VOV4.M’nông: N’gor Kon Tum aƀaơ geh rlău 6.200 nuĭh koet nte n’hanh dŭt âk tâm rnoh ăp nuĭh mô lap aơ lĕ mô ŭch đah nău rêh, nsing nơm hao ƀư tơm nău rêh, ƀư tơm nău rêh bah nơm.

Yuh Nguyễn Thị Kim Trúc, 49 năm deh an gĭt, 23 năm bah năp đah mpang jâng mô dơi hăn, yuh bah ƀon tơm Bình Định hăn Kon Tum joi nău rêh. Rlet rlău âk nău kan, bah tanh jal, tanh ao răm.... joi nău rêh lôch nar, jêh nĕ rgop mbrơi mbrơi jêng geh ntŭk tăch ndơ. Mô knŭng hao ƀư tơm kon nuĭh, ƀư tơm nău rêh bah nơm, yuh Nguyễn Thị Kim Trúc hôm lôch ƀư kon, mât uănh uĕh đah drăp ndơ, nuih n’hâm an 2 u che hôm e rêh n’hanh nuĭh oh bu klô aƀaơ geh ji ta ƀon. Mô knŭng ndrĭ, yuh hôm kơl 2 hê pah kan ta ntŭk geh nău kan ƀư ntop tay. Tâm pă đah nău kan n’hanh nău rêh bah nơm, yuh Trúc lah kơt aơ:

Yuh Nguyễn Thị Kim Trúc n’hanh ntŭk tăch ndơ bah nơm.

“Săk bah gâp nơm lah an rêh uĕh, nơm gĭt mĭn êng, an gĭt gu âm uĕh, geh nău rêh. Tăch an geh nuih n’hâm gay kônh wa oh yơ kơl uănh nger tât he, rwăt ndơ an he. Lah he rêh mô uĕh, janh he tăch ndơ khlay tay ri kônh wa mô yô̆. Nuih n’hâm an dâk bôk năp. Geh koet nte ri koet nte yơn an geh nuih n’hâm uĕh”.

Yô̆ đah nău rêh nuĭh tơm, nuĭh bên hăn lăp tâm ntŭk tăch sŏk êng ndơ ŭch rwăt. Wa Nguyễn Thị Lan, jay ta Tổ 3, phường Duy Tân, du hê nuĭh way an âk nău yô̆ rŏng uĕh rnôk nkah tât nuĭh tơm ntŭk tăch ndơ:

 “À! Yuh Trúc nĕ lah. Tăch ndơ ri rah rơih, ngăch ngar. Ma lah ngăn hôm e thuk lơn du đêt jêng yuh Trúc âk nuĭh. Yuh Trúc nĕ gơih ngăn, yuh nĕ gơih. Lah nsum lah nuĭh mô lap yơn ma lŏ gơih, kloh uĕh, jêng ăp nuĭh bu ŭch đŏng, jêng lah yuh âk nuĭh rwăt ngăn”.

Ăp nuĭh du nău rêh, du hê nuĭh geh du nău êng êng, yơn dŭt âk tâm rnoh rlău 6.200 nuĭh khoet nte ta n’gor Kon Tum lĕ dơi joi nău uĕh lăng an săk nơm. Geh du nău nsum dơh saơ rnôk mâp đah khân pơng, nĕ lah nău mĭn hun hao têh, nuih n’hâm uĕh n’hanh nsing nơm tâm săk nơm. Yuh Phạm Thị Hồng Hương, 53 năm deh, jay ta Thôn 6, xă Đoàn Kết, nkual ƀon têh Kon Tum geh koet nte ta jâng bah jêt, aƀaơ lĕ geh sau hôm e gơih nđơr pah kan:

“Lĕ rngôch ăp nău soan gâp dơi ƀư ri gâp nsrôih ƀư. Ôi n’hôl m’êt hăn tăch ta ngih sam bŭt. Sĭt joi pih an ndrôk, an sŭr sa. Jêh nĕ geh mông ru hăn ƀư mpêh ta rmôt Tự lực. Kêng măng ka choh nkra kho ao. Lah nsum pah kan geh prăk an rnăk wâl gay mĭn an kon, sai ri aƀaơ ji đŏng. Mpŏng ŭch bah gâp ăp nuĭh koet nte nsrôih răm m’ak, ŭch nău rêh lơi prêng. Gâp nsing nơm dơi ƀư moh nău ri he djăt ƀư he tâm rnglăp đah kon nuĭh”.

Yuh Phạm Thị Hồng Hương đah ngoăy tâm âk nău kan ăp nar.

Mhe rlău, Rmôt kan mât njrăng nău dơi kon se n’hanh ntop kơl nuĭh koet nte n’gor Kon Tum ƀư rƀŭn nchră rnê rhơn nuĭh koet nte ntoh lư. Wa Nguyễn Thị Ánh, Kruanh Rmôt kan an gĭt.

“Rƀŭn nchră rơh aơ mpôl hên geh 100 nuĭh ntoh măt lah nuĭh koet nte ta lĕ rngôch ăp nkuăl, nkual ƀon têh tât râng. Ăp nuĭh ntoh lư ta aơ dơi lah rmôt ntop kơl, dơi lah mô hŏ dơi Rmôt kan ntop kơl yơn khân pơng lĕ geh ăp nău ƀư geh nkô̆ gay hao rklaih ach o, hao tâm nău rêh n’hanh kơl an ăp nuĭt koet nte ach o lơn gay khân pơng hao. Jêh ăp rơh rƀŭn nchră geh rêng hvi dŭt âk. Ăp nuĭh dơi râng Rƀŭn nchră aơ sĭt ƀon lan rêng hvi ăp nuĭh uĕh kan uĕh gay ma geh âk nău ƀư geh nkô̆ kơl an ăp nuĭh kiău ma gay bu ndrel hao”.

Bah bôk năm tât aƀaơ, êng Rmôt kan mât njrăng nău dơi kon se n’hanh ntop kơl nuĭh koet nte bah n’gor lĕ an 4 rnăk jay tâm kơl khlay 125 rkeh prăk; ntop kơl 10 mlâm ndrôk me an rnăk nuĭh koet nte geh nău rêh jêr jŏt n’hanh nchrăp an 200 ndeh rlă an nuĭh koet nte.

          Nuĭh rblang: Y Sưng Phê Ja