VOV4.M’nông- Ta Kon Tum tâm ba năp nơh nuh srê COVID-19 lĕ ƀư an âk nuĭh kan buĭh rnoi đê̆ rlu kan, roh nău kan n’hanh jêr joi nău kan. Rêh nsum đah nuh srê, ăp ntŭk kan têh ta Kon Tum dôl ntrôl dăng nău pah kan mbơh tơih, mbơh kơl an nuĭh pah kan joi nău kan, mât đăp mpăn nău rêh jêng n’hanh ƀư lôch nău nchrăp ngluh kan tâm năm aơ, lah joi pă nău kan an 6.200 nuĭh pah kan dŭt âk lah rnoi đê̆.

Geh ƀư ta du nar dŭt khay 2 mhe nơh, rơh ôp nău, mbơh nău kan, nti nău kan năm 2022 yor ntŭk kan mbơh pă nău kan n’gor Kon Tum leo ƀư ta xã Sa Nghĩa, nkuăl Sa Thầy geh bơi tât 100 nuĭh pah kan ta ntŭk tât râng. Wa A Tran, jay ta ƀon Đăk Tân an gĭt, rnôk geh nuh srê Covid-19 ntoh luh âk, nuĭh kon bôk năp bâh wa ƀư pah kan ta Bình Dương rlu kan plơ̆ sĭt ta ntŭk. Aƀaơ nuĭh kon tal 2 lĕ tŏng 18 năm deh, wa an geh joi nău kan an kon păng nơm.

Rnăn vâl gâp ƀư rlău 1 rbăn tơm cà phê, 7 hê kon jêr jŏt đŏng. Ŭch lah ăp oh kon păng hăn kan gay ma geh prăk dŏng. Ŭch lah doanh nghiệp kơl an jay gŭ, ndeh hăn, tal 2 lah prăk khay âk oi”.

Tât rơh ôp nău, yuh Y Hương tâm ban kơt ăp nuĭh pah kan êng tâm xã Sa Nghĩa lĕ geh ŭch joi nău pah kan tâm di, nău geh đăp mpăn gay ma rgâl nău rêh jêng.

“Jay gâp rĭ ƀư mir cà phê geh 3 sào, aƀaơ dôl dŭt jêr jŏt ngăn, bâh geh ntŭk kan mbơh nău an nău kan đăp mpăn. Lah ma geh rĭ tâm n’gor, pah kan ngai rĭ dŭt jêr ngăn”.

         Tâm ba năp nơh, âk doanh nghiệp lĕ geh njoăl săm ƀŭt tât sở lao động, thương binh n’hanh xã hội n’gor Kon Tum bâh geh kơl dŏng săch nuĭh kan đah lĕ rnoh tât 10 rbăn nuĭh kan. Ta n’gor ŭch geh dŏng nuĭh kan bâh ăp doanh nghiệp lĕ hao âk đŏng. Yơn lah dŭt âk nuĭh kan ŭch geh nău kan lah rnoi đê̆ jêng lah săch ăp doanh nghiệp geh nău dơi pah kan, nău kơl ueh gay ma mbơh ôp, mbơh nău kan n’hanh ntĭm nti, nti nău blău kan an nuĭh kan. Wa Nguyễn Thị Nga, Giám đốc ntŭk kan mbơh joi nău kan n’gor Kon Tum ngơi.

“Ê lor geh ndơ̆ nuĭh kan hăn kan ta ăp n’gor rĭ an geh mbơh ôp nău, ntĭm nti, nău blău kan an nuĭh kan ê lor tâm mâp ta ntŭk kan. Tâm mbơh ngơi rnôk rêh nsum. Nău pah kan tâm nkual công nghiệp, mbơh tơih an ƀon lan nău dơi, nău kơl, nău dơn kan rnôk hăn pah kan ta ăp doanh nghiệp. Ngăn lah he pah kan đah ăp ntŭk kan mbơh pă nău kan bâh n’gor băl tâm ban kơt ăp doanh nghiệp gay ma pă nău kan ntŭk gŭ rêh đăp mpăn an ƀon lan.

Ndrel đah nău kơl an nuĭh pah kan joi nău kan, aƀaơ ăp ntŭk kan têh ta Kon Tum lĕ dôl geh mât du đê̆ nău kơl an, ntrŭt đă, nsơm nuih n’hâm nuĭh pah kan, kơt lah: kơl prăk test Covid-19, kơl prăk ndeh, prăk sa rgŏ trong n’hanh đă nuĭh ntĭm nti ndơ̆ nuĭh kan tât ntŭk pah kan. Tâm rnôk nuĭh pah kan dôl pah kan ta ăp ntŭk, doanh nghiệp dak bah dih n’gor, ntŭk kan têh ta n’gor Kon Tum mbra ƀa ƀơ tâm rgop đah nuĭh kan gay ma gĭt mpeh nău dơi pah kan, nkre lah kơl ngăch an nuĭh kan rnôk geh nău kop ji mô lah geh nău khlăy tâm rnăk vâl.

Nuĭh rblang: Thị Đoắt