VOV4.M’nông: Uỷ ban tâm rnglăp công giáo Việt Nam n’gor Dak Lak mhe ƀư Đại hội ntoh măt nŭih tĭng chroh Công giáo Việt Nam ndâk njêng ndrel mât neh dak tal 7. N’gor Dak Lak rnôk aơ geh rlau 217 rbăn nŭih tĭng chroh Công giáo, rgum rƀŭn tâm 108 ntŭk ngih brah. Ƀư tĭng nau rgŏ jă “Lam ƀon lan tâm rnglăp ndâk njêng nau rêh mhe, đô thị mhe”, kônh wa tĭng chroh hŏ ndrel ƀon lan tâm nkuăl ƀư rgop âk rmen prăk, pă êng ma rhiăng mêt vuông neh gay ma nkra trong, ndâk njêng, n’hao nkra mhe trong thôn, trong xã.

Âk giáo xứ, họ đạo hŏ ntuh kơl ndâk ntŭk pâl, thể dục thể thao, rƀŭn rgum njroh mprơ, kơl an druh ndăm geh ntŭk pâl ueh. Rơh tât, kônh wa tĭng chroh công giáo tâm nkuăl nsôih ndrel nuih n’hâm tâm rnglăp tâm kơl gay ma hun hao văng sa, ntrŭt dăng ăp nau kan kơl an, ndrel ƀon lan lam n’gor ndâk njêng ƀon lan sâm geh, ueh mhe./.

Nŭih rblang: H’Thi