Nchŏng ty tât ntŭk nkao su dôl ma luh dang tâm lôch njok 2 đah trong ƀon Buôr, xã Hoà Xuân, nkual ƀon têh Buôn Ma Thuột, wa H’Lép Niê hôm moh lah Mí Khiết, mbơh, trong kao aơ, n’hâm rgop âk ngăn tă bah Groi Bí thư Chi bộ, ƀon ƀon Ama Tháp:

‘Tâm ƀon Bur, xã Hoà Xuân aơ, tâm ăp nar rƀŭn rgum tâm ngih rƀŭn, Kruanh ƀon nkoch ân ƀon lan, ăp nŭih, ăp ngih lah mât răk ân trong kloh, ueh, tăm kao, ndri ma ƀon lan rhơn ngăn. Gâp kŏ lah du hê nŭih ƀon lan, tăng kruanh ƀon nkoch mbơh kơt nê ri kŏ ƀư tĭng, tăm kao ân ueh”.

Mô knŭng bonh đă kônh wa tăm kao ân ueh trong ƀon, Kruanh ƀon Ama Tháp hôm leo trong tâm nau tăm tơm đah nau kan tăm nsum ma tiêu, sầu riêng tâm mir cà phê. Jêh rnôk nau kan geh săk tam Kruanh ƀon Ama Tháp hŏ nsôih bonh đă ƀon lan ƀư ueh nau kan kơt tĭng nau kan tuch tăm mhe tâm nau kan tuch tăm, mât rong ndrel râng ndâk ƀư ăp nau kan hun hao văng sa. Nô mro tât ôp khâl, bonh đă ăp rnăk vâl ach o, geh nau dơi kơl, rnăk rêh ndrâu geh nau rêh jêr jŏt...bah nê geh ăp nau kan ngăn gay ma kơl an khân păng geh đăp mpăn nau rêh. Nô Y Sol Buôn Dap, tâm ƀon Buôr ngơi:

‘Tâm ƀon aơ Ama Tháp lah kruanh ƀon kơl an kônh wa ƀon lan ƀư ăp nau kan mpeh săm ƀŭt, ntĭm ân kônh wa ƀư mir, ƀư săm ƀŭt tâm UBND xã, kơl an kônh wa hun hao văng sa, n’hao nau rêh bah ƀon lan ta aơ”.

Nkah tât rnôk n’gâng kan ndrel ƀon lan Buôn Buôr rnơm ƀư Groi Bí thư Chi bộ jêh ri tât Kruanh ƀon, nô Ama Tháp mro nkoch, tâm năm 2011, tâm ƀon geh âk nŭih bu tât nkoch mbơh nau tih, têk jă ƀon lan hăn tĭng trong trih, săk nô Ama Tháp kŏ saơ geh nau klach rvê. Jêh rnôk gĭt nau tih, nau tâm di, nô Ama Tháp hŏ ndrel ma n’gâng kan tâm nkuăl tât ăp ngih gay ma bonh đă, nkoch trêng gay ƀon lan gĭt kloh. Rnơm nau nsôih nê ma Ama Tháp geh n’gâng kan tâm ƀon lan lŏ rnơm, jao đă ƀư Groi kruanh ƀon, jêh ri Kruanh ƀon, jêh ri bí thư chi bộ bah ƀon. Leo tâm nơm nau kan jâk, nô Ama Tháp nsôih lơn tay, mra leo trong lơn tay gay geh nau dơi đah nau bu rnơm nê:

 ‘Gâp nkoch ma kônh wa lah ân khân păng uănh tâm gâp nơm, lơi djăt ôh nau jă, nau nsŭk, n’gâng kan nơm mô geh nau nkhah ma kônh wa nơm ôh. Nơm ân geh mĭn tât nau rêh bah nơm mơ lor, geh nau rêh ueh, geh ngih nâp, pah kan hun hao, piăng sông ao nsoh ân tŏng. Kônh wa saơ rnôk aơ ngih dak ntuh kơl trong hoch dak ân nơm ƀư lŏ, ƀư trong ân ueh, ngih dak mô geh nchlơi ƀon lan nơm ôh ri ma nơm ân rnơm”.

Nkoch tât nau ƀư Groi Bí thư chi bộ, Kruanh ƀon Buôr Ama Tháp, wa Nguyễn Đức Thuận, Bí thư đảng uỷ xã Hoà Xuân ngơi:

‘Đồng chí Ama Tháp nkre mom, nkre gơih blau tâm âk nau kan ngăn, ngăn lah nau gơih kơl an ma ƀon lan, păng geh âk nau mhe ngăn nê lah tâm rnôk ndâk njêng ƀon lan mhe. Buôn Buôr bah năp nơh lah ƀon tơm, rnôk aơ ri druh ndăm ăp năm ƀư tĭng luật hăn tahen, jao tahen ri kŏ geh rlet nau dơi jêh ri hôm âk nau kan bah nkuăl lah nơm ntrŭnh ƀư ri păng ƀư dŭt n’hâm ueh ngăn”.

Ăp nau rgop bah nô Ama Tháp, Groi Bí thư chi bộ, Kruanh ƀon Buôr rơh rau aơ mô knŭng rgâl nau rêh bah kônh wa tâm ƀon, ma hôm ƀư nâp nau rnơm bah kônh wa tâm Đảng, Ngih dak, ƀư ntŭk nsing tâm nau rnơm, lah ntung nthoi đah gưl uỷ, n’gâng kan ndrel ƀon lan tâm nau ndâk njêng trong kan chính trị, njêng nau nsôih ân nau hun hao văng sa, rêh jêng bah nkuăl./.