VOV4.M’nông- nău mbơh bâh UBND nkuăl Kon Plông, n’gor Kon Tum an saơ, bol ma ê hŏ geh dơn ăp nău khuch khat êng, yơn ăp rơh n’gơ neh,  geh tâm mhe nơh ta nkuăl lĕ ƀư an ƀon lan klach rvê. Ndrel đah nău dăn đă ăp ntŭk kan ba lơ, ăp nuĭh kan khoa học ơm uănh năl nkô̆ nău, n’gâng kan nkuăl lĕ leo kan rdâk njêng trong njrăng, n’hao nău uănh nđôi, mbơh tơih gay ma ƀon lan gĭt nău mbơh nĕ, bâh nĕ leo kan ueh lơn tâm nău rdâng đah rơh n’gơ neh.

Geh tât nău n’gơ neh, ta nkuăl Kon Plông, mhe aơ UBND n’gor Kon Tum lĕ dăn đă công ty Cổ phần Thủy điện Vĩnh Sơn-Sông Hinh n’hanh công ty cổ phần thủy điện Đăk Drinh uănh kơp tay nău đăp mpăn ta dak bât bâh nău di mât uănh, nchrăp na nê̆ ăp mpôl pah kan, ndeh klư, ndơ dŏng, ndơ pah kan gay ma ngăch rmal rnôk geh nău tât ndal, mât đăp mpăn ngăch kơl an bâh bôk năp geh saơ nău tât ndal, ngăn lah geh nău tât roh đăp mpăn ta dak bât, ntŭk bât dak.

Nuĭh rblang: Thị Đoắt