăp rnoh neh bri geh ŭnh sa âk.

Ntŭk kan n’hao trong kan uănh nđôi, kâp đah ăp rmôt dơn jao bri tâm rgop đah n’gâng kan ta ntŭk n’hanh ăp nău kan nsum mpôl tâm trong kan nkoch trêng, tâm rgop rnôk geh ŭnh sa bri ri mbra rgŏ jă rmôt ngăch. Bah meng nĕ UBND n’gor n’hanh ăp nău kan geh tât nta nơih an ƀư tĭng ăp trong su lor geh ƀĭt joet gay n’hŭch geh nău ŭnh sa bri, n’hŭch đêt ngăn nău ŭnh sa bri geh tâm yan wai”.

Hôm nkuăl Đăk Pơ, n’gor Gia Lai aƀaơ dôl mât uănh bơi 24.000 ha bri, tâm nĕ geh rlău 19.000 ha bri hon êng. Hạt Kiểm lâm nkuăl Đăk Pơ lĕ ndâk ƀư trong nchrăp njrăng n’gang ŭnh sa bri n’hanh ntrŭt đă tay ăp mpôl ntĭm rđău njrăng n’gang puh nset ŭnh sa bri gưl nkuăl, xă; n’hao trong kan nkoch trêng rgŏ jă, ƀon lan, uănh nđôi ăp ntŭk kan tơm bri, UBND ăp xă gay pah kan  njrăng n’gang ŭnh sa bri geh săk rnglăy âk.