Nar nkoch trêng nău ƀư Mông Play neh năm 2023 yor Đoàn bah dâng Công ty Điện lực Kon Tum ƀư wăch rgum tât râng bah rlău 900 oh kon hŏk Ngih sam ƀŭt TH-THCS Đăk Blà, nkual ƀon têh Kon Tum. Nău ŭch ngăn lĕ rngôch ăp nău ôp tâm nău ôp răm geh nkhôm geh tât nău ntêm nkrem điện, kơt: dŏng điện ntêm nkrem tâm jrô nti, rnăk wâl; gĭt năl ndơ dŏng điện; săch dŏng ndơ ntêm nkrem điện... ăp oh kon hŏk ơh di n’hanh ngăch kloh rah wah. Oh Chu Thị Thanh Tuyền, kon hŏk jrô 9D, an gĭt:

“Jêh nău ƀư aơ oh lĕ wât kloh lơn mpeh nău uĕh bah Mông Play neh gay ntêm nkrem điện mât njrăng ntŭk ntô bah geh rgâl duh trôk nar. Oh geh âk nău ƀư gay ntêm nkrem điện ntĭt nsa kơt ta ngih sam ƀŭt mô lah ta jay nsĕt ăp ndơ điện rnôk mô dŏng tât, kơt luh bah dih jrô nti lah nset điện, nset quạt, nset tivi. Oh mpŏng ăp nău ƀư jêt nĕ mbra rgop an mât njrăng ntŭk ntô gŭ âm bah geh rgâl trôk nar”.

Đah nău ƀư tơm khlay, nău kan điện Kon Tum lĕ geh âk trong ƀư nkoch trêng, rgŏ jă dăch êp đah nuĭh ƀon lan. Năm aơ mĭn nuĭh nkoch trêng lah ăp oh kon hŏk, ntŭk kan tâm rgop đah ngih sam ƀŭt ƀư ăp nar nti bah dih ngih sam ƀŭt an ăp oh. Ndrel đah nĕ nkoch trêng đah panô, áp phíc, băng rôn... n’hanh ta Trang Web, mạng xã hội, trang fanpage. Jrô kan tăch rgâl Công ty tâm rgop đah Đoàn thanh niên tâm rgop ƀư tĭng bôk nău kan “Hăn ndrel đah oh tât ngih samƀŭt” tâm rgop nkoch trên nău ƀư Mông Play neh 2023. Du nău ƀư tâm bôk nău kan rêng hvi têh dăng nău mbơh “Ntêm nkrem điện-Jêng bên”. Wa Nguyễn Quang Hùng, Groi Giám đốc Công ty Điện lực Kon Tum an gĭt, ntŭk kan mpŏng rêng hvi uănh khlay bah nău ƀư “Ntêm nkrem điện-Jêng nău bên” tât êp lơn tâm ƀon lan, lơn lah ăp oh kon hŏk. Bah nĕ, rêng hvi nău mbơh aơ tât rnăk wâl, băl bên, nuĭh bên n’hanh lơn lah lam nău rêh kon nuĭh. Tă bah ăp nău ƀư nkoch mbơh, lĕ geh âk nău rgâl uĕh tâm nău wât kơt nău ƀư bah nuĭh ƀon lan mpeh dŏng điện ntêm nkrem gay mât njrăng ntŭk ntô gŭ âm njrăng n’gang rgâl trôk nar phŭt sial.

“Nkoch trêng ntêm nkrem điện kơt ƀư tĭng Mông Play neh lah trong kan ƀư tĭng ƀa ƀơ. Công ty Điện lực Kon Tum mĭn njêng ăp trong ƀư, ăp nău ƀư dơh lăp tâm nău wât bah nuĭh ƀon lan, geh âk bôk nău kan êng ta ăp nkual. Ăp rnăk kơt ăp doanh nghiệp aƀaơ lah rgum tâm trong kan ntêm nkrem điện gay n’hao săk rnglăy nău kan bah ăp doanh nghiệp. Đah ăp rnăk rnoh gĭt wât mpeh ntêm nkra dơi hao đŏng”.

Tă bah nău ƀư Mông Play neh 2023, rnoh điện ntêm nkrem geh bah n’gor Kon Tum lah 2.400 kwh. Nău aơ dơi geh n’hâm soan rêng hvi têh dăng bah ăp nău ƀư tâm tĭng Mông Play neh 2023. N’hanh nău dôl rhơn nău ƀư ntêm nkrêm điện mô knŭng rlu ta du mông măng nar prao, pơh dŭt khay 3 ăp năm geh nău ƀư Mông Play neh, ma jêng nău ƀư ƀa ƀơ ăp nar.