VOV4.M’nông:  Nkual Tây Nguyên dôl tât rgâl tâm yan mih, yan poh phân an tơm tăm. Aƀaơ, ndrel đah rnoh phân dôl hao khlay ngăn, ta Kon Tum nuĭh tăm cà phê ta nkuăl Đăk Hà hôm e saơ âk bao phân poh khlay sinh học An Thái NPK geh mô tŏng jâk.

Bah năp Tết Nguyên đán Nhâm dần 2022, nô Nguyễn Văn Trung, jay ta Tổ dân phố 2B, nkuăl têh Đăk Hà, nkuăl Đăk Hà, n’gor Kon Tum, lah nuĭh pah kan Công ty TNHH MTV Cà phê 731, mpeh tâm Tổng Công ty Cà phê Việt Nam dơn manh bah công ty 20 bao phân sinh học An Thái NPK, jâk du bao 50kg gay poh an tơm cà phê. Tâm rnôk djôt sĭt ăp bao phân, saơ n’gơch lơn bao ƀa ƀă nô djôt cân rlong nkă saơ lĕ rngôch ăp bao mô tŏng da dê nkôp đah nău mbơh nchih tâm bao:

“Gâp sŏk ndơ aơ bah Công ty TNHH MTV Cà phê 731. Gâp sŏk sĭt ri nklăp tâm 26, 27 Tết. Gâp ƀư mir gâp tung saơ pơng n’gơch ri gâp mĭn lah mô tŏng jêh nĕ sŏk ký rlong nkă. Saơ nô tŏng ký ri gâp lah đah kruanh rmôt bah rmôt tuch tăm”.

Nô Nguyễn Văn Trung, nuĭh saơ ăp bao phân mô tŏng

Bah saơ bao phân mô tŏng bah nô Nguyễn Văn Trung, âk phung pah kan êng dơn manh phân poh bah Công ty TNHH MTV Cà phê 731 lĕ nkă uănh tay ri saơ ăp bao mô tŏng ký đah âk mô tŏng bah 1 tât 1,5 kg du bao. Nô Bùi Đình Kiên, jay ta Tổ dân phố 2A, nkuăl têh Đăk Hà, nkuăl Đăk Hà, an gĭt:

“Rnăk wâl gâp sŏk geh 10 bao 5 tạ, oh gâp ri tât du tấn. Nkă tay aơ mô tŏng ký bah pơng nklăp 1-1,5 kg. Ƀon lan, phung pah kan saơ mô nsing nơm tâm Công ty tay. Mpôl hên ƀư luh cà phê dŭt jêr jŏt, ŏk r’ah. 2kg cà phê mô dơi rwăt du ký phân ma tâm rnôk nĕ phân aƀaơ dôl lah rnoh âk hôm mpôl hên mô janh lah tât nău uĕh tam”.

Djăt nău lah mpeh nău ăp phân poh sinh học An Thái NPK manh an phung pah kan ăp Rmôt nkra njêng mô tŏng, kruanh Công ty TNHH MTV Cà phê 731 lĕ an uănh nđôi, năl ăp bôk bao mô tŏng 1,5kg tih đah rnoh nchih tâm bao n’hanh tâm ton. Wa Nguyễn Hữu Tư, Groi Kruanh Công ty an gĭt, phân poh aơ Công ty lĕ nglăp 2.256 bao bah ntŭk kan pă manh lah công ty TNHH MTV pă manh công nghệ mhe SVD gŭ ta nkual ƀon têh Kon Tum gay pă an nuĭh ƀon lan. Tâm rnôk pah kan đah Công ty TNHH MTV Cà phê 731, ntoh măt ntŭk kan pă manh lah wa Lê Quang Dũng, Kruanh nkre ƀư Giám đốc lĕ kơp dơn geh nău mô tŏng bah ăp bao phân n’hanh an lah yor tih bah trong tâl bao. Mpeh trong mkra ndơ phân poh mô tŏng ký, wa Nguyễn Hữu Tư mĭn lah, ntŭk kan pă manh lĕ dơn trok:

Du bao phân sinh học An Thái NPK mô tŏng

“Nô Dũng lah bôk năp nô mbra trok n’hŭch rnoh phân nĕ an nuĭh pah kan. Tal 2 nô mbơh nău dăn yô̆ lĕ rngôch cán bộ phung pah kan n’hanh nuĭh kan Công ty Cà phê”.

Mĭn joi lĕ gĭt geh đêt ngăn 3 năm Công ty TNHH MTV Cà phê 731 mpeh tâm Tổng Công ty Cà phê Việt Nam ta nkuăl Đăk Hà, n’gor Kon Tum tâm ton rwăt phân poh sinh học An Thái NPK đah Công ty TNHH MTV kơt dŏng công nghệ mhe SVD pă an phung pah kan gay poh an cà phê. Nău mbơh nchih tâm bao phân sinh học An Thái NPK mô tŏng an saơ, phân poh dơi dŏng an ăp ntil tơm tăm n’hanh dơi nkra njêng yor Công ty TNHH Công nghệ hữu cơ sinh học An Thái, ta Lô C4B, nkual công nghệ Hòa Bình, nkual ƀon têh Kon Tum, n’gor Kon Tum.

          Nuĭh rblang: Y Sưng Phê Ja