Kêng măng 24/7, Mpôl pah kan yor Kruanh Ban Nội chính Trung ương Phan Đình Trạc ƀư kruanh rmôt, lĕ geh nar pah kan đah Ban Thường vụ n’gor Dak Lak mpeh trong kan nội chính, njrăng n’gang sa khâm sa ƀer n’hanh rgâl nkra tư pháp 6 khay bôk năm 2023. Mbơh ta nar pah kan, wa Phạm Minh Tấn, Groi Bí thư rnâng kan N’gor ủy Dak Lak an gĭt, bah meng ăp săk rnglăy dơi geh, 6 khay bôk năm, nu nău rnă njrăng chính trị, đăp mpăn nău rêh jêng bah n’gor hôm e geh âk nkô̆ nău jêr jŏt.

Trong kan gĭt nu nău, ntŭk ntô, ntil nău khlay mpeh rnă njrăng, đăp mpăn geh rnôk mô hŏ ngăch, mô hŏ jru. Ntrong leo lam ƀon lan mât njrăng bri dak ta du đêt ntŭk mô hŏ nâp nâl. Ntoh ngơi ta nar pah kan, wa Phan Đình Trạc, Kruanh ban Nội chính trung ương đă Ban Thường vụ N’gor ủy Dak Lak n’hao nău rđău, ƀĭt joet ƀư tĭng tâm ban, lĕ rngôch n’hanh n’hao săk rnglăy ăp trong mkra njrăng n’gang sa khâm sa ƀer; mât uănh ngăch, tŏng ăp nău ntrŭnh, nău kơl bah Đảng, pháp luật bah Ngih dak mpeh njrăng n’gang sa khâm sa ƀer, hăn ndrel đah trong kan ndâk njêng Đảng. Lơn lah, Ban Thường vụ n’gor ủy Dak Lak mât uĕh tay, mkra jêr jŏt, hôm e gay ntĭm rđău ƀư uĕh trong kan đăp mpăn rnă njrăng chính trị, mât đăp mpăn nău rêh jêng, ngăch saơ, mkra ăp nu nău mhe ntoh, mô an geh mâp ndrăt tât ndal.