VOV4.M’nông – N’gâng kan ntĭm rđău Tahen n’har bri n’gor Kon Tum tâm rgop đah gưl ủy, n’gâng kan ƀon lan lĕ hăn ƀư bôk nău kan “Nar rgum mât njrăng n’har bri lam ƀon lan năm 2022” ta 13 xă n’har bri kâng n’har 2 dak băl Lào n’hanh Campuchia. Ndrel đah uănh lah tay nău ƀư tĭng ntĭm đă bah Chính phủ mpeh nău ƀư ntrong leo lam ƀon lan râng mât njrăng ƀư tơm neh ntu, rnă njrăng n’har bri neh dak, Nar rgum rnê rhơn âk ntrong kan hun hao wăng sa-rêh jêng, rgâl nău mĭn trong kan lĕ dơi ƀư kơl nuĭh ƀon lan nkual n’har bri.

An ndơ an rnăk ach o tâm “Nar rgum mât njrăng n’har bri lam ƀon lan".

Di rơh aơ, N’gâng kan ntĭm rđău Tahen n’har bri n’gor Kon Tum n’hanh gưl ủy, n’gâng kan ăp ntŭk lĕ an 2 mlâm jay tâm rnglăp, du ntrong kan mât ndrôk me deh kon; 120 nklâm ndơ an rnăk ach o; an jay, kơl ntop kơl an 90 kon hŏk ach o, nkre rnê nkhôm âk rmôt, êng nuĭh geh nău kan uĕh tâm ntrong leo mât njrăng n’har bri neh dak.

Nŭih blang: Y Sưng Phê Ja