Bah năp rơh hop tâl 5, Quốc hội khóa XV, nar aơ (11/5), Mpôl đại biểu Quốc hội n’gor Lâm Đồng mâp cử tri ta phường 9, nkual ƀon têh Đà Lạt (Lâm Đồng). Ủy viên Bộ Chính trị, Bí thư Trung ương Đảng, Kruanh Ban nội chính trung ương Phan Đình Trạc n’hanh kruanh n’gor Lâm Đồng râng. Ta rơh mâp, cử tri mpơl nău nsing nơm n’hanh mpŏng tâm ăp nău n’glêh an ntrŭt ntrôl hun hao wăng sa- rêh jêng kon nuĭh bah n’gor n’hanh neh dak.

Tâm ăp nkô̆ dăn đă, cử tri mpơl nău ŭch rŏng ăp njăr trong cao tốc nthoi Đà Lạt đah ăp n’gor mpeh bah dâng ơm dơi na ƀư da dê, pah kan dăp rgum, ntuh kơl rdâk njêng ntŭk ntô ndơ dŏng dơi ŭanh khlay lơn đŏng; ơm geh trong rƀŏng đăp mpăn tơm dak mpeh jŏ jong. Wa Phan Đình Trạc, Ủy viên Bộ Chính trị, Bí thư Trung ương Đảng, Kruanh Ban Nội chính Trung ương hŏ nchih nkah ăp nău rgop, nău dăn đă bah cử tri n’hanh lah rjăp mbra njuăl nău tât ăp nhih pah kan geh nău dơi kan.