VOV4.M’nông – Di nar Văn hóa rnoi mpôl Việt Nam (19/4), ôi 19/4, ta Ntŭk kruanh dak, Kruanh dak Nguyễn Xuân Phúc mâp măt đêp rmên Mpôl ntoh măt 92 bu ranh ƀon, kô ranh ƀon, nghệ nhân nuĭh rnoi mpôl đêt ntoh lư geh âk nău rgop tâm nău ƀư mât rƀăy, ndrăy, nău uĕh ơm văn hóa ăp rnoi mpôl. Ntoh ngơi rgop ta nar mâp măt, Kruanh dak Nguyễn Xuân Phúc mĭn lah trong kan mât uănh, rgâl uĕh nău rêh drăp ndơ n’hanh nuih n’hâm an ƀon lan ăp rnoi mpôl đêt nar lơ dơi uănh tât n’hanh rgâl na nê̆, lơn lah ăp nău nchrăp ƀư, nău kơl mât ndrăy n’hanh mât uĕh nău khlay văn hóa bah ăp rnoi mpôl oh nô, uănh văn hóa ăp rnoi mpôl lah du gâl mô dơi nkhah êng bah văn hóa Việt Nam.

Kruanh dak mâp măt đêp rmên bu ranh ƀon, kô ranh ƀon, nghệ nhân nuĭh rnoi mpôl đêt ntoh lư

Kruanh dak ŭch bu ranh ƀon, kô ranh ƀon, nghệ nhân, nuĭh nsing nơm ntoh lư n’hao uĕh ang tay an kon sau n’hanh ntŭk gŭ rêh, rgŏ jă tay mât uĕh nău way ơm văn hóa uĕh lăng, ntô̆ hao êng, tâm rnglăp rnoi mpôl. Yor tĭng Kruanh dak, tă bah nău boăt nthoi bah văn hóa, mbra dăch dêh, wât n’hanh ŭch rŏng ndrel, rgop mât soan dăng Việt Nam, nău khlay Việt Nam an nar aơ n’hanh bah kơi.

Nŭih blang: Y Sưng Phê Ja