VOV4.M’nông: Di nkah 97 năm nar Báo chí Cách mạng Việt Nam, măng 20/6, ta nkuăl ƀon têh Hồ Chí Minh, rđau kan nkuăl ƀon têh mâp ăp ntŭk kan báo chí. Râng ndrel ntoh nau ngơi tâm nar mâp măt, Kruanh dak Nguyễn Xuân Phúc njoăl tât ăp cán bộ, phóng viên, biên tập viên, quay phim ăp ntŭk báo chí tâm nkuăl ƀon têh Hồ Chí Minh ndrel nŭih ƀư báo lam dak nau ŭch rŏng ueh ngăn ndrel nau rhơn ueh lăng ngăn đŏng. Kruanh dak Nguyễn Xuân Phúc lah rjăp, bah ăp nau nchih bah nơm, báo chí mra dơi “nkah lah ơm” gay ăp ntŭk kan, êng nŭih mô dơi ndrel mô janh bư tih, mô janh sa khâm, ƀư khuch. Ngăn lah, đah nau kan mêt uănh, nkoch mbơh tâm nau rêh, báo chí mra dơi rgop nau ndâk njêng “Ngih dak bah ƀon lan, yor ƀon lan ndrel kơl an ƀon lan”. Nkah tay rnôk nkuăl ƀon têh Hồ Chí Minh ndrel ăp n’gor, nkuăl ƀon têh mpeh ba dâng rdâng đah nau khuch bah srê Covid-19, Kruanh dak Nguyễn Xuân Phúc rnê rmôt kan ƀư báo hŏ mô klach nau jêr, lăp tâm măng nar tât ntŭk bôk năp njrăng rdâng srê, bah nê kơl an ƀon lan lam dak gĭt nau jêr, gĭt nau janh bah Đảng bộ, n’gâng kan ăp nkuăl rlet rlau srê, ăp nhoat ndâk tay nau kan văng sa, rêh jêng./.

Nŭih rblang: H’Thi