VOV4.M’nông- Tât aƀaơ ta n’gor Kon Tum lĕ geh âk nuĭh bu rlăm tât ta Campuchia pah kan “nău kan dơh prăk khay âk” n’hanh lĕ rngôch ăp nuĭh geh rlăm hôm nha dŭt mom. Gay ma nuĭh ƀon lan, ngăn lah ta n’har bri n’hanh nkual rnoi đê̆ mô geh tŭp ta nău ndơm “Nău kan dơh prăk khay âk”, mpôl kan tahen n’har bri Kon Tum n’hanh n’gâng kan ta ntŭk dôl ntrôl dăng nău kan mbơh tơih kơl an ƀon lan n’hao nău mât njrăng.

Lôch geh mpôl kan tahen n’har bri Kon Tum kơl vơt oh Y Liên, 16 năm deh ta thôn Kei Joi, xã n’har bri Đăk Xú, nkuăl Ngọc Hồi bâh Campuchia sĭt dak nơm ta dŭt khay 8 mhe nơh, cán bộ tahen pôih n’har bri Đăk Xú tâm rgop đah n’gâng kan ta ntŭk n’hao nău mbơh tơih, mbơh rblang gay ma nuĭh ƀon lan gĭt vât nău kan dơh prăk khay âk kanŭng lah nău rlăm dơm. Trung tá Nguyễn Đình Thạch, kruanh pôih tahen n’har bri Đăk Xú an gĭt.

        “Ntŭk kan tâm rgop đah n’gâng kan ta ntŭk leo ƀư mbơh tơih ta ntŭk mpeh nău mplư rlăm, nău kan têk leo bâh ăp mpôl rlăm ăp oh mom hăn dak bah dih, ngăn lah ta Campuchia đah nău kan dơh prăk khlay âk. Ntŭk kan lĕ mbơh tơih đah mpôl kan rgŏ jă ƀon lan jŭr tât ăp ntŭk mbơh tơih an ăp rnăk vâl geh gĭt, njrăng đah ăp nău tât kơt nĕ”.

          Tĭng nău mbơh bâh wa Đào Tuấn, kruanh UBND xã Đăk Xú, nkuăl Ngọc Hồi, tâm rlău 7 rbăn nuĭh ƀon lan bâh xã, ƀon lan rnoi đê̆ geh rlău 60%. Ndrel đah nău kan mbơh tơih rgŏ jă gay ma ƀon lan n’hao nău mât njrăng đah nău rlăm nău kan dơh prăk khay âk”, Đảng ủy, n’gâng kan xã lĕ nsrôih joi trong kan gay ma nuĭh kan bâh ta ntŭk geh nău kan tâm di n’hanh đăp mpăn:

        “Chi bộ ngăn lah rnâng kan mât uănh thôn geh gĭt oh kon nơm mơh ntil nău ŭch pah kan tâm n’gor mô lah n’gor êng mô lah dak bah dih. Đảng ủy, n’gâng kan tâm ôp bâh ăp ntŭk geh nău knơm mbơh nău pah kan, ntŭk pah kan hăn kan dak bah dih gay ma mât đăp mpăn geh nău mât uănh bâh ngih dak der geh ăp oh, ăp mom n’hanh nuĭh pah kan geh bu rlăm, têk leo kơt mhe nơh”.

N’gor Kon Tum geh trong n’har bri dăch n’har đah dak băl Lào n’hanh Campuchia. Uănh năl ăp nuĭh mplư rlăm nde ma nău dơh djăt nuĭh bâh ƀon lan tâm ban kơt nău mô vât bâh du đê̆ mom ndăm geh nău mĭn ŭch dơh, ngăch ndrŏng, mpôl kan tahen n’har bri n’gor Kon Tum dôl geh tâm rgop đah n’gâng kan n’hanh ăp ntŭk kan geh gĭt na nê̆ ta ntŭk gay ma ngăch njrăng mô an nuĭh ƀon lan tŭp ta nău rlăm nău kan dơh prăk khay âk. Đại tá Lê Quốc Việt, leo kan kruanh tahen n’har bri Kon Tum an gĭt.

        “N’gâng kan leo kan lĕ ntĭm đă ăp pôih tahen mbơh tơih tay an ƀon lan gĭt n’hao nău mât njrăng mô an ăp nuĭh nĕ mplư rlăm, têk leo ăp nuĭh ngăn lam mom ndăm, mom ndăm geh têk leo, jă hăn kan ta Campuchia. Nkre lah n’gâng kan leo kan  tahen lĕ geh mbơh đah n’gor Ủy, UBND n’gor n’hanh n’gor ủy, UBND n’gor lĕ geh nău ntĭm đă ăp mpôl kan, ăp n’gâng kan bâh n’gor an geh tâm rgop ƀư ueh jăp nău kan aơ. Mpôl hên lĕ pah kan đah 4 nkuăl n’har bri n’hanh dăn đă ăp nkual ntĭm leo ăp n’gâng kan geh tât gay ma tâm rgop đah tahen n’har bri ƀư ueh jăp nău kan mât uănh ta ntŭk n’hanh mbơh tơih, ntĭm nti ƀon lan mô geh bu têk leo, jă hăn kan ta Campuchia.

Nuĭh rblang: Thị Đoắt