Kon Tum lah n’gor geh ndơ hun hao wăng sa- rêh jêng kon nuĭh dŭt jêr jŏt rđĭl đah ăp n’gor tâm nkual Tây Nguyên. Gay tât ăp rnoh hun hao ma Đại hội Đảng bộ n’gor tâl XVI, năm kan 2020- 2025 n’gluh, ăp gưl n’gâng kan, nsum mpôl doanh nghiệp n’hanh nuĭh ƀon lan tâm n’gor rlău n’gul năm kan aơ hŏ nsrôih mbluh soih, njêng tơm prăk ntuh kơl, wăch rgum tơm ndơ ntrŭt ntrôl hun hao wăng sa- rêh jêng kon nuĭh.  

     Năm 2022 mhe aơ nkuâl n’har bri Ia H’Drai geh bơi 690 rnăk klaih rlău ach o hŭch rlău 20% rnoh rnăch ach o rđĭl đah năm 2021, lah ntŭk geh rnoh âk hŭch rnăk ach o dŭt âk n’gor Kon Tum.  Yuh Phan Thị Sương, jay ta Thôn 1, xã Ia Tơi, nkuâl Ia H’Drai an gĭt bar hê ur sai yuh ƀư công nhân cao su, geh prăk khay đăp mpăn. Nănh manh tơm prăk ngân hàng tĭng rơh, ăp rơh 150 rkeh prăk, yuh nô ntuh kơl mât ndrôk deh kon, tăm tay 2,5ha cà phê, rlău 3ha tơm sa play… Nơm geh kơt nê năm n’hâp lĕ prăk dŏng kan rnăk yuh hôm nsĭt geh bah 250 tât 300 rkeh prăk:    

“Rnăk gâp dŭt jêr  jŏt yơn hôm nănh manh prăk bah ngân hàng mpeh mât rong ndrôk gay an hun hao wăng sa hao. Nơm geh kơt nê tơm prăk ngân hàng an manh mpeh mât rong ndrôk, tơm prăk nta joi nău kan ntuh kơl tăm sầu riêng, tơm cà phê, tơm sa play tât aƀaơ wăng sa rnăk gâp dŭt rhơn nđơr,  geh hao. Lah mô geh tơm prăk manh bah ngân hàng chính sách n’hanh geh n’gâng kan ta aơ kơl mât uănh nău rêh an ƀon lan mpôl hên mô geh ndơ kơt aƀaơ”.

        Lah nkuâl n’har bri bah n’gor Kon Tum, nău hun hao wăng sa- rêh jêng kon nuĭh, n’hao nău rêh an nuĭh ƀon lan way lah nău dơn kan rgum tơm dơi ăp gưl ủy Đảng, n’gâng kan nkuâl Ia H’Drai an lor tĭng ƀư. Ntop kơl ƀon lan tât dơi đah ăp tơm prăk manh hun hao wăng sa, lơn âk rnăk ach o, dăch kêng ach o tâm nkuâl geh tơm prăk gay ƀư njêng tuch tăm n’hanh nău rêh. Wa Đinh Văn Trung, Giám đốc Jrô kan an manh Ngân hàng Chính sách Xã hội gŭ kan ta nkuâl Ia H’Drai, an gĭt:

“Tơm prăk an manh thuk hŏ nta an rlău 2.000 rnăk ach o n’hanh nuĭh dơi kơl tâm săk an manh tơm prăk đah lĕ rngôch n’gluh geh an manh rlău 173 rmen prăk. Tât dơi đah tơm prăk manh dja ăp rnăk ach o dŭt rhơn nđơr ntuh kơl tâm ntil si tăm tâm di đah neh ntu nkual dja. Bah tơm prăk manh ăp rnăk ƀon lan tĭng ƀư di ăp trong ƀư tuch tăm tăch rgâl nsĭt tay nău geh wăng sa âk”.

        Tâm rnôk wăng sa- rêh jêng kon nuĭh khuch hô tă bah nuh srê Covid-19, gay mbluh soih, nta tơm prăk ntop kơl doanh nghiệp, nuĭh ƀon lan rdâk tay nău kan tuch tăm, tăch rgâl, n’gor Kon Tum hŏ kan nsum lhăt đah ăp rmôt an manh đăp mpăn tĭng jăp ăp quy định mpeh deh prăk kon rgum tơm prăk; an tĭng ƀư ngăch, geh nău tam trong nchrăp ntop kơl deh prăk kon, njong rnon… Kơp tât khay 5/2023 lĕ rngôch geh tơm prăk n’gluh an manh ta n’gor Kon Tum geh rlău 43.300 rmen prăk. Dăp rgum an manh tâm nău kan tuch tăm tăch rgâl, ăp nău kan săk geh bah n’gor n’hanh ăp trong kan an ƀư lor tĭng trong nchrăp bah Chính phủ. Rlău 2 năm aơ n’gor Kon Tum geh 630 doanh nghiệp njêng mhe đah lĕ rngôch tơm prăk điều lệ nklăp 13.100 rmen prăk. N’gor hŏ wăch rgum geh 68 trong nchrăp ntuh kơl đah lĕ rngôch tơm prăk đăng ký rlău 18.000 rmen prăk. Wa Huỳnh Thanh Tú, Groi kruanh Hội doanh nhân mom n’gor Kon Tum, an gĭt ndrel đah mbluh soih tơm prăk, nău wăch rgum ntuh kơl dơi âk nuĭh ntuh kơl dôl lah suan ntrôl nsum mpôl doanh nghiệp mom bah n’gor hun hao:

“Mpôl hên rnê dŭt âk nău nsrôih bah kruanh rđău kan n’gor, n’gâng kan ta ntŭk tâm nău rgâl dơh uĕh ntŭk ntuh kơl, ntop kơl doanh nghiệp. Rnôk wăch rgum ăp nuĭh ntuh kơl têh mpeh n’gor Kon Tum ri mpôl hên lah ăp nuĭh ƀư ndranh ntop kơl mô lah ăp doanh nghiệp rhŏ dŏng an ăp nuĭh ntuh kơl dja ri mpôl hên dơi geh dŏng”.

       Tâm rlău 2 năm aơ, ndrel đah nău rgum, wăch rgum ntuh kơl dơi tơm prăk ntuh kơl bah dih ngih dak, n’gor Kon Tum hŏ dŏng geh nău tam tơm prăk ntuh kơl ngih dak gay rƀŏng trong ntrŭt ntrôl hun hao wăng sa- rêh jêng kon nuĭh. Đah lĕ rngôch tơm prăk ntuh kơl ngih dak năm 2022 lah rlău 3.200 rmen prăk, năm 2023 rlău 4.700 rmen prăk, UBND n’gor Kon Tum tĭng ƀư lĕ n’hâm suan ăp trong nkra ntrŭt ntrôl ngăch tĭng ƀư ăp trong nchrăp ntuh kơl, nkre n’hao dăng hăn ôp uănh, groi nđôi, đăp mpăn nău dŏng tơm prăk geh nău tam. Wa Lê Ngọc Tuấn, Kruanh UBND n’gor Kon Tum an gĭt, n’gor dôl njêng săk têl nkah uĕh tâm trong rgâl dơh soih ntŭk ntuh kơl tăch rgâl n’hanh hun hao wăng sa- rêh jêng kon nuĭh:  

“Rnoh nău dơi tâm rlong PCI bah n’gor Kon Tum năm 2022 hao 24 gưl rđĭl đah năm 2021 n’hanh dăp 37/63 n’gor, nkual ƀon têh. Tâm quý I ngăch hun hao GRDP bah n’gor Kon Tum lah 6,82% rđĭl  đah ndrel khay dja năm e nơh dŭt âk ăp n’gor ta nkual Tây Nguyên n’hanh dăp tâl 23 bah lam dak. Ăp trong kơl mpeh đăp mpăn lam rêh jêng kon nuĭh n’hanh n’hŭch ach o dơi an ƀư ăp tŏng, năn ngăch, di quy định rgop dâk hun hao tay wăng sa- rêh jêng kon nuĭh”.  

        Lôch rlău 2 năm an tĭng ƀư Nghị quyết Đại hội Đảng bộ n’gor tâl XVI, năm kan 2020- 2025, hun hao wăng sa- rêh jêng kon nuĭh n’gor Kon Tum hŏ dâk hao tay n’hanh hun hao ngăch lôch bah nuh srê COVID-19. Lĕ rngôch ndơ geh ƀư lam rêh jêng kon nuĭh ta n’gor lvang năm 2020- 2022 hao mbơm oi, rĭng geh 8,45%/ năm. Dăp rgum wăng sa rgâl tĭng trong nsrôih uĕh, hŭch mbrơi ăp n’gâng kan tuch tăm, si gle, tui ka. Sŏk geh ngân sách bah 3.000 rmen prăk năm bôk năp năm kan rlău 4.000 rmen prăk. Rĭng geh tĭng bôk nuĭh hao ntơm bah rlău 43 rkeh hao tât rlău 52 rkeh prăk 1 năm. Ntơm bah du n’gor jêr jŏt bah nkual Tây Nguyên, Kon Tum dôl nsrôih nsan hao dăng./.