VOV4.M’nông: Ôi lơ 7/4, ta Nkuăl ƀon têh Kon Tum, Rnâng kan rđau nau yur mham kơl an n’gor Kon Tum ƀư nau rgŏ jă “Nar yur mham kơl an năm 2022”. Nau kan gay n’hao nau gĭt tâm ăp kơn ƀon lan mpeh nkô̆ nau, nau khlay ueh bah nau “Yur mham kơl an nŭih”. Ntoh nau tâm nar rgŏ jă, Groi Kruanh UBND n’gor Kon Tum Y Ngọc mbơh, ăp năm rlau aơ, nau kan yur mham kơl an tâm n’gor Kon Tum hŏ jêng nau kan ueh, jru, geh âk mpưm ƀon lan rnâng kơl.

Êng tâm năm 2021 mhe rlau, ntŭk kan dak si n’gor Kon Tum ndơn geh rlau 5.200 đơn vị mham kơl an nŭih kơl an. Jêh nar rgŏ jă, geh rlau 300 đơn vị mham geh ƀon lan n’gor Kon Tum pă kơl an, rgop tâm “Ngân hàng mham kơl an” kơl an nau kan kơl săm nŭih geh nau ji kuet./.

Nŭih rblang: H’Thi