Tâm Thôn Sômalơng A, xã Ia Hiao, trong neh bŏk, hvêt bah năp nơh geh pơk hvi, tŏ bê tông, hăn ro ngơi ngăn. Ntơm bah trong aơ lah ngih bah wa Siu Hiếu, Kruanh Uỷ ban Mặt trận Tổ quốc Việt Nam xã Ia Hiao. Neh bah rnăk wa tâm êp trong aơ geh pơk hvi. Mô đê̆ nŭih lŏ rvê rnôk pă neh bah rnăk vâl nơm, yơn wa ŭch pă êng neh.  Wa Hiếu ân lah, ŭch bonh đă ƀon lan ri cán bộ ân ƀư lor:

            ‘Săk gâp nơm ntoh n’hao nau leo trong tâm nau kan nkoch trêng bonh đă ƀon lan pă neh, ndơ geh gay ma pơk hvi trong hăn. Đah ma rnăk vâl phung hên ri jêh rnôk nkoch trêng bonh đă ƀon lan ndrel rnăk vâl ri rnăk vâl tâm ban nau pă du gưl neh bah nơm gay ma pơk hvi trong hăn. Lŏ ƀư ueh nau dơi bah đảng viên hăn lor tâm nau kan bonh đă”.

            Ntơm bah nau leo trong bah cán bộ, đảng viên, nŭih ƀon lan Ia Hiao ăp nhoat tâm ban nau ma nau ntrŭnh pơk hvi trong hăn ƀon lan, trong hăn tât lŏ. Tât rnôk aơ, geh 450 rnăk geh pă êng neh, ndoh ndơ gay ma pơk hvi 30 trong hăn tâm 11 thôn, ƀon, đah rnoh jong rlau 12,4 km.

            Tâm thôn Yên Phú 2, wa Vũ Thị Lý kŏ mra doh n’gâng n’gar nâp bah rnăk nơm gay ma nkra trong. Tĭng wa Lý, lor ma ƀư, cán bộ tâm ƀon âk tŏ tât nkoch trêng, mbơh bonh gay ma ƀon lan gĭt lah nơm geh trong hvi ri nau geh dơi jêh aơ rnăk nơm geh âk đŏng:

            ‘Pơk hvi trong hăn yor lah ndeh klư hăn ro rnôk aơ âk ngăn, tâm ƀon hŏ geh ndeh ôtô, rnôk aơ geh Đảng ndrel Ngih dak kơl an rhơn ngăn, pơk hvi trong gâp mra châm n’gâng n’gar nâp gay ma pă neh gay ma pơk trong”.

            Ntơm bah dŭt năm 2025 tât rnôk aơ, xã Ia Hiao hŏ ntuh kơl nklăp 3,6 rmen prăk ƀư jêh trong hăn ndrel trong hoch dak tâm rnoh rlau 40 ha. Nkuăl dôl nchrăp rưih lơi ăp ntŭk jê̆, njêng ăp lŏ têh, pơk trong nơih ueh lơn gay ma leo máy móc nau kan, n’hao nau nâp ndrel săk tam nau kan.

            Ăp rnoh mrô ntuh kơl knŭng dŏng du gưl tâm nau nkoch. Nau khlay lơn lah ntŭk kan geh moh ntŭk ân ndrel rklaih moh nau kan bah ƀon lan. Tâm ƀon Ma Hrai, wa Nay Hak geh rlau du sào ba hŏ geh tăm bah âk năm. Bah năp nơh, rnăk wa nsing tâm bri mih. Mih têh ri lip, duh nar ri mô tŏng dak, geh yan roh dơm, geh yan mô geh âk ôh. Rnôk trong mương geh ƀư nâp, dak tât lŏ ueh lơn, nau rvê bah ƀon lan tăm ba kơt rnăk wa Nay Hak kŏ bah oi đŏng:

            ‘Ngih hên geh rlau du sào lŏ tăm bah âk năm aơ ta aơ hôm, geh năm dak băm roh dơm, geh năm ri kro phang ri ma mô geh âk ôh. Rnôk aơ trong mương geh ntuh kơl nâp ri ma tŏ dak ueh tŏng ti ma gâp rhơn ngăn”.

            Nau ntrŭnh Đại hội Đảng bộ xã Ia Hiao năm kan 2025-2030 năl ngoai tâm ăp nau rgâl mhe khlay ngăn lah ndâk n’gâng kan kơl an, njêng nâp, ƀư ueh rjăp, sŏk ƀon lan ndrel ntŭk kan tăch rgâl ƀư tơm. Aơ kŏ lah ntrong ma ăp nkuăl ƀư ueh ngăn nuih n’hâm rđau mrô 05 bah Bộ Chính trị mpeh “Ntrŭt dăng nau ntĭm nti ndrel ƀư tĭng nau mĭn, nau rêh, nau kan Hồ Chí Minh, ngăn lah đă mpeh nau kan leo trong lor, nau rêh ueh ƀư nau kan, ntrong pah kan ân geh khoa học, ƀon lan ƀư tơm, tâm dăch ma ƀon lan, kơl an ân ƀon lan.

            Tâm xã Ia Hiao, nuih n’hâm nê geh ntơm bah nau kan cán bộ jur tâm dâng, tât djăt ndrel rklaih ăp nau kan ma ƀon lan mbơh đă, rgâl ma knŭng njeng tâm nau mbơh. Tĭng wa Bùi Hữu Tâm, Groi Bí thư Rnâng kan Đảng uỷ xã Ia Hiao, ŭch geh nau ntrŭnh ân tâm di ri ê lor cán bộ ân geh tâm dăch ma ƀon lan, gĭt nau ƀon lan ndrel ndŏ nơm tâm nau kan bah ƀon lan:

            ‘Tâm dăch ma ƀon lan, kơl an nau ŭch ndrel gĭt dơi nau mĭn bah ƀon lan lah nau khlay ngăn ngên. Geh hăn jri hăn tâm dăch ma ƀon lan ri mơ gĭt dơi ăp nau ŭch, nau kan bah ƀon lan ndrel ndŏ luh ăp nau kan gay ma rđau đă ƀư. Lah nơm ngai nkhah ma ƀon lan jêh ri gŭ djăt knŭng nau mbơh ri jêr ngăn. Tal bar đŏng lah nơm ân geh dnŏ nau kan bah rmôt cán bộ tâm nau dơi bah ƀon lan kơt lah nơm ân geh ntruch lơi dŭm bri mét neh, rưih dŭm âk n’gâng kan ri săm nơm saơ n’goch ngăn, lah nơm geh kơt nê ri nơm mĭn ndrel mhâm nau bonh đă ƀon lan. Rnôk ƀư dơi nau nê ri nŭih ƀon lan saơ lah cán bộ ân gĭt nau mĭn ndrel ăp nau nkol đă bah ƀon lan ri khân păng mra nkoch tay đah nơm đŏng”.

            Tâm Ia Hiao, ăp trong têh geh pơk, trong pă dak ăp nhoat geh ƀư ân jêh, pơk trong nơih ueh tay gay ƀon lan hun hao tuch tăm, n’hao săk geh văng sa. Ntơm bah ăp nau kan ƀư ân n’hêl, n’gâng kan tâm nkuăl ăp nhoat ƀư ân rjăp ngăn nau mĭn ƀư kan, sŏk ƀon lan ƀư tơm, sŏk nau săk tam kơl an ƀon lan ƀư mâng veh. Nê lah ăp nau kan bah cán bộ, đảng viên tâm Ia Hiao ƀư ngăn ngên đah ăp nau ntĭm nti dnrel ƀư tĭng nau mĭn, nau rêh, nau kan  Hồ Chí Minh, ntơm bah ăp nau kan ngăn, ndrel ma nau rêh jêng ndrel nau geh ŭch bah ƀon lan./.