VOV4.M'nông: Tâm rnôk hăn pah kan ta ăp n'gor miền Tây Nam bộ, ôi 7/4, Kruanh dak Nguyễn Xuân Phúc hŏ tât khâl, mbah rhơn Tết way ơm Chôl Chnăm Thmây ta Học viện Phật giáo Nam tông Khmer, ƀư ta quận Ô Môn, nkual ƀon têh Cần Thơ. Học viện Phật giáo Nam tông Khmer ta Nkual ƀon têh Cần Thơ dơi njêng năm 2006 gay ntĭm nti tăng sinh Khmer ta gưl nti cử nhân. Kơp ntơm bah rnôk njêng tât aƀaơ, Học viện hŏ ntĭm nti dơi 5 khoá đah rlău 200 tăng sinh tốt nghiệp cử nhân Phật học, rgop n'hao nău gĭt blău tăng sinh, ăp vị sư sãi ta ăp chùa Khmer nkual Tây Nam Bộ. Tâm khuh n'gôr nchrăp Tết way ơm Chôl Chnăm Thmây, lah ta Học viện, Kruanh dak Nguyễn Xuân Phúc dăn an ăp kruanh chroh Phật giáo, ăp nuĭh chư tăng Phật giáo Nam tông Khmer; nkre njuăl nău ôp khâl, mbah rhơn tết tât lĕ rngôch ƀon lan Phật giáo Khmer wơt Tết way ơm Chôl Chnăm Thmây năm 2022 rhơn mƀak, n'hâm suan ngăch lăng dăng soih./.

Nuĭh rblang: Điểu Thân