Tâm rnôk hăn râng Lễ đăng quang bah Kađăch Anh Charles III, ôi 5/5, tĭng mông ta ntŭk, ta Thủ đô London, Kruanh dak Võ Văn Thưởng tât khâl Bảo tàng Anh – ntŭk kăl e lah ntŭk tă Karl Marx, Friedrich Engels, Lenin ndrel âk nuĭh geh nău mĭn têh hŏ tât pah kan n’hanh gŭ mĭn tâm rnôk rdâk njêng n’hanh ƀư lôch jêh lý luận mpeh chủ nghĩa cộng sản khoa học. Ta aơ, Kruanh dak Võ Văn Thưởng hŏ tât khâl Jrô răk bah Bảo tàng, hăn uănh ăp ấn phẩm geh têl nkah bah Karl Marx rơh păng gŭ rêh, pah kan n’hanh gŭ mĭn mpeh chủ nghĩa cộng sản khoa học ta dak Anh.

Tĭng siƀŭt ơm bah Bảo tàng, tâm âk rach năm, Kark Marx nchih tay âk nău mĭn bah he đah nău tâm boh bah nuĭh kan triết học nuĭh Đức Friedrich Engels n’hanh n’gluh ăp nău nchih bah păng, gŭ mĭn ta Jrô răk Bảo tàng Anh. Păng hŏ ndrel đah Friedrich Engels mbro mbrăng lăp tâm nău nkoch bah ntil kon nuĭh kơt ăp nuĭh njêng luh chủ nghĩa cộng sản khoa học geh ring tam têh kuâng n’hanh jru hvi đah ntil kon nuĭh rgâl nău gĭt blău.