VOV4.M’nông: Ƀư tĭng bôk nău kan rƀŏng tĭng lam dak “Du xă du ndơ” OCOP, năm 2021 n’gor Kon Tum ndâk njêng geh 58 ndơ n’hao dĭng lĕ ndơ OCOP bah n’gor hao 146 ndơ n’hanh geh bah 3 tât 5 sao. Tâm rnôk jêr jŏt, khuch bah srê Covid-19, ăp nuĭh tơm ndơ OCOP, nău kan dơi kan n’gor Kon Tum lĕ geh âk mĭn ƀư mhe tâm boăt nthoi, tăch ndơ̆  ndơ rgop rgâl nău rêh nuĭh ƀon lan.

Xă Đăk Pxi, nkuăl Đăk Hà, n’gor Kon Tum ntoh lư đah ndơ OCOP ƀăng glê kro. Năm 2021 nuĭh ƀon lan tâm xă joi, nkret gâm geh nklăp 12 tấn ƀăng glê kro an ntŭk tăch. Tâm rnôk chôt srê Covid-19 geh jêr jŏt, ndơ OCOP ƀăng glê kro bah xă Đăk Pxi hôm e geh nuĭh dŏng wơt dơn. Nô A Sáo, ƀon Kon Pao Kla, an gĭt, knơm râng ƀư ndơ OCOP n’hao geh khlay, nuĭh ƀon lan tâm xă geh tay prăk rgâl nău rêh bah nĕ lơ uănh an ndơ bah nơm:

          “Ntơm bah khay 7 kônh wa hăn tâm bri joi ƀăng glê. Kônh wa nkret gâm êng ƀư ndơ ƀăng kro. Gay geh ndơ kloh uĕh, tăch n’gluh dâl rnôk dơi sŏk ƀăng an ngăch poih lĕ ntô n’hanh nkrêt dâl. Jêh nĕ sŏk trăm đah dak nđik, rao kloh, bal ih duh nar mô lah pâr đah ŭnh. Lor rnôk tâl ndơ hhom an săch ăp rlat ƀăng mô uĕh, săch ăp rlat kah ngăn ri nuĭh rwăt ŭch, sa mư kah. Kônh wa geh prăk bah ƀăng glê lơ ŭch ƀư, lơ geh đah nău kan”.

Hun hao nkual tăm ndơ dak si rhŏ an nkret njêng ndơ OCOP ta nkuăl Đăk Tô.

Năm 2021 tâm rnôk srê Covid-19 geh jêr jŏt, ăp doanh nghiệp, hợp tác xã, rnăk tăch rgâl bah n’gor Kon Tum hôm e ndâk njêng geh 58 ndơ OCOP đah ndơ nkret njêng geh ơm ta ntŭk. Tâm nĕ ntoh lư rmôt ndơ nkret njêng bah sâm Ngọc Linh, cà phê, sâm rse, play... Yuh Hồ Thị Kim Oanh, Kruanh Công ty Cổ phần Thương mại-Sản xuất n’hanh Dịch vụ Lâm Thịnh, ta nkuăl Đăk Tô an gĭt, doanh nghiệp lĕ ndâk ƀư geh ndơ Trà sâm rse Ngọc Linh geh 3 sao n’hanh dôl jêh tay nkra njêng du đêt ndơ êng.

         “Công ty mhe râng tâm bôk nău kan OCOP. rnôk luh ntŭk tăch đah soan dăng tâm rlong tăch rgâl nôp đah ăp ntil ndơ êng bu geh nău tăch rgâl jŏ hôm nkôp đah he mô hŏ ban dŭt ngai. Jêh 2 năm râng tâm bôk nău kan OCOP rup gui lĕ dơi hao dŭt âk. Đah nău tăch rgâl hao đêt ngăn 50% đah soan tâm rlong, đah rup gui ntô jêh nĕ uĕh kah ndơ. Rnôk he an ntŭk tăch điện tử Shopee he mô geh mô tâm ban ăp ndơ êng”.

Du ntŭk tăch ndơ OCOP ta nkual ƀon têh Kon Tum

          Kơp tât lĕ năm 2021, n’gor Kon Tum lĕ ndâk ƀư geh 146 ndơ OCOP dăp hạng bah 3 tât 5 sao. Gay mĭn lah ndơ ntoh lư, n’hao nău khlay ndơ, boăt ntoi ntŭk tăch dơi uănh mĭn khlay. Tâm rnôk chôt srê Covid-19, ăp nuĭh tơm ndơ OCOP ngăch rgâl trong tăch rgâl ta ntŭk tăch điện tử kơt trong rwăt Lazada, Shopee, Sendo, Tiki. Wa Lương Thị Mỹ Huệ, Kruanh Công ty TNHH Thảo dược Tây Nguyên, mĭn lah doanh nghiệp lĕ geh knơm ngăch rgâl trong:

          “Mô geh dơi ƀư ăp trong ntrŭt ngăch tăch rgâl jêng doanh nghiệp an joi trong hăn an nơm. Doanh nghiệp lĕ râng ăp ntŭk tăch điện tư kơt Tiki, Shoppe. Knŭng geh ăp trong aơ mư hôm e. Ntŭk điện tử ri dŭt săk rnglăy”.

Nkoch mbơh ndơ OCOP bah nkuăl Đăk Hà ta rƀŭn nchră bu ur rdâk njêng nău kan n’gor Kon Tum.

          Tâm nău Civi, N’gâng kan tuch tăm lĕ tâm ôp tâm nchră đah UBND n’gor ndâk njêng rmôt pah kan ntĭm rđău nkra njêng n’hanh boăt nthoi tăch ndơ lŏ mir ta n’gor. He nkoch lĕ rngôch ndơ OCOP bah nơm an N’gâng kan tuch tăm n’hanh ntrôl dăng ăp trong tăch rgâl điện tử ntŭk tăch điện tử, ntŭk tăch điện tử. Tĭng nkô̆ nău nĕ bu mbơh ri he nkoch tay an ăp ntŭk kan bah nơm gay tăch nkre mbơh jŏ jong. Hôm đah siêu thị ri nkoch lĕ ndơ OCOP bah nơm lĕ geh tâm di”.

          Ăp doanh nghiệp, hợp tác xã, rnăk tăch rgâl bah n’gor Kon Tum năm mhe rlău nsrôih rgâl trong tăch rgâl điện tử lĕ dơi rgâl hao tăch ndơ tâm rnôk srê Covid-19. Nuĭh ƀon lan mô geh rmeh ndơ lŏ mir, geh prăk Tết aơ đăp mpăn hơm răm.

          Nuĭh rblang: Y Sưng Phê Ja